Шахмат бўйича 2025 йилги Жаҳон кубоги ғолиби, 19 ёшли ўзбекистонлик гроссмейстер Жавоҳир Синдоров Халқаро шахмат федерацияси (FIDE) расмий саҳифасига интервью берди. Спортчи унда мусобақанинг ҳал қилувчи палласидаги ҳиссиётлари ва финалга тайёргарлиги ҳақида гапирди.
Синдоров Жаҳон кубогидаги ғалабасини шахматдаги фаолияти учун энг муҳим воқеалардан бири сифатида баҳолади:
“Турнир жуда узоқ ва оғир ўтди. Чемпионликни қўлга киритганимдан хурсандман. Бу мен учун ҳаётимдаги энг ажойиб лаҳзалардан бири бўлди. Жаҳон кубоги — ҳозиргача ютган энг нуфузли мусобақам. Шунингдек, Номзодлар турнирига йўлланма олганимдан жуда бахтиёрман. Ҳали ўз устимда кўп ишлашим керак, менинг шахматдаги йўлим энди бошланмоқда”.
Унинг навбатдаги асосий мақсадларидан бири — рейтингини 2750 га етказиш ва дунёнинг энг кучли саккиз шахматчиси қаторига кириш.
“Мураббийим ҳар доим 2750 рейтинг балл олишим, кейин энг кучли саккизликка киришим кераклигини эслатади. Бунинг учун ишлаш, ишлаш ва яна ишлаш зарур. Икки-уч кун дам оламан, кейин февралгача кетма-кет турнирларда қатнашаман. Шундан сўнг номзодлар турнирига тайёргарлик бошланади”, дейди у.
Синдоров чемпионликдан кейин келган табриклар ҳақида ҳам сўз юритди.
“Жуда кўп табриклар олдим. Барчаси мен учун қадрли. Аммо Президентимизнинг эътибори мени алоҳида бахтли қилди. Ҳиссиётларимни сўз билан таърифлаш қийин. Оиламнинг охирги кунларда шу ерга келиб, мени қўллаб-қувватлагани ҳам куч берди. Улар овқат, шоколад, миллий таомларимизни олиб келишди”, деди гроссмейстер.
У финалдаги тактика, Вей Лига қарши танланган стратегия ва тай-брекдаги муҳим лаҳзалар ҳақида ҳам тўхталди.
“Вей Ли дебют вариантларни жуда яхши билади. Дебютда унга қарши устунлик олиш қийин. Шу сабаб 5+3 ёки 2+2 каби қисқа вақт назорати биз учун қулай бўлади, деб ўйладик. Тайёрлаган қопқонларимиз бор эди. 15+10 ва 10+10 партияларида ишончли ўйнадим, чунки рақиб бу вақтда босимига тушиб қолди”, дейди Синдоров.
У ҳал қилувчи эпизод сифатида тай-брекнинг иккинчи партиясини эслади:
“Филни Э7га чиқариб, филларни алмаштиргач, вазирни Ҳ4га қўйишим унинг имкониятларини кескин камайтирди. У 10 сонияда жуда мураккаб вариантларни топиши керак эди — бу деярли имконсиз. Охири вақтдан ютқазди. Мен эса тактик имкониятни топдим ва жуда хурсанд бўлдим”.
Синдоров мураббий ва ҳамкорлардан бири — гроссмейстер Муҳиддин Мадаминовнинг ролини ҳам алоҳида тилга олди.
“Муҳиддин Мадаминов билан 2+2 ва 2+1 форматида жуда кўп машғулотлар ўтказдик. У жуда айёр шахматчи, икки-уч юришли комбинацияларни топишда менга катта ёрдам берди. Стратегиямиз рапид ва блицда жуда яхши ишлади”, деди 19 ёшли гросмейстер.
Суҳбат якунида Жавоҳир яқин келажакдаги режалари ҳақида гапирди:
“Ҳозир фақат дам олмоқчиман. Уч-тўрт кун уйда ҳордиқ чиқараман. Кейин Жанубий Африкага йўл оламан: GCL, Европадаги турнирлар, Veyk-an-Zee, Tata Steel Chess India, рапид ва блиц бўйича Жаҳон чемпионати — дам олишга вақт бўлмайди. Келаси турнирларда ҳам яхши натижа кўрсатишга ҳаракат қиламан. Ҳаммага раҳмат”.
Маълумот учун, Жавоҳир Синдоров бундан аввал 2022 йил Ҳиндистоннинг Ченнай шаҳрида ўтган Бутунжаҳон шахмат олимпиадасида Ўзбекистон терма жамоаси таркибида ғолибликни қўлга киритган.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
