Барчамиз ўрганиб қолганмиз, янги йил аввалида олдинги 12 ой мобайнидаги натижалар сарҳисоб қилиниб, якуний хулосалар, статистик маълумотлар эълон қилинади. Шунингдек, турли-туман рейтинглар ҳам тузилади. Бундай рейтинглар тузишнинг энг ёқимлиси эса шубҳасиз, ҳужумчилар ва голларга боғлиқлигидир. Россиялик ҳамкасбимиз Андрей Клешенок худди шу ишга қўл уриб, йил давомида нисбатан кўпроқ гол урган ҳужумчилардан терма жамоа тузди.
11. Фёдор Смолов - 31та гол
Рўйхатдан негадир айнан Смоловнинг жой олиши ва рақамларга боғлиқ чалкашликлар мавжудлигини турлича изоҳлаш мумкин. Масалан, рейтингга фақат йил давомида 30тадан ортиқ гол урган футболчилар киритилган. Қолаверса, россиялик ҳужумчилар доим ҳам йилига ўттизтадан ортиқ гол уришмайди ва Смолов буни уддалаган камсонли ҳужумчилардан бири. Рақамларга эса ортиқча эътибор қаратмаган маъқул. Энг муҳими, Фёдор бир қатор таниқли юлдузлар, мисол учун, Лаказетт, Неймар, Белотти, Диего Косталардан кўра яхшироқ натижа кўрсатди. Демак, танлов - адолатли.
10. Пьер-Эмерик Обамеянг - 34та гол
Габон футболи тарихидаги энг яхши ҳужумчи африкалик бошқа ҳамкасбларига қараганда, анча барқарор ва улардан маҳорати билан ҳам яққол ажралиб туради. Обамеянг бир неча мавсумдан бери бир текис ўйин кўрсатаётганини инобатга олсак, у энди фаолиятини янада кучлироқ, янада машҳурроқ клубда давом эттиришга ҳақли. Бунинг устига, Обамеянгнинг ўзи ҳам бобоси (онаси томондан) испаниялик бўлиб, «Реал»га ишқибозлик қилганини тинмай уқтириб, кейинги режаларига сал ойдинлик киритиб берди. Демак, қўрқмай айтиш мумкинки, ёзда у аниқ Дортмунддан кетади. Лекин ҳозирча у - «Боруссия»нинг яққол етакчиси. Ким билади дейсиз, эҳтимол мавсум охиригача ниятига етиб, ниҳоят, тўртинчи уринишда голлари сони бўйича Левандовскидан ўзиб кетар?
9. Антуан Гризманн - 36та гол
Афтидан, дунёнинг энг кучли уч футболчисидан бири саналган Антуан Гризманнга «кўз тегди». Негаки, у ўтган йили баҳорда тўп билан хоҳлаган ишини амалга ошириб, рақиблар дарвозасига кетма-кет гол ураётганди. Бу фантастик сермаҳсуллик Евро-2016га қадар давом этди ва финал ўйинидаги омадсизлик туфайли «Олтин тўп»ни французнинг асосий рақибларидан бири - Криштиану Роналду илиб кетди. Шундан сўнг Гризманнинг фаолиятида ҳам кескин пасайиш кузатилмоқда. У гўё «Атлетико» либосида ўзини ноқулай сезаётгандек...
8. Серхио Агуэро - 37та гол
«Манчестер Сити» шарафини ҳимоя қилаётган тўп-урар ҳужумчининг маҳоратига аслида тан бермай иложимиз йўқ. Бироқ унинг терма жамоадаги ишлари кўнгилдагидек эмаслигини ҳам таъкидлаш лозим. Чунончи, «альбиселесте»нинг ҳужум чизиғида рақобат шунчалик кучлики, натижада Агуэро термадаги кўп вақтини захирада ўтказмоқда. Мисол учун, у 2016 йили туғилиб-ўсган юрти учун атиги битта гол урди. У ҳам бўлса, бечораҳол Панама термаси дарвозасига.
7. Гонсало Игуаин - 39та гол
Албатта, барчанинг ёдида: Игуаин йилнинг биринчи ярмида «Наполи» либосини кийиб олиб, «А» cерияда ҳаммаёқни ағдар-тўнтар қилиб юборди. Айниқса, Италия чемпионати якунланиши арафасида кетма-кет рекордлар ўрнатди. Шу боис, ёз келиши билан «Ювентус» шов-шувли трансферни амалга ошириб, Гонсалони ўз сафига қўшиб олди. Тўғрисини айтиш керак, «Ювентус»даги Игуаин аввалги тўпурарга унчалик ўхшамаяпти. Лекин муҳими, унинг тўп киритиши «кекса синьора»га нақ 15 очко тақдим этди. Боз устига, Игуаиннинг ҳал қилувчи голлари энг принципиал рақибларни очколардан маҳрум қилди.
6. Эдинсон Кавани - 45та гол
Ниҳоят, Ибрагимовичнинг каттакон соясидан халос бўлган уругвайлик ҳужумчи Неаполда ўтган сермаҳсул йилларини ёдга олди ва янги мавсумда Европада ҳаммадан кўп гол урмоқда. Унинг «қайта ёшариши» эса табиийки, парижлик футбол ишқибозларини роса хурсанд қиляпти. Ким билади дейсиз, Кавани агар Унаи Эмери билан жанжаллашиб қолмаганида, бунданда кўпроқ голларни ўз номига расмийлаштирган бўлармиди? Лекин муҳими шуки, ҳужумчи ўзини ҳисобдан чиқариб қўйганларни уялтиришни уддаламоқда.
5. Роберт Левандовски - 47та гол
Польшалик ҳужумчи бежизга дунёнинг энг кучли форвардлари сафида тилга олинмайди. Зеро у ҳар доим барқарор ўйин намойиш қилиб, керакли вақтда керакли жойда пайдо бўлишни билади ва шу сабабли ўз ҳисобига кетма-кет голлар ёзиб қўймоқда. Мана, у сўнгги мавсумда ҳам 47 марта мўлжални аниқ олиб, Германия чемпионатидаги барча рақобатчиларидан ўзиб кетди.
4. Златан Ибрагимович - 50та гол
Рўйхатимизнинг тўртинчи ўрнидаги шахсни ортиқча таърифлаш шарт эмас. Чунончи, 35 ёшда АПЛ тўпурарлари қаторида бориш ҳамманинг ҳам қўлидан келавермайди. Златан эса худди шу ишни уддалаб, мавсум давомида жами 50 марта дарвозабонларни ранжитди. Аҳамиятлиси, голларнинг бари клуб миқёсида урилган бўлиб, Ибрагимович бу борада биргина Мессидан ортда қолди.
3. Луис Суарес - 51та гол
Очиғини айтганда, Луис Суарес - гол «ҳиди»ни сезишда дунёдаги тенги йўқ форвардлардан бири. Лекин Месси билан бир жамоада ўйнаб туриб, уни ортда қолдириш ҳам осон эмас. Уругвайлик футболчи ўтган мавсум аввалида бир тезланиш олди-ю, кейин сал сустлашгандек кўринди. Аммо «Барса»нинг яхши бир томони шундаки, бу ерда марказий ҳужумчи тўп билан керагидан ҳам ортиқ таъминланади. Шу боис, Суарес йилдан-йилга ўз натижаларини яхшилаб бормоқда.
2. Криштиану Роналду - 55та гол
Португалиялик «гол машинаси» ортда қолган 2016 йил давомида ўзи истаган ҳар қандай совринга эга чиқди. Эҳтимол, шунинг учунми, «Олтин тўп»ни қўлига олар экан, фаолиятидаги энг яхшиси сифатида ўтган мавсумни эътироф этди. Ёзда у Анри Делон кубогини боши узра кўтарган португалиялик илк сардорга айланди. Зеро ҳужумчи йил давомида терма жамоаси либосида 13та гол уриб, мамлакати шаъни кўкларга кўтарилишига етарлича ҳисса қўшганди. Афсуски, у терма жамоа ўйинларига чалғиб, клубдаги натижаларини бироз ёддан чиқарди. Бунинг оқибатида, сўнгги йилларда илк бор голларнинг умумий сони бўйича Мессидан ортда қолиб кетди.
1. Лионель Месси - 59та гол
Криштиану Роналдудан бешта ўйин кўпроқ ўтказган Месси азалий рақобатчисидан тўртта кўп гол урди ва шу боис, рейтингнинг биринчи ўрнига жойлашди. Месси, айниқса, кузда ажойиб футбол намойиш қилиб, тўпурар ҳужумчи қандай бўлиши кераклигини барчага кўрсатиб қўйди. Натижани эса кўриб турибсиз: 59та гол ва Месси - дунёда тенги йўқ форвард! Адолат юзасидан эслатиб ўтиш лозим, Лионель анчадан бери ўзида бундай туйғуни ҳис қилмаганди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
