«Барселона» XXI асрда илк бор биринчи бўлимдан сўнг тўртта тўп фарқи билан мағлуб бўлди.
Ханс-Дитер Флик бошчилигидаги жамоа Испания Кубоги ярим финалининг танаффусига қадар «Атлетико»га 0:4 ҳисобида имкониятни бой бераётган эди. Каталонияликлар билан ушбу турнирда 1943 йилдан бери бундай ҳолат юз бермаган — ўшанда улар ярим финал ўйинининг биринчи бўлимида «Реал»га 0:8 ҳисобида ютқазишган. Ўша учрашув «қаймоқранглилар»нинг 11:1 ҳисобидаги ғалабаси билан якунланган.
1953 йил 25 октябрдан бери илк бор «блауграна» расмий ўйиннинг биринчи бўлимида 4 та тўп фарқи билан ортда қолди. Ўшанда улар биринчи бўлимда «Реал»дан жавобсиз 4 та гол ўтказиб юборишган ва иккинчи бўлимда яна битта гол қўшилган эди. Ўша ўйин Кубок эмас, балки Испания чемпионати доирасида бўлиб ўтган.
«Атлетико» ўз тарихида иккинчи бор «Барселона»га қарши ўйиннинг биринчи бўлимини 4:0 ҳисобида ўз фойдасига ҳал қилди. Аввалроқ бундай натижа 1949 йилнинг ноябрида қайд этилган ва ўша ўйин 4:1 ҳисобида якунланган эди.
Матнда хатолик топсангиз, ўша хатони белгилаб, бизга жўнатинг (Ctrl + Enter).