Бошқа соҳаларда бўлгани сингари футболнинг ҳам ўзига хос қаҳрамонлари, образлари бор. Уларнинг баъзилари кулгили хатти-ҳаракатлари билан ишқибоз-у мутахассислар диққатини тортса, бошқалари ажойиб ўйинлари билан мухлислар олқишига сазовор бўлади. Бироқ замонавий футболда бир қаҳрамон борки, баъзида унинг антиқа ишлари ва ҳаддан ташқари баландпарвоз гаплари кишининг энсасини қотирса, ўзига хос фантастик ўйини беихтиёр уни олқишлашга мажбур этади. Бу мураккаб характер эгаси, Италия терма жамоаси ва «Милан» клуби ҳужумчиси Марио Балотеллидир.
“МЕН — ИСЁНКОРМАН!”
Ўзига ҳаддан ташқари бино қўйган Марио матбуот анжуманларида ўзига хос гаплари билан кўпчиликни ажаблантириб келади. Хусусан, собиқ клуби «Манчестер Сити»нинг собиқ бош мураббийси Роберто Манчини билан ёқалашиб қолганида, унга «Бу воқеада ўзингизни айбдор деб биласизми? Умуман, ўзингизга қандай таъриф берасиз?» дея савол беришганида Марио: «Мен ўта ақллиман. Шунинг билан бирга исёнкорман ҳам», дея жавоб қайтарган.
«Мен қачон ўзим хоҳласамгина ютқазаман, агар буни истамасам, мени ҳеч ким бўйсундира олмайди». Италиялик юлдуз бу гапини, асосан, жамоаси ютқизганида бот-бот такрорлар, бу билан отдан тушса ҳам, эгардан тушмаслигини оммага намойиш қиларди. Агар жамоасини мағлубиятдан сақлаб қолувчи голга муаллифлик қилганида голини футболкасидаги ёзувни кўз-кўз қилиш билан нишонларди: «Нега яна мен?!»
“СИЗ БИЛГАН БАЛОТЕЛЛИ — БОШҚА”
Германия терма жамоасига қарши матчда иккита гол киритиб, немисларни Европа чемпионатидан чиқариб юборгач, Марио голини ўзгача усулда нишонлаганди. Ўйиндан кейинги матбуот анжуманида эса у «Бу сизнинг кибрли эканлигингиздан далолат эмасми?» дея берилган саволга «Одамлар наздидаги Балотелли менинг қиёфамда яширинган шахснинг тамомила тескариси. Мен, аслида, сиз тасаввур қила олмайдиган даражада ўзгача бўлишим мумкин», дея жавоб берган.
Балотеллининг яна бир хусусияти шундаки, у ўзини характер ва иқтидор жиҳатидан ягона деб ҳисоблайди. Хусусан, унинг ўзи бу борада қуйидаги фикрларни билдирган: «Мен бошқачаман. Агар менга ўхшаган яна бир инсонни топиб бера олсангиз, сизни тушликка таклиф қиламан. Бундай инсонни топа олмаслигингизга эса ишончим комил».
Одатда, Мариодан «Сизга қайси давлат ёқади, Англиями ёки Италия?» дея сўрашганида у фақат қуйидагича жавоб беради: «Мен италиялик эканимдан ғурурланаман. Чунки Италияда туғилганман, Италияда катта бўлганман, Италиядаги мактабга борганман ва Италияда ишлаганман. Мен — италянман».
У шу пайтга қадар сиёсий жараёнлар, хусусан, сайловларда ҳам деярли қатнашмайди. Табиийки, бу қизиқувчан журналистларнинг эътиборидан четда қолмаган. Балотелли эса уларнинг саволларига аллақачон жавоб топиб қўйган: «Мен сиёсатга эргашмайман, чунки у мени қизиқтирмайди. Шундай экан, нега овоз беришим керак?»
“ОНАМ МЕН УЧУН БУТУН БИР ДУНЁ”
Ўзи тўғрисида юрадиган турли гап-сўз, шов-шувлардан яхшигина бохабар бўлган италиялик чарм тўп устаси бу миш-мишларни туҳмат, дея баҳолайди: «Мен ҳақимда жуда кўп воқеалар тўқилган. Деярли ҳар бир одам ўз тасаввуридаги ишкалчи Марио ҳақида гапиради. Менинг жавобим шундай: Мен ҳақимда айтилаётган гапларнинг бор-йўғи 0,01 фоизи тўғри бўлиши мумкин».
Марио Балотелли охирги пайтларда футбол ишқибозлари орасида авж олган ирқчиликка оид машмашалардан нафратланади. Боиси, унинг ўзи ҳам бу борада яхшигина кўнгилсизликларга дуч келган.
Балотеллидан кўпроқ ота-онаси ҳақида сўрашади. Ёшлигида ҳақиқий ота-онаси ташлаб кетгач, бошқа хонадонда улғайган Марио юқоридаги мазмундаги саволларни жини суймаса-да, босиқлик билан жавоб беради: «Тўғри, ёш болалар ўзларига қилинган ёмонликни унутишмайди. Жумладан, мен ҳам. Аммо бу ичимда қолади. Ота-онамга келадиган бўлсак, улар мен учун бутун бир дунё. Ахир улар бўлмаганида мен дунёга келмасдим».
Балотелли ҳеч бир саволга оддий жавоб бермайди. Эҳтимол, шунинг учундир, кўпчилик у билан суҳбатлашишга интилади. Кўпчилик футболчилар «Ёшликдаги қизиқишим туфайли» қабилида жавоб берадиган «Нега футболни танладингиз?» деган саволга Марио берадиган жавоб ҳам қизиқ, ҳам ўзига хос: «Нима, голфни танлашим керакмиди? Ахир у жуда сокин-ку! Бу мен учун эмас».
БЕРЛУСКОНИ — ҒИРТ АҲМОҚ”
Уни ҳар бир жамоасида бошқа ҳужумчилар билан таққослашади. Марио Балотелли эса бу таққослашларда унинг иқтидорини паст баҳолаганларни, улар ким бўлишидан қатъи назар, аяб ўтирмайди. Хусусан, «Милан» клуби раҳбари Сильвио Берлускони қаҳрамонимизни «Милан»нинг собиқ ўйинчиси Антонио Кассано билан қиёслаб, Кассанонинг маҳоратини юқори баҳолаган. Ўшанда журналистлар бу борада Балотеллининг фикрини сўрашганида, у бундан ҳайратланганини яширмаган ва: «Менимча, жаноб Берлускони ё ўта аҳмоқ, ёки менинг нималарга қодирлигимни ростдан ҳам билмайди», дея фикр билдирган. «Миш-мишлар атрофдагиларга бўлган муносабатимни ўзгартириб юборди. Хусусан, журналистларни ёмон кўриб қолдим. Шунинг учун охирги пайтларда улардан узоқроқ юришга интиляпман». Бу Марионинг сўнгги интервьюларидан бирида айтган гаплари.
Ҳозирда Италиянинг «Милан» клубида тўп сураётган Марио Балотелли гол уришда давом этмоқда, шу билан бирга, футбол мухлисларининг эътиборини тортадиган воқеалардан четда тургани йўқ. Демак, у ҳали-бери тинчимайди.
Низомжон ИСЛОМОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
