Европа футбол ассоциациялари иттифоқи (УЕФА) расмий баёнот билан чиқиб, агар ФИФА жаҳон чемпионати ва бошқа мусобақаларга бўлган ҳуқуқларни хусусий инвесторларга сотиш ҳақидаги режасини амалга оширса, УЕФАга аъзо барча 55 та миллий ассоциация ФИФА мусобақаларини бойкот қилишини маълум қилди.
Баёнотда шундай дейилади:
«УЕФА ва унинг таркибига кирувчи 55 та миллий ассоциация якдил позицияда турибди. Биз ФИФАнинг жаҳон чемпионати ва бошқа мусобақаларга мулкчилик ҳуқуқини хусусий инвесторларга бериш ҳақидаги таклифини бир овоздан ва қатъий рад этамиз.
Жаҳон чемпионатини инвестиция маҳсулоти сифатида кўриб бўлмайди. Бу футболнинг авлодлар давомида футболчилар, терма жамоалар ва мухлислар томонидан яратилган энг буюк меросидир. Уни сотиб бўлмайди.
Бундай муҳим ташаббуснинг футболни бошқаришга масъул томонлар билан маслаҳатлашмасдан, махфий тарзда ишлаб чиқилиб, деярли тасдиқлаш босқичига олиб келингани масъулиятсизлик ва кечириб бўлмайдиган ҳолатдир. Бу раҳбарликдаги камчилик эмас, балки ФИФАнинг жаҳон футболи ҳомийси сифатидаги бурчидан воз кечишидир.
Миллий ассоциациялар олдига ультиматум қўйилди: ё энг йирик футбол мусобақалари устидан қайтариб бўлмайдиган назоратни хусусий сармоядорларга беришни қабул қилиш, ёки оқибатларга дуч келиш. Бу демократик қарор эмас, балки босим орқали бошқарувдир.
Агар ташқи инвесторлар ФИФА мусобақаларида улушга эга бўлса, футбол абадий ўзгаради. Тижорий даромад доимий мажбуриятга, инвесторларнинг кутилмалари эса кундалик босимга айланади. Календарь, формат ва футбол келажагига оид ҳар бир қарор ўйин манфаатлари эмас, акциядорлар манфаатлари асосида қабул қилинади.
Бу моделнинг жаҳон футболида ўрни йўқ. Футбол келажагини асосий мақсади молиявий даромадни ошириш бўлган шахслар белгиламаслиги керак. Футбол ўз келажагини молиявий манфаатлар эвазига гаровга қўя олмайди.
Европанинг позицияси аниқ. Биз ҳеч қачон бу моделни қонуний деб тан олмаймиз. Кейинги авлод учун вақтинча ишонч билдирилган меросни сотишга ҳеч кимнинг маънавий ҳаққи йўқ.
Бугунги муҳокама якунларига кўра, агар ушбу таклифлар бекор қилинмаса ва ФИФА бундан буён ўз бошқаруви ҳамда мусобақаларига хусусий мулкчиликни киритмаслиги бўйича мажбурий кафолатлар бермаса, УЕФАга аъзо ҳеч бир миллий терма жамоа ФИФАнинг бирорта мусобақасида иштирок этмайди.
Ҳеч кимда шубҳа бўлмасин: УЕФА ва унинг миллий ассоциациялари бу режаларга қарши қатъий курашади. Шундай паллалар бўладики, институтлар нимани қабул қилгани билан эмас, балки нимадан воз кечгани билан баҳоланади. Бу ана шундай паллалардан бири.
Айрим қадриятлар шунчалик муҳимки, уларни сотиб бўлмайди. Жаҳон чемпионати футболга тегишли. Ҳар доим шундай бўлиб қолади. Европа овози бор экан, у ҳеч қачон сотилмайди».
Бу баёнот ФИФА президенти Жанни Инфантино илгари сурган, жаҳон чемпионатига оид тижорий ҳуқуқларнинг бир қисмини хусусий инвесторларга бериш режаси атрофидаги баҳсларни янада кучайтирди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
