Мана, сизу биз кутган лаҳзалар ҳам етиб келди. Терма жамоамиз учун навбатдаги муҳим имтиҳон ҳисобланмиш Осиё кубоги мусобақаси бошланиб, қизғин палласига кириб ҳам улгурди. Таъкидлаш керак, Австралия яшил майдонларида бўлиб ўтаётган мазкур турнир миллионлар ўйини ишқибозларини зериктириб қўяётгани йўқ.
АВСТРАЛИЯДАГИ ОҚ ҚУШЛАР
Илк ўйинда мезбонлар йирик ҳисобда зафар қучганидан хабарингиз бор. Дастлаб ўз дарвозаларидан тўп ўтказиб юборган австралиялик ўйинчилар якунда бу голга тўрт бор жавоб қайтаришди. Тўғри, Австлария рақиби Кувайт термасидан сезиларли даражада кучли, ғалабага ҳақли ҳам, аммо...
Ҳар доим турли миш-миш ва шов-шув тарқатиб юрадиган интернет нашрларида қуйидаги мазмундаги мулоҳаза пайдо бўлди, яъни мезбонлар сеҳр-жодудан фойдаланаётганмиш. Бу фикрга эса дастлабки ўйин пайтида майдондан учиб ўтган уч ёки тўртта оқ қуш мисол қилиб кўрсатилмоқда. Дарҳақиқат, агар Австралия — Кувайт ўйинини диққат билан кузатган бўлсангиз, ҳақиқатан ҳам, аввал битта, кейин эса икки ёки учта қуш учиб ўтди. Лекин буни жоду дейиш тўғримикин?
ТАХМИНЛАРДА ЖОН БОРДИР, АММО...
Биласиз, футбол ва сеҳр-жоду ўртасидаги боғлиқлик азалдан таъкидланиб келинади. Бугун ҳам шунга ўхшаш мулоҳазалар учраб туради. Хусусан, Бразилияда бўлиб ўтган жаҳон чемпионатида ганалик афсунгар португалиялик ҳужумчи Криштиану Роналдунинг оёғини афсун ёрдамида боғлаб ташлагани ва футболчи умуман ўйнай олмаслигини такрор-такрор айтиб ўтганди. Криштиану Роналду эса унинг фикрини исботлагандек, ёрқин ўйин кўрсата олмаганди. Бу футболчининг ҳолати билан боғлиқмиди ёки чиндан ҳам афсунгарнинг амаллари иш берганмиди, буниси энди қоронғи. Аммо мана шу ҳолатдан кейин кўпчиликнинг миясида «Сеҳр-жоду ўйин сифатига таъсир кўрсата олади», қабилидаги фикр ўрнашиб қолганди. Энди эса сеҳр-жоду борасидаги мулоҳазалар Австралия терма жамоасига қарши билдирилмоқда. Бироқ бу борадаги фикрларни инкор этадиган далилларни истаганча топиш мумкин. Биринчидан, Австралиянинг Кувайт дарвозасига тўртта гол уриши ҳайратланарли эмас, чунки Кувайт Япония ёки Жанубий Корея каби кучли жамоалар сирасига кирмайди. Иккинчидан, ўйин борасида ҳам кувайтликлар ижобий таассурот қолдира олгани йўқ. Учинчидан, мезбонларнинг ҳар тўртала голида ҳам ҳеч қандай ғайритабиийлик сезилмади. Яна ким билади, дейсиз. Эҳтимол, ростдан ҳам Австралияда мезбонларга чемпионликни ваъда қилган бирор-бир афсунгар бордир. Бу саволга кейинги жараёнлар орқали жавоб топишга уриниб кўрамиз.
ТЕРМА ЖАМОАМИЗДАН НУРСИЗ ҒАЛАБА
Ўзбекистон терма жамоаси Шимолий Кореяга қарши кечган матчда кичик ҳисобда ғалаба қозонди. Бизни қизиқтиргани эса орадан шунча вақт ўтган бўлишига қарамай, ҳеч нарсанинг ўзгармагани эди. Тўғри, биринчи ўйин, устига-устак шиддатли ёмғир остида ўйнаш қийин. Лекин таркиб, тактика, самарасиз ҳаракатлар яққол сезилиб қолди. Жаҳон чемпионати саралаш баҳсларида мағлубиятга учраганимиздан кейин мураббийлар штаби ва мутахассислар терма жамоага янги қон олиб киришни мақсад қилганликларини таъкидлашганди. Лекин ҳеч қандай ўзгариш сезилмади. Асосий таркибни яна ўша жисмоний ҳолати ўйинни тўлиқ ўтказишга имкон бермайдиган футболчилар тўлдирганди. Фақат бир жиҳатда ижобий ўзгаришни кўрдик, Сервер Жепаров ажойиб тўп узатишлари билан ёдда қолди. Яна бир ҳолат эътиборимизни тортди, Сервер иккинчи бўлим ўрталаридан кейин бурчак зарбаларини амалга оширишни Санжар Турсуновга топширди. Бироқ Турсунов ҳам кўнгилдагидек ҳаракат қила олгани йўқ.
ТАКТИКАНИ ЎЗГАРТИРИШ КЕРАК
Кўнгилни хира қиладиган яна бир жиҳат тактиканинг ўзгармагани. Майдон марказида узоқ тўп узатишлар, сўнг ўнг ёки чап қанотдан жарима майдончасига ҳаволатиб тўп узатилиши ва охир-оқибат ҳужумнинг самарасиз якунланиши — бу тактика азалдан терма жамоамизнинг оёғига тушов бўлиб келаётганди. Буни қарангки, бу сафар ҳам терма жамоамиз ўйинида худди шу усул ҳукмронлик қиляпти. Шу ўринда ҳақли савол туғилади, мураббийлар штаби футболчилар билан узоқ вақт ишлади, қатор ўртоқлик ўйинлари ўтказилди, наҳотки шунча вақт ичида самарали тактика ўйлаб топилмаган бўлса? Ёки бу терма жамоамиз рақибларини чалғитиш учун дастлабки ўйинда атайлаб совуққонлик билан ҳаракат қилдими? Нима бўлган тақдирда ҳам, тезкорликка, шахсий маҳоратга асосланган янги тактика ўйлаб топилмаса, оғиркарвон футболчиларимиз тезкор жамоаларга қарши довдираб қолиши тайин.
ЁШЛАРГА ЙЎЛ БЕРИНГ, ЁШЛАРГА
Гарчи майдонда узоқ вақт ҳаракат қилмаган бўлса-да, Сардор Рашидов илиқ таассурот қолдира олди. Унинг ҳаракатларида бошқа футболчилардан фарқли ўлароқ, тезлик, маҳорат, шижоат сезилиб турди. Сардорнинг ҳаракатларини кузата туриб шунга амин бўлдикки, бош мураббий агар уни асосий таркибда туширса, ўйнашга кўпроқ имкон берса, ёш ярим ҳимоячимиз кўп нарсага қодирлигини исботлаб бера олади. Фақат бунинг учун Сардор тўлиқ ҳаракат қилиш кўникмасини шакллантириши, Темур Кападзега ўхшаб олтмишинчи дақиқадан кейин ҳансираб қолмаслиги керак.
АСОСИЙ МАҚСАД ГУРУҲДАН ЧИҚИШ ЭМАС...
Терма жамоамиз олдига гуруҳдан чиқиш эмас, ҳеч бўлмаганда финалга етиб бориш мақсад қилиб қўйилган. Шундай экан, биргина кичик ҳисобдаги ғалабадан сармаст бўлиб, тайёргарликни сусайтириб юбориш керак эмас. Қолаверса, Ўзбекистон терма жамоаси Осиё доирасидаги мусобақада гуруҳдан чиққанига шукр қилиб юрадиган даражада кучсиз термалар сирасига кирмайди. Умид қиламизки, буни терма жамоамиз футболчилари ва мураббийлар тўлиқ англаб етишган. Биз эса ҳамюртларимизни ғалаба билан табриклаган ҳолда улардан кейинги матчларда тамомила бошқача ўйин кутамиз. Юқоридаги танқидий мулоҳазалар бесамар кетмаслигини ҳам истаб қоламиз. Олға Ўзбекистон, биз чемпион бўлишга лойиқмиз ва ҳақлимиз.
Низомжон ИСЛОМОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
