"Анвар Ғофуров иши" бўйича ўрганилган ва қўлга киритган айрим маълумотларимиз билан ўртоқлашамиз.
Аввало, регламентда нима дейилган? ОЧЛ-2014 регламентининг "Ўйинчиларни рўйхатдан ўтказиш принциплари" деб номланган 34-моддаси ушбу масалага ойдинлик киритиши керак. Демак, уни ўрганиб чиқамиз.
Ушбу модданинг g)-банди қуйидагича ёзилган:
g) Ўйинчи бир вақтнинг ўзида фақат битта жамоа билан шартнома имзолаши, рўйхатдан ўтиши ва/ёки битта клуб сафида рўйхатдан ўтказилиши мумкин. Футболчи бошқа жамоада рўйхатдан ўтказилиши ёки бошқа жамоа сафида ўйнаши мумкин эмас (қайси давлат клуби бўлишидан қатъи назар). Клуб ўз ўйинчисининг бошқа клуб сафида рўйхатдан ўтмаслиги учун масъул ҳисобланади.
Stadion.uz изоҳи: Бу ерда футболчи бир вақтнинг ўзида икки жамоада рўйхатдан ўтиши мумкин эмаслиги ҳақида гап кетмоқда. Бир клубда рўйхатдан ўтган футболчи йил давомида бошқа клуб билан ОЧЛда ўйнаши мумкин эмаслиги ҳақида ёзилмаган. Анвар Ғофуров "Локомотив" билан ўзаро келишган ҳолда шартномани бекор қилиб, "Бунёдкор" сафига қўшилган. Футболчимиз бир вақтда иккита клуб билан шартномага эга бўлмаган.
34-модданинг i)-банди:
i) Агар футболчи битта рўйхатдан ўтказиш муддати давомида икки клуб сафида рўйхатдан ўтган бўлса ёки ўша давр мобайнида икки клуб сафида ўйнаган бўлса, клубга техник мағлубият ёзилади.
Stadion.uz изоҳи: ОЧЛ саралаш баҳслари бошланишидан 30 кун аввал дастлабки рўйхатдан ўтказиш муддати бошланади ва ўйинлар бошланишига 10 кун қолганда тугайди. Иккинчи рўйхатдан ўтказиш муддати эса гуруҳ босқичидан аввал бошланади. Ғофуров аввал "Локомотив" билан шартномани бекор қилган ва кейин "Бунёдкор" сафида рўйхатдан ўтган. Демак, ушбу банд ҳам бузилмаган.
34-модданинг k)-банди:
k) ОФК ходимлари AFCAS (ўйинчиларни рўйхатдан ўтказиш учун мўлжалланган компьютер дастури) орқали юборилган ҳужжатларни текширувдан ўтказишади. Ҳужжатларида камчилик бўлган футболчиларга рўйхатдан ўтишга рухсат берилмайди. Рўйхатга олинган футболчиларга ОФК мусобақаларни ўтказиш қўмитаси томонидан махсус бейжик тақдим этилади. Рухсатнома яроқсиз ҳолга келиб қолса, уни бошқатдан олиш учун клуб 1000 АҚШ доллари тўлаши шарт (харажатларни қоплаш мақсадида).
Stadion.uz изоҳи: "Бунёдкор" фойдаси учун роль ўйнаши мумкин бўлган банд мана шу. Клуби Ғофуровнинг барча ҳужжатларини ОФКга тақдим қилган ва масъул ходимлар барчасини текширувдан ўтказиб, Ғофуровга ўйнаш ҳуқуқини берадиган бейжикни тақдим этишган.
ОЧЛ регламентида ушбу масалага оид бошқа модда ва бандлар йўқ. Демак, бу борада ОФК регламентни тузишда ноаниқликка йўл қўйган. Бу ҳақда конкрет банд киритиш керак бўлади.
Аслида ОФК кўп томонлама УЕФАдан намуна олишга ҳаракат қилмоқда. ЕЧЛ регламентига биноан эса саралаш босқичида бир клуб сафида ўйнаган футболчи, гуруҳ босқичида бошқа жамоа таркибида ўйнаши мумкин. Балки, ОФК шуни инобатга олган ҳолда, ОЧЛ регламентида аниқ банд бўлмаса-да, Ғофуровга иккита клуб сафида ўйнашга рухсат бергандир.
Ҳозирда ОФК ушбу масалани ўрганиб чиқмоқда. Конфедерация вакиллари "Бунёдкор"дан тегишли ҳужжатларни сўраб олишган ва ҳозирда улар "Ал-Жаиш"га расмий жавоб тайёрламоқдалар. Яқин кунларда ОФКнинг сўнгги қарорини билиб оламиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
