XXIV миллий чемпионатимизнинг 13-тури доирасидаги «Қизилқум» - «Навбаҳор» учрашувида мезбонлар 3:2 ҳисобида ғалаба қозониб, очколарини 20тага етказиб олишди. Мазкур ўйинда навоийликлар ҳужумчиси Баҳриддин Ваҳобов жорий мавсумдаги иккинчи «хет-трик»ини нишонлаб (биринчи «хет-трик»ка у 1-турдаги «Қизилқум» - «Сўғдиёна» учрашувида эришганди), жамоаси ютуғига муносиб улуш қўшди. Айни пайтда Баҳриддиннинг бу йилги ички чемпионатимизда урган голлари сони 14тага етди ва у тўпурарлар рўйхатини бошқармоқда. Шу муносабат билан Ваҳобовдан интервью олдик. Табиийки, суҳбатимиз футболчининг «Навбаҳор»га қарши кечган учрашув ҳақидаги фикрлари билан бошланди.
- Жамоамиз билан тенг кучга эга бўлган наманганликларга қарши кечган баҳс муросасиз ўтиб, голларга бой бўлди. Меҳмонлар яхши ўйин намойиш этиб, ҳаттоки, ҳисобда олдинга ҳам чиқиб олишди. Лекин биз ўз кучимизга ишонган ҳолда тўп суриб, якунда иродали ютуққа эришдик. Ушбу баҳсда 3та тўп киритиб, ғалабага муносиб улуш қўшганимдан хурсандман.
- Ўтган йили «Бухоро»да ўйнаб, бутун мавсум давомида бор-йўғи 2та тўп киритгандингиз, холос. Жорий мавсумда эса «Навбаҳор»га қарши кечган учрашувдан сўнг 13та ўйинда 14та гол урган ҳолда, тўпурарлар рўйхатини бошқариб турибсиз. Бундай сермаҳсулликнинг сири нимада?
- Ўтган йили бухороликлар таркибида кам гол урганлигимнинг сабаби, жароҳатлар панд берганди. Боиси, ўтган мавсумда 3 марта жиддий жароҳат олдим ва бу ўйинларимга ўз таъсирини ўтказди. Қишки йиғин мобайнида ўз устимда астойдил ишлаб, формамни тиклашга ҳаракат қилдим. Бунинг мевасини эса кўриб турибсиз (кулади).
Аммо ўз ўрнида таъкидлаш жоизки, футбол жамоавий ўйин ва голларимда бош мураббийимиз Юрий Лукин ва жамоадошларимнинг муносиб ҳиссалари бор. Масалан, учрашувлар давомида Юрий Павлович керакли кўрсатмаларни бериб, мени гол уришга рағбатлантирса, шерикларим рақиб дарвозаси олдида қулай вазиятларга олиб чиқиб, киритган тўпларимга ассистентлик қилишади. Жумладан, голларимга жамоадошларимдан Вячеслав Шевченко, Шерали Жўраев, Алишер Санаев ва Акмал Рустамов ҳаммуаллифлик қилишган.
- Жорий мавсумда нечта гол уришни мақсад қилгансиз?
- Қанча кўп бўлса, шунча яхши. Тўғриси, ўз олдимга шунча гол ураман, деб мақсад қўймаганман. Ўйинлар давомида юзага келган хавфли вазиятлардан иложи борича самарали тарзда фойдаланишга интиламан. Шунда голларим сони ҳам ўз-ўзидан кўпаяди.
- Клубингизнинг ХХIV миллий чемпионатимизда намойиш этаётган ўйини хусусида нима дея оласиз?
- Ўз майдонимиздаги учрашувларда иложи борича очко йўқотмасликка интиляпмиз ва майдонга ғалаба иштиёқида тушяпмиз ҳамда ижобий натижаларга эришяпмиз. Гарчи айрим сафар ўйинларида ҳам очко олган бўлсак-да, ўзга майдонларда кўнгилдагидек натижага эришолмаяпмиз. Бунга эса менимча, рақибдан бироз чўчиш ҳам сабаб бўляпти. Аста-секин сафар баҳсларида ҳам ижобий натижага эришяпмиз ва иккинчи даврада ҳаммаси ўз изига тушади, деб умид қиламан.
- Жамоада молиявий муаммолар йўқми?
- Йўқ, ҳомийлар ва клуб раҳбарлари маош ҳамда мукофот пулларини ўз вақтида беришмоқда, биздан фақат майдонга тушиб, ўз ўйинимизни намойиш этишимиз қоляпти, холос.
- Жорий мавсум учрашувлари ҳақида нима дея оласиз?
- Бу йилги миллий чемпионатимиз ўйинлари олдинги йилларга қараганда, анча қизиқарли тарзда кечмоқда, қайси клубнинг ғолиб чиқишини олдиндан башорат қилиб бўлмаяпти. Бу эса учрашувларнинг муросасиз тарзда кечишини таъминламоқда.
- Бу йилги ички чемпионатимиз ўйинларининг қизиқарли ўтаётганига келишилган учрашувларга қарши жиддий кураш олиб борилаётганлиги ҳам сабаб бўляптими?
- Албатта, бундан ташқари, олдинги мавсумларга қараганда, олий лигадаги клублар сони ва ўйинларнинг кўпайганлиги ҳам учрашувларнинг шиддатли тус олишини таъминламоқда.
- Сизга ҳам фаолиятингиз давомида келишилган ўйинларда қатнашишни таклиф этишганми?
- Йўқ, футболчилик фаолиятим давомида бундай ҳолатга дуч келмаганман ва бундан кейин ҳам шундай бўлишига умид қиламан.
- Собиқ клубингиз «Бухоро» жорий мавсумни омадсиз ўтказяпти. Сизнингча, бунинг сабаби нимада?
- Тўғриси, жамоадаги ички муаммони билмай туриб, бу ҳақда бирор нарса дейиш қийин. Лекин «Бухоро» яхши стадион ва мухлисларга эга ажойиб клуб ва шундай жамоа олий лигадан тушиб кетса, афсусланарли ҳолат бўлади. Иккинчи даврада клубда ижобий ўзгаришлар юз бериб, «Бухоро» элитадаги ўрнини сақлаб қолади, деб умид қиламан.
- «Қизилқум»нинг олдига бу йил қандай вазифа қўйилган?
- Ўтган йилги натижани яхшилаб, 6-7-поғоналарни эгаллаш вазифаси қўйилган. Ушбу мақсадни амалга ошириш учун қўлимиздан келганича ҳаракат қиламиз.
Маълумот учун
Баҳриддин Ваҳобов
Туғилган санаси ва манзили: 1983 йил 23 январь, Сурхондарё вилояти Денов тумани
Футбол билан 7 ёшидан шуғулланишни бошлаган
Биринчи мураббийи: Эркин Тўраев
Амплуаси: ҳужумчи
Ўйнаган клублари: «Сурхон» (Термиз) - 2002; «Пахтакор» (Тошкент) - 2003-2004, 2012 йилнинг 1-давраси; «Машъал» (Муборак) - 2005-2006 йилнинг 1-давраси; «Тўпаланг» (Сариосиё) - 2006 йилнинг 2-давраси - 2007 йил; «Шўртан» (Ғузор) - 2008 - 2009 йилнинг 1-давраси; «Қизилқум» (Зарафшон) - 2009 йилнинг 2-давраси - 2011; «Бухоро» (Бухоро) - 2012 йилнинг 2-давраси - 2014; 2015 йилдан яна «Қизилқум»да
Оилали, 3 фарзанднинг отаси
Мухлислик қиладиган клуби: «Реал»
Ёқтирган футболчиси: Криштиану Роналду.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
