Куни кеча жамоа бош мураббийи клуб матбуот хизмати ходимларига интервью берди.
- Хабарингиз бор, айни пайтда иккинчи йиғинни давом эттиряпмиз. Имкон қадар йиғинлар оралиғида футболчиларга камроқ таътил беришга ҳаракат қиляпмиз. Чунки профессионал футболчи спорт формасини меъёрида ушлаб туриши жуда муҳим. Мени хурсанд қилган тарафи, шогирдларим таътилдан яхши спорт формасида қайтишди. Билишимча, улар таътил пайтида ҳам футбол билан шуғулланиб туришган. Бу яхши албатта. Лекин барибир шунга қарамай, йигитларнинг жисмоний ҳолатини янада яхшилаш борасида ишлаяпмиз. Қиргулида йиғин бошлаганимиздан буён, назорат ўйинлари ўтказишга рухсат бермаяпман. Чунки айни пайтда футболчилар жароҳат олишга мойил бўлади. Бироқ Тошкентга кетишдан аввал 2 та жамоа бўлиб битта назорат ўйини ўтказамиз. Бу режада бор. Шундан сўнг йиғин пойтахтда давом этади. Ҳозирча, "Обод" ва Тожикистоннинг "Истиқлол" жамоалари билан ўйнашимиз аниқ бўлди.
- "Истиқлол" варианти жуда қизиқ...
- Фикрингизга қўшиламан. Ҳақиқатдан ҳам душанбеликлар билан ўйнаш шахсан мен учун ҳам қизиқ. Улар Олий лига жамоаларидан тубдан фарқ қилади. Тажриба алмашамиз. Очиғи, уларнинг ўйини ҳақида тўлиқ тасаввурга эга эмасмиз. Бироқ бўлажак ўйин қизиқ бўлиши аниқ. Тошкентдаги йиғинимизни ташкил қилиб берган мутасаддиларнинг айтишича, пойтахтда табиий чимга эга бўлган майдонларда шуғулланамиз ва ўйинларни ўтказамиз. Албатта бу мени хурсанд қилди. Тошкент шаҳридаги йиғинимиз якунлангач, Фарғонага қайтамиз ва "Ҳоким кубоги" турнирида иштирок этишни режа қилганмиз. Очиғи, ПФЛ кубогида иштирок эта олмасак керак. Режаларимиз бу турнирнинг бўлиб ўтиш вақтига тўғри келмаяпти. Бу борада мураббийлар штаби билан маслаҳатлашяпмиз.
- Андрей Витальевич, "Нефтчи" бу йил хорижда йиғин ўтказадими ?
- Ҳа, бу менинг режамда бор. "Ҳоким кубоги" турниридан сўнг хорижга боришни режа қилганмиз. Бироқ бу ҳали аниқ эмас. Бу борада ҳам музокалар кетмоқда.
- Мухлисларни таркибдаги ўзгаришлар жуда қизиқтирмоқда. Жамоа билан хайрлашганлар ва янги келганлар ҳақида маълумот берсангиз ?
- Акмал Холматов, Рўзимбой Аҳмедов ва Сардор Раҳмоновлар "Нефтчи"ни тарк этишган. Аббос Махсталиев ва Муҳсин Убайдуллаевнинг ижара муддати якунига етган ва "Пахтакор"га қайтиб кетишди. Айни пайтда йиғинимизда янги футболчилардан Сардор Эминов, Илҳом Бойдедаев ва "Насаф"дан келган Ўткир Юсупов шуғулланмоқда. Илҳом Бойдедаев билан оғзаки келишувимиз бор. Ўткир Юсупов эса энди илк машғулотларини ўтказмоқда.
- Бу йил асосий дарвозабон ким бўлади ?
- Дарвозабонлар масаласида ҳам бир тўхтамга келмадик. "Нефтчи" дарвозабонлар мураббийи айни пайтда малака ошириш курсларига кетган. У қайтгач, ҳаммасини ўзи ҳал қилади. Ҳозирча бизда бир қатор вариантлар бор.
- Андриан Кашкавал "Нефтчи"да оз ўйнаган бўлсада, мухлисларда яхши таассурот қолдирди. Лекин якунда ҳимоячи "Нефтчи" билан хайрлашди...
- Очиғи, Кашкавал билан молиявий тарафдан келиша олмадик. Ҳимоянинг бизга қўйган талаблари, бизни қониқтирмади. Ундан ташқари, иккинчи даврада махаллий ҳимоячи Жаҳонгир Меҳмонов Кашкавалдан кучлироқ ўйин кўрсатди.
- Бу йил "Нефтчи"да хорижлик футболчилар кўрамизми ?
- Хориждан келган футболчи махаллий ўйинчилардан бир бош устун бўлиши керак эканлигини ҳамма билади. Ҳозирги чемпионатимизда ўйнаётган легионерларнинг махаллий футболчилардан яққол устун тарафини кўрмаяпман. Тўғри, Россия ёки бирон бир давлатдан футболчи таклиф қилиш мумкин. Бироқ ҳозирги легионерларнинг ўзига яраша талаби бор. Мен музокалар ўтказган аксарият, хорижлик футболчилар агар жамоа ОЧЛда ўйнасагина клубга келишини маълум қилишди. Тўғри, "Нефтчи"нинг асосий мақсади ҳам ОЧЛда ўйнаш. Бироқ улар чемпионатимизнинг мунтазам халқаро майдонларда ўйнайдиган жамоасига келишин айтишди. Шунинг учун бу йил асосан махаллий футболчиларга таянган ҳолда мавсумни ўтказишимиз мумкин.
- Мана кўриб турибсиз, қишнинг совуқ кунлари бўлишига қарамай мухлислар "Нефтчи"нинг хар бир машғулотларига ташриф буюрмоқда.
- Албатта, ажойиб мухлисларимиз бор Биринчи ўринда, "Нефтчи" мухлислари ва уларнинг оиласига соғлик тилайман. Умид қиламанки, улар бизни янги мавсумда ёлғизлатиб қўйишмайди. Ҳали биз ҳам ўз ғалабаларимиз билан Фарғона аҳлини хурсанд қиламиз, - деди "Нефтчи" бош мураббийи Андрей Фёдоров.
"Нефтчи" ПФК матбуот хизмати.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
