Лионел Месси яна қутқарувчи ролида. Беш карра «Олтин тўп» соҳиби Ла Лиганинг 17-туридан ўрин олган «Вилярреал»га қарши ўйиннинг сўнгги дақиқаларида жарима зарбасидан киритган феноменал голи билан «Барселона»ни мағлубиятдан қутқариб қолди. Бироқ Ла Лига чемпионлиги масаласи энди кўпроқ «Реал»нинг ихтиёрида.
«Барса» ушбу ўйин олдидан пешқадам «Реал»дан олти очко ортда бораётган ва Вилярреалдаги ғалаба орқали бу фарқни уч очкогача қисқартириши (мадридликларнинг Клублар ўртасидаги Жаҳон чемпионатидаги иштироки сабаб битта кам ўйин ўтказганини унутмаган ҳолда) мумкин эди.
Бироқ жамоа бунинг учун етарли ўйин намойиш эта олмади. Жароҳати туфайли ушбу тўқнашувда иштирок этолмаган ва «Манчестер Сити»га ўтиши ҳақидаги хабарлар матбуот саҳифаларида тарқалаётган хорватиялик ярим ҳимоячи Иван Ракитичнинг ўрнини португалиялик Андре Гомеш муносиб тўлдира олмади.
«Барса»нинг сўнгги ёздаги барча трансферлари цингари Гомеш ҳам жамоа қийин аҳволда қолганда ёрдам бериш учун олиб келинган эди. Бироқ у ҳам, бироқ яхшироқ кўринаётган Самюэл Умтити, Лукас Дин ва Денис Суарес ҳам каталонияликларни етарлича кучайтира олмади.
«Вилярреал» билан ўйинда италиялик ҳужумчи Никола Сансоне ҳисобни очгач, «кўк-анорранглилар» ҳужум чизиғида Неймар нималардир қилишга уринди, бироқ 11 ўйиндан буён гол уролмаётган бразилиялик ҳужумчи ҳозирда ўзининг энг яхши формасида эмас. Луис Суарес эса яна «йўқолиб қолди» ва ҳамма масъулият Мессининг елкасига тушди.
Месси ўтган мавсумларда кўплаб вазиятларда ўзининг истеъдоди эвазига қатор муаммоларни ҳал қилиб келаётганди. Бироқ ҳозирда каталонияликлар Луис Энрике қўл остидаги ўзининг энг ёмон даврини бошидан кечиряпти ва фақатгина аргентиналик ҳужумчинин истеъдодига таяниб Ла Лигани ютиб бўлмайди.
Ўз навбатида «Вилярреал» ҳам жуда ажойиб ўйин кўрсатди. Ла Лиганинг энг яхши ярим ҳимоячиларидан бири бўлиб турган Бруно Сориано тўпни қўли билан ўйнагани учун пеналти билан жазоланишдан қутулганидан ташқари бутун ўйин давомида «Барса»га тинчлик бермагани билан ҳам йодда қолди. Уни Мани Тригерос ва Жонатан дос Сантос доим қўллаб-қувватлаб турди.
«Вилярреал» ҳозирда шубҳасиз Ла Лиганинг энг кучли жамоаларидан биридир. Ёзда янги мураббий анча кеч тайинланганига қарамай, Фран Эскриба қўли остидаги «сариқ сувости кемаси» турнир жадвалида бешинчи поғонада бормоқда – улар тўртинчи ўриндаги «Атлетико»дан атиги 1 очко, «Барселона»дан эса 5 очкога ортда бормоқда.
«Барселона» эса битта кам ўйин ўтказган пешқадам «Реал»дан беш очкога, иккинчи ўриндаги «Севиля»дан эса бир очкога ортда қолмоқда. Сўнгги икки мавсумнинг иккаласида ҳам, сўнгги саккиз мавсумнинг олтитасида қўлга киритилган Ла Лига чемпионлиги ушбу мавсумда анча йироқлашиб кетди.
«Ла Лига чемпионлиги бизга боғлиқ эмас. Бу кучлироқ жамоа – «Реал»га боғлиқ», дея тан олди Луис Энрике ўйиндан кейин. Албатта, ҳали чемпионлик масаласи ҳал бўлишига анча бор. Бироқ 39 ўйиндан буён мағлубият нималигини билмаётган «Реал» захирадаги ўйинни ҳам ҳисобласа 8 очкога олдинда бормоқда. Бу эса жамоангизда ҳатто Мессидек футболчи бўлса ҳам жуда кўп меҳнат қилиш лозимлигини англатади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
