Роналдуга тегишли Rolls-Royce, Месси ихтиёридаги улкан Cadillac Escalade, Жибриль Сиссенинг ретро-ав-томобили, Салли Мунтари фахри ҳисобланган - «танк»... Машҳур футболчиларнинг қандай автомобиллардан фойдаланишларига қизиқсангиз, қуйидаги фотогалереяга назар солинг.
«Челси» АПЛнинг 2-турида «Манчестер Сити» олдида шунчаки, ожиз кўринди. Ўша ўйиннинг танаффусида алмаштирилган Жон Терри эртасига Instagramдаги саҳифасига яқиндагина харид қилган «тойчоғи» - Ferrari 275 GTB суратини жойлаштирди. 1,5 млн. фунтга баҳоланган машинанинг бошқарув рули ўнг томонда ва бундай марка жаҳонда саноқлидир.
«Манчестер Сити» хавбеки Самир Насри эса янгигина Lambоrghini Aventador Pirelli Edition (нархи 250 минг фунт) билан мақтаниши мумкин. У 2,8 сония ичида 100 километр|соат тезлигини олади. Суратда эса француз футболчиси MonoRover R2 электрон мини-скутери устида турибди.
Яқинда Нью-Йоркдан кўчмас мулк сотиб олган Криштиану Роналдунинг автопаркида чамаси 20та қимматбаҳо машина бор. Уларнинг умумий нархи нақ 5 млн. долларга тенг. CR7 йил бошида ажойиб коллекциясини оппоқ Lambоrghini Aventador билан тўлдирди. Бунинг учун футболчи 379 минг доллар баҳридан кечди. Умуман, «Реал» юлдузи охирги вақтларда оқ рангга маҳлиё бўлиб қолди, чоғи. Март ойига келиб, футболчи 330 минг фунтга оппоқ Rolls-Royce Ghoct сотиб олиб, ўзига яна бир туҳфа ҳозирлади. Айтганча, португалиялик шоввоз баъзан эски автомобиллари билан ҳам сайрга чиқиб туради. Мисол учун, яқиндагина Instagramга Mclaren MP4-12C Spyder ёнида тушган суратини қўйди. Бу машина янги эмас. Аниқроқ айтсак, Криштиану уни 2014 йили 400 минг еврога харид қилган.
Лионель Месси охирги йилларда Maserati туркумидаги спорт машиналарига кўнгил қўйганди. Шунинг учунми, унинг февраль ойида қора рангли улкан Cadillac Escaladeни сотиб олгани кўпчиликни ҳайратлантирди. Бу авто унчалик қиммат эмас - 150 минг доллар. Лекин унинг ичида ҳаттоки, уй кинотеатри бор. Айтганча, АҚШ президенти Барак Обама ҳам худди шу русумдан фойдаланади. Лео янги автомобили билан сайрга чиқишни пайсалга солгани йўқ, аммо 2 нафар мухлисни уриб юборишига сал қолди. Мессининг янги автомобили тез орада яна бир кўнгилсизликка учради. Cadillac шунчалик катталик қилдики, «Барса» базасидаги машиналар тўхташ жойи деворига талофат етди.
Ёрқин юлдуз мақомидан айрилган Эммануэль Адебайор вақти-вақти билан янги ва қимматбаҳо автомобиллар сотиб олиш орқали ўзини овутяпти, чоғи. Баҳорда унинг шахсий коллекцияси нархи 360 мингли Rolls-Royce Phantom Drophead Coupe билан бойиди.
Айни пайт футболда энг кўп маош олувчи ўйинчилардан бирига айланган Асамоа Гьян ҳам яқинда айнан Адебайорникига ўхшаш авто харид қилди. Фақат битта фарқи шуки, уники олтинранг тусда. Буёғини сўрасангиз, ганалик футболчи қўрқмай катта харажатларга қўл уриши мумкин. Ахир у Хитойнинг «Шанхай Шенхуа» клубида ҳафтасига 227 минг фунт миқдорида маош олади.
Златан Ибрагимович ёзда чўнтагини анча енгиллатди. У Стокгольм кўчалари бўйлаб янгигина Porsche 918 Spyderда сайр қилиш учун нақ 845 минг доллар тўлади.
Карим Бензема эса баҳорда 2 ойлик маошини Bugatti Veyronнинг харидига йўналтирди. Французнинг «Реал»да ҳафтасига 150 минг фунт олишини айтсак, машинанинг нархи ўз-ўзидан келиб чиқади. Ушбу болид 427 километр|соат тезлигида «учиши» мумкин. Умуман, Бенземанинг автомобилларга муҳаббати ўзгача. У ўтган йилнинг охирида Ferrari ҳам сотиб олганди.
Гарет Бэйл ёзда бир неча бежирим «тойчоқ»ларда кўриниш берди. Аввалига Lambоrgini Huracan (нархи - 240 минг доллар)ни кўз-кўз қилган уэльслик футболчи кўп ўтмай, Mercedes-Benz SLS AMG (нархи - 148 минг фунт) рулини қўлга олди. Эътиборлиси, «Реал» вакили уларнинг иккисига ҳам бир чақа тўламаган. Чунончи, футболчи AutoVivendi компанияси билан шартномага эга. Хуллас, келишувга биноан, компания Гаретни янги моделлар билан таъминлайди. Тўғри, битта шарт ҳам бор - Бэйл уларда Буюк Британия ҳудудида сайрга чиқа олади, холос.
Уэйн Руни ўтган мавсум охирида миттигина BMW i8ни харид қилди. У комбинацион электродвигатель ва кичик, аммо қуввати биланд бензин двигателларида юришга мўлжалланган. Яхши томони, «Шрек»ка тегишли «тойчоқ»нинг атроф-муҳитга зарари ниҳоятда кам. Нархи эса 105 минг фунт.
Раҳим Стерлинг ўтган йили 125 минг фунтга сотиб олган автомобили - Mercedes C63 AMGни энди-энди йўлга чиқаряпти. Бу модель ҳам юқори тезлик олиши билан ажралиб туради.
«Рубин»нинг кўп йиллик етакчиси Гекдениз Карадениз майдонда ўзини сира аямайди. Шундай бўлгач, унинг дабдабали автога муносиб эмаслигини айтиш қийин-ов...
Обафеми Мартинс 2 йилдан буён MLSда ризқ териш баробарида ўзининг улкан автопаркини тўлдиришда давом этяпти. Мисол учун, яқинда 250 минг фунт баҳридан кечиб, Lamborghini N50m моделига эга бўлди. Ёзда эса, маҳбубаси Эбигэйл Барвуа (Марио Балотеллининг туғишган синглиси)га нархи 140 минг фунтли Merce-des G - Wagonни туҳфа тариқасида берди.
MLSнинг яна бир юлдузи Клинт Демпси эса Ford SVT Raptorга ошиқ. Ушбу «эрмак» унга 100 минг фунтга тушган.
Неймар бу йил «Барселона»нинг ЧЛ финалига чиққани муносабати билан ўзини алоҳида сийлади. Бу сийлов Ferrari California бўлиб, нархи 210 минг еврога тенг.
Украиналик Артём Милевский «Хайдук»да Киев «Динамо»сидагидан анча кам ҳақ олади. Шунинг учун унинг 1,5 йил аввалгидек Ferrariда «учиши» осон эмас. Хуллас, футболчи бу борадаги иштаҳасини бироз пасайтириб, камтарона Smart билан чекланяпти.
Жибриль Сиссе эса доимо алоҳида диди билан ажралиб турган. Автомобиллари ҳам алоҳида таърифга муносиб. Мисол учун, 1968 йили (!) чиқарилган спорт машинаси - Chevrolet Corvettе C3ни олайлик. Француз унинг учун 50 минг евро тўлаган, аммо ҳозирда бу «матоҳ» бебаҳодек кўринмоқда: ўтмишдан сўзловчи ретро-машина.
Нигериялик хавбек Жон Оби Микелнинг гаражидаги автомобиллар сони 8та. Лондонда ҳафтасига 80 минг фунт топадиган футболчи январда россиялик модель Ольга Дьяченко билан танишди ва улар ўртасида илиқ муносабатлар шаклланди. Жон ҳозирда янги маҳбубасини нархи 313 минг долларга тенг Bentley Continental GT русумидаги автода сайрга олиб чиқмоқда.
Ёзда Саудия Арабистонига йўл олган Салли Мунтари ажойиб ва мўмай шартнома («Ал-Иттиҳод» унга 2 йилда 6 млн. евро беради) шарофати билан Mercedes Brabus G63 AMG 6x6 харидига нақ 900 минг доллар ажратди. Бу «тойчоқ» автомобиль эмас, БТР (танк)га ўхшаб кетади...
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
