Маълумки, бундан икки йил муқаддам шотландиялик афсонавий мураббий сэр Алекс Фергюсон «Манчестер Юнайтед» клуби бош мураббийи лавозимидан кетиб, «нафақа»га чиққанди. Хўш, ўшандан бери у қандай ишлар билан шуғулланяпти, нималар билан банд?
Роналдуни «Олд Траффорд»га қайтариш
As нашри тарқатган хабарларга кўра, ЕЧЛ доирасидаги «Реал»-«Шальке» учрашувидан сўнг Фергюсон ва Роналдулар Мадриддаги ресторанларнинг бирида кечки овқатни биргаликда танаввул қилишди. Нашрнинг маълумотларига ишонадиган бўлсак, шотландиялик буюк мутахассис футболчи билан унинг «Манчестер Юнайтед»га қайтиши хусусида суҳбатлашганмиш. Бу гапларда жон бор-йўқлигини мавсум охирида билиб олсак, ажабмас.
Венгер билан улфатчилик
«Фергюсон билан мунтазам равишда кўришиб турганимиздан мамнунман. Тўғри, илгарилари муносабатларимизда баъзи салбий жиҳатлар бўлган. Лекин, охир-оқибатда биз ярашиб олдик. У ўз жамоаси шаънини ҳимоя қилиш учун баъзида одоб чегарасидан ўтиб кетарди. Албатта, мен ҳам. Бироқ ҳозирга келиб, иккимиз кўпинча бирга овқатланиб, шаробхўрлик қиляпмиз», - деди «Арсенал» устози BBC билан суҳбатда.
Танқидлардан қочиш
«Биз бир йилгина аввал 11 очколик фарқ билан чемпион бўлганмиз. Шунинг учун ҳам «қариб қолган жамоа»ни ташлаб кетганим ҳақида гапиришса, жуда жаҳлим чиқади, - деди Фергюсон «МЮ»нинг ишлари чаппага кетгач.
Сэр Алекс – ўқитувчи
Маълумки, Фергюсон анчадан бери Гарвард бизнес мактаби билан ҳамкорлик қилади ва мутахассис нафақага чиққач, билим юртида бир неча лекциялар ўқишга ҳам улгурди. Аниқланишича, мактаб раҳбарлари Фергюсон билан келишувга эришишганида вақтни инобатга олишмаган. Шунинг учун сэр у ерда хоҳлаган пайтида яна лекциялар ўқийвериши мумкин экан.
«Оскар» тақдимоти
Фергюсон ўтган йилнинг март ойида «Оскар» тақдимоти маросимида пайдо бўлиб қолди. Маросимда уни кўриб қолган журналистлар, табиийки, мутахассисдан уни қайси кинолар қизиқтиришини сўрашди. Фергюсон уларга жавоб берар экан, ўзи ёқтирган фильмлар сирасига «Шамолларда қолган ҳисларим», «Чўқинтирган ота» ва «қидирувчилар» картиналари киришини айтди.
ЖЧ-2018 ҳимоясида
«Ўйлашимча, Россиядан ЖЧга мезбонлик қилиш ҳуқуқини олиб қўйишга ҳеч кимнинг ҳаққи йўқ. Жумладан, Санкт-Петербургда ўтган ФИФАнинг техник конференцияси ҳам олий даражадаги шароитлар остида кечди ва бу орқали Россия ҳар қандай йирик тадбирга муносиб ҳозирлик кўра олишини исботлади. қолаверса, Санкт-Петербург менинг ўзимга ҳам жуда ёқади. Бу шунчаки, фантастик шаҳар», - деди Фергюсон.
«Ким миллионер бўлишни истайди?» лойиҳасида
Фергюсон дунёдаги энг машҳур телешоуларнинг бирида қатнашиб, 32 минг фунт миқдорида пул ютиб олди.
Китоблар нашр қилиш
2013 йил кузида Британиядаги китоб дўконларида Алекс Фергюсон қаламига мансуб автобиография пайдо бўлди. Албатта, бу китоб ўқувчилар томонидан катта қизиқиш билан кутиб олинди. Яна бир ойлардан кейин, аниқроғи, май ойида Фергюсоннинг «Leading» номли янги китоби ҳам пештахталарга чиқиши кутилмоқда.
Кўнгилли ҳордиқ
Ўтган йилнинг январь ойида Фергюсонни Барбадосда суратга олишди. Айтишларича, уни кўркам оролга «Уиган» хўжайини Дэйв Уилан таклиф қилганмиш.
Ишончсизлик
Фергюсоннинг эски дўсти, жаноб Уилан қадрдонининг сирини ошкор қилиб, 2012 йилнинг май ойида журналистлар билан суҳбатлашар экан, сэр Алекс тез орада фаолиятини якунлашни ният қилаётганини айтиб қўйди. Аммо ўшанда унинг гапларини ҳеч ким жиддий қабул қилмаганди.
Мулозаматлар тарқатиш
«Мени Жозе Моуриньо билан қиёслашлари тўғри эмас. У менга нисбатан анча ёш ва келишган йигит. қолаверса, унда Жорж Клуникига ўхшаш ёқимли қиёфа бор».
«Ўйлашимча, Майкл Кэррик - шунчаки, Англиядаги энг яхши ярим ҳимоячи эмас, бутун Англия футболидаги энг яхши ўйинчи».
«Луи ван Галда жароҳатланган футболчилар шунчалик кўпки... Билмадим, шу ҳолатда ундан қандай қилиб юксак натижалар кутиш мумкин?! Энг муҳими, у ажойиб мураббий ва Луининг ишлари ҳали юришиб кетишига шубҳа қилмайман».
Мойесга васийлик
«Олдимда «Реал Сосьедад» варианти пайдо бўлганида, бу ҳақда дарҳол сэр Алекс билан маслаҳатлашдим. У айтдики, бу мен учун антиқа имконият экан. Зеро, унинг сўзларига кўра, британиялик мураббийларни ҳар доим ҳам Испанияга таклиф этишавермайди», - деди Дэвид Мойес янги жамоага келиш олдидан.
Пул ишлаш
Айни пайтда сэр Алекс Фергюсон «МЮ»да клубнинг фахрий элчиси бўлиб ишламоқда. The Guardian нашрининг ҳисоб-китобларига кўра, у ўтган йилги мавсумда 20 кунлик хизмати учун 2,165 млн. фунт миқдорида маош олган. Демак, гарчи Фергюсон ҳозирда мураббий ҳисобланмасада, «МЮ»даги бир иш куни ўртача 100 минг фунтга тўғри келмоқда. Бунақа нафақани ҳар бир қария орзу қилишига шубҳа йўқ. Нима дедингиз?!
И.РАҲИМОВ тайёрлади, "ИнтерСПОРТ" газетаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
