9 май куни Саудия Арабистонида ОК-2027 финал босқичига қуръа ташланганидан хабарингиз бор. Ушбу жараёнда Фабио Каннаваро бошқарувидаги Ўзбекистон миллий жамоаси «В» гуруҳидан жой олди. Рақибларимиз — Баҳрайн, КХДР ва Иордания термалари. Ҳозирда иорданияликларни тарихий ЖЧ (улар ҳам биз каби бўлажак мундиалга дебютант сифатида боришади)га ҳозирлаётган жамоа бош мураббийи Жамол Селлами қуръа маросимидан сўнг ОФК расмий саҳифасига қисқача интервью берди. Марокашлик мутахассис суҳбат давомида жумладан, Иордания миллий жамоаси Осиё чемпионатида фаворитлардан бири бўлишини таъкидлади. Эслатиш керак, иорданияликлар ОК-2023 финалига чиқиб, катта шов-шув кўтаришганди.
— Иордания миллий жамоаси Осиё кубогининг амалдаги финалчиси саналади. Қолаверса, қўл остингиздаги жамоа ўтган йили ўз тарихида илк марта жаҳон чемпионати йўлланмасини қўлга киритди. Хўш, ҳозирги кўтарилиш жараёни бўлажак Осиё кубогида қандай устунлик бериши мумкин? Умуман, сизнингча, жамоанинг айни таркиби янада каттароқ натижалар кўрсатишга қодирми?
— Албатта, Осиё кубоги финалида ўйнаш ва ЖЧ-2026 иштирокчилари қаторига қўшилиш — Иордания терма жамоаси учун катта ютуқ. Бу натижалар футболчиларда ишончни янада мустаҳкамлади. Асосийси, бўлажак мундиал янада кўпроқ тажриба орттириш имконини беради. Ҳозирнинг ўзида жамоамиз Осиё футболида ўз мавқеига эга бўлиб улгурди. Шундай экан, навбатдаги Осиё кубогида эътибор марказида бўлишимиз тайин. Умуман, Иордания термаси қитъа чемпионатида фаворитлардан бири бўлади. Бўлажак мусобақа ҳақида яхшироқ ва бафуржа гаплашиш-ўйлаш учун олдимизда ҳали вақт бор. Зеро, бизни аввало, жаҳон чемпионатидек муҳим форум ва мислсиз тажриба кутиб турибди. Океан ортида турли хил футбол услубларига қарши ўйнаймиз, демак, бизда ўзгача тажриба орттириш имкони бор. Яширмайман, бўлажак мундиалга Осиё кубоги-2027 учун яхшироқ тайёргарлик кўриш ва кучли таркиб шакллантириш имконияти сифатида қараяпмиз. Мақсад — ўзимиздан янада ёрқинроқ таассурот қолдириш. Нега энди яна бир бора финални кўзламаслигимиз, Иордания футболи мавқесини янада юқорига кўтаришга уринмаслигимиз керак?
— Жамоангиз гуруҳ босқичида Ўзбекистон, Баҳрайн ва КХДР термалари билан баҳслашади. Сизнингча, бу квартет Иордания миллий жамоаси учун нечоғли мураккаб?
— Қитъа чемпионатида ҳамиша кучли рақобат бўлади. Ўйлайманки, ҳар бир гуруҳ ўзига яраша мураккаб. Футболда, айниқса, йирик турнирларда энг муҳими — рақибларга тўғри ёндашиш, уларга ҳурмат билан қараш. Шундан сўнг ҳар бир ўйинга эътибор қаратиш ва изчил тайёргарлик кўриш талаб этилади. Тушунарлики, «плей-офф»га чиқиш учун имкон қадар кўпроқ очко олиш керак. Ҳар бир жамоада ўзига яраша техник салоҳият ва тажриба борлиги ҳам аниқ. Ўзи замонавий футболда жамоалар ўртасидаги фарқ жуда минималлашди. Хуллас, осон ўйин кутмаймиз, барчаси қийин кечади.
— Иордания терма жамоасининг охирги 3 йилдаги натижаларига қарасак, яққол ўсиш кузатилмоқда. Бу жамоага босим юкламайдими? Ҳар ҳолда, мухлислар сизлардан янада фаолроқ ўйин кўрсатиб, ривожланиш йўлида давом этишни кутишади?
— Ҳа, Иордания термаси сўнгги йиллар ўзи иштирок этган ҳар бир турнирда кучли таассурот қолдирди, Осиёнинг етакчи жамоалари қаторига қўшилди. Ўйлайманки, футболчилар бундай қарашга тўлиқ мослашишди, фаворит мақоми босимига қарши иммунитет ҳосил қилишди. Умидворманки, кейинчалик ҳам юқори даражада тайёр бўламиз ва мухлисларимиз орзу-умидларини оқлаймиз. Ишонаманки, бизни кузатиб бораётганларни уялтириб қўймаймиз. Асосийси, ўзимизга нисбатан талабчанликни пасайтирмасак, рақибларга жиддий қарасак, бас. Хуллас, ҳар бир ўйин ва босқичда ўз даражамиз, тайёргарлигимизни намойиш этишимиз керак. Аллоҳ хоҳласа, якунда мухлисларимизни қувонтира оламиз.
Яна бир гуруҳдошимиз — Баҳрайн миллий жамоасини бошқараётган хорватиялик Драган Талайич ОК-2027 қуръаси натижаларидан тўлиқ қониққанини таъкидлади. Унинг фикрича, қуръада жамоасига омад кулиб боқди: «Мана, гуруҳда қайси жамоалар билан ўйнашимизни билиб олдик. Ўйлайманки, гуруҳимиз қолганлари каби мураккаб, лекин бу қуръа дейлик, ЖЧ саралаш босқичиникидан анча яхши бўлди. Чунончи, мундиал йўлида Япония, Австралия, С.Арабистони, қолаверса, Индонезия термалари билан ўйнашимизга тўғри келди. Қисқаси, рақиблар даражаси нуқтаи назаридан бу сафар қуръада бироз омадимиз келди. Лекин ижобий натижа кўрсатиш учун ҳар бир ўйинга мукаммал тайёргарлик кўришимиз талаб этилади. Тақвим бўйича навбати билан КХДР, Иордания ва Ўзбекистон термаларига қарши ўйнаймиз. Турнирдаги биринчи ўйин ҳамиша энг муҳими саналади. Корейслар билан биринчи ўйинга қадар қўлдан келганича сифатли тайёргарлик кўрамиз. Иорданияликларга қарши баҳс қийин ва қизиқарли бўлишига аминман. Ўзбекистон термаси билан бўладиган учинчи ўйин ҳал қилувчи аҳамият касб этса, ажабмас. Умид шуки, ҳаммаси яхши бўлади ва Баҳрайн халқи Осиё кубогида амалга оширадиган ишларимиздан фахрланади. Албатта, кейинги йиғинда кўплаб янги йигитларга имконият тақдим этамиз. Унда Грузия термасига қарши ўртоқлик учрашуви ўтказамиз. Бу рақиб қандай кучга эгалиги барчага маълум. Шундай экан, таркиб бўйича мувозанатни ушлаш керак. Баъзи ёшларга имконият берамиз, ким бундан тўғри фойдаланса, биз билан қолиб, тайёргарликни давом эттиради».
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
