“Реал” – “Шахтёр” 4:0. Учрашувига оид 25 факт!
Кеча Чемпионлар лигасининг биринчи турида Мадриднинг “Реал” жамоаси ўз майдонида Донецкнинг “Шахтёр” клубини қабул қилиб йирик 4:0 ҳисобида ғалаба қозонди. Furkat.uz сайти ушбу ўйинга оид 25 та қизиқарли фактни эътиборингизга ҳавола этади.
1. “Реал” ва “Шахтёр” жамоалари илк бора расмий учрашувда майдонга тушишди.
2. “Шахтёр” Чемпионлар лигасининг охирги 3 мавсумида илк ўйинда мағлубиятга учрамаган эди. Бу сафар ана шу анъана барҳам берди.
3. “Галактикос” қаторасига тўққизинчи мавсум Чемпионлар лигасини ғалаба билан бошлади.
4. Донецликлар Чемпионлар лигасида 3 ўйиндан бери гол ура олишмаяпти. Ана шу ўйинларда улар 11 та гол ўтказиб юборишди.
5. “Реал” ўз тарихида илк бор дастлабки 4 ўйинда гол ўтказиб юбормади.
6. Учрашувда “хет-трик”ка эришган Криштиану Роналду Чемпионлар лигасидаги голлари сонини 80 тага етказиб олди ва бу борада Мессидан ўтиб кетиб, яққол пешқадамликни қўлга олди.
7. Ўйинда икки марта пенальтидан гол урган Роналду Чемпионлар лигасида 10 ва 11 пенальтиларини аниқ амалга оширди ва бу борада ҳам Чемпионлар лигаси рекордчисига айланди.
8. Криштиану Чемпионлар лигасида бир ўйинда иккинчи бора икки марта пенальти тепди. У ўтган мавсум “Копенгаген” билан баҳсда ҳам икки бор 11 метрлик жарима зарбасини амалга оширган эди.
9. Роналду “Реал” сафида Чемпионлар лигасида урган голлари сонини 65 тага етказди ва бу борда клуб рекордчиси Раулдан 1 та гол орқада бормоқда.
10. Криштиану Чемпионлар лигасида учинчи маротаба “хет-трик” қайд этди. У бундан олдин “Аякс” (2012-йил) ва “Галатасарой” (2013-йил)га қарши ўйинларда ҳам 3 тадан гол урган.
11. Португалиялик ҳужумчи қаторасига тўртинчи мавсум Чемпионлар лигасининг илк турида гол урмоқда.
12. Роналду “Реал” сафида охирги 6 ўйиннинг 4 тасида 3 та ва ундан ортиқ гол урди.
13. Роналду Чемпионлар лигасида 116-учрашувини ўтказди ва “Барселона” афсонаси Карлес Пуйолдан ўтиб кетиб, умумий рўйҳатнинг 8-поғонасига кўтарилди.
14. Роналду фаолияти давомида урган голлари сонини 499 тага етказиб олди.
15. Криштианунинг “Реал”да урган голлари эса 321 тага етди ва у клуб рекордчиси Раулга етиб олиши учун яна иккита гол уриши лозим бўлади.
16. Учрашувдаги биринчи гол муаллифи Карим Бензема “Реал” таркибида ўзининг Чемпионлар лигасидаги 31-голини киритди. У бу борада Раул ва Роналдудан кейинги 3-ўринда бормоқда.
17. Франциялик ҳужумчи Чемпионлар лигасидаги голлари сонини 43 тага етказиб олди ва бу борада Златан Ибрагимович билан бирга 10-11 ўринларни эгаллаб турибди.
18. Бензема ҳам Роналду сингари кетма-кет тўртинчи мавсум Чемпионлар лигасининг илк турида ўз ҳисобига гол ёздириб қўйди.
19. “Реал” ҳимоячиси Пепе клуб таркибида ўзининг Чемпионлар лигасидаги юбилей 60-учрашувини ўтказди.
20. “Қироллик клуби” ҳимоячиси Серхио Рамос Чемпионлар лигасидаги 83-учрашувини ўтказди. Бунинг нимаси ажабланарли дейсизми? У ана шу ўйинларнинг барчасида биринчи дақиқадаёқ майдонга тушган.
21. “Реал” ярим ҳимоячиси Гарет бейл чемпионлар Лигасида майдонга тушган 32 та ўйинининг бирортасида ҳакамлар томонидан карточка билан “сийланмаган”.
22. “Шахтёр” ҳимоячиси тарас Степаненко Чемпионлар лигасидаги дастлабки қизил карточкасини олди.
23. “Шахтёр” посбони Андрей Пятов Чемпионлар лигасидаги 45-учрашувини ўтказди. У бу ўйинларда ўз дарвозасидан 68 та гол олиб чиқди.
24. Пятов Чемпионлар лигасида олтинчи маротаба бир ўйинда тўртта гол ўтказиб юборди.
25. “Шахтёр” ҳимоячиси Дарио Срна Чемпионлар лигасидаги 19-сариқ карточкасини ишлаб олди ва у бу борада жамоа рекордчиси бўлиб турибди. Умуман олганда у мазкур турнир доирасида охирги 8 ўйиннинг 5 тасида огоҳлантирилган.
Фурқат Юсупов тайёрлади
Манба: www.Furkat.uz
Киритилди: 12:41, 17.09.2015. Ўқилди: 5376 марта. Фикрлар: 2 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
