Мана, машҳур Патрик Клюйвертнинг ўғли «Аякс» сафида ўз дебютини нишонлади, Диего Симеоненинг зурриёди - Жованни эса аллақачон «Женоа» учун бири-биридан муҳим голлар уришни бошлади. Мадриднинг «Реал» клубида Зайниддин Зиданнинг бутун бошли оиласи шуғулланмоқда. Soccer.ru сайти Жастин Клюйверт дебюти муносабати билан машҳур футболчиларнинг машҳурликка интилаётган фарзандларига яна бир бора эътибор бурди. Албатта, қуйидаги рўйхатга Каспер Шмейхель ва Денис Черишев кабиларни ҳам киритиш мумкин эди. Бироқ улар анча улғайиб қолишди. Яъни эндиликда таниқли оталари обрўси бу футболчиларга ортиқча босим юкламаса керак. Хуллас, бугун фақат 21 ёшдан кичик йигитчалар ҳақида сўз юритилади.
Жо ван дер Сар («Аякс»; Голландия) - 18 ёш, дарвозабон
Маълумки, «МЮ»да донг таратган таниқли посбон Петер Шмейхелнинг ўғли Каспер отаси изидан бориб, дарвозабонликни танлади ва ўтган йили АПЛ чемпионидек юксак мақомга сазовор бўлди. Бироқ «Лестер»нинг даниялик голкипери аллақачон 30 ёшни қоралаб қолганини унутмаслик керак. «МЮ»нинг яна бир машҳур кипери Эдвиннинг ўғли эса энди 18 ёшини қаршилади ва келажаги ҳали олдинда. Таъкидлаш жоиз, Жо 2013 йили камтарин «Нордвийк»дан «Аякс» академиясига кўчиб ўтди. Айни пайт эса Амстердам жамоаси тизимидаги U-19 жамоаси дарвозасига жавобгар саналади. Клуб бош директори сифатида ишлаётган Эдвин ван дер Сар ўғлининг ҳаракатларига ҳозирча фақат танқидий баҳо бериш билан овора. Чунки собиқ голкипер яхши биладики, ван дер Сар фамилиясиёқ ўғлининг зиммасига оғир масъулият юклайди. Демакки, йигитчани шунга яраша, жиддий тоблаб бориш зарур.
Кристиан Мальдини («Реджина»; Италия) - 20 ёш, марказий ҳимоячи
Италия футболидаги асосий сулолалардан бирини билмайдиган мухлис топилмаса керак. Зеро, Мальдини фамилияси «Милан» клубида шунчалик обрў-эътибор ва ҳурматга эгаки, унинг соҳибларига доимо 3-рақам ишониб топширилади - бу кафоланланган. Кристиан Мальдини - Паолонинг ўғли ёхуд Чезаренинг набираси. У ҳам вақтида «россонерлар» ёшлар жамоасида тўп суриб (3-рақамда, албатта), ҳатто сардорлик даражасига кўтарилган. Аммо ўтган йили ёзда «Реджина» сафига қўшилиб, бу клубдан ижара келишуви асосида Мальтага йўл олди. Табиийки, бундай йўналиш 20 ёшли Кристиан учун унчалик муваффақиятли ҳисобланмайди. Бироқ ташвишланишга ҳожат йўқ: Паолонинг кичик ўғли, 2001 йили туғилган Даниэль айни пайт айнан «Милан» академиясида таҳсил олмоқда.
Найл Киоун («Рединг»; Англия|Ир-ландия) - 21 ёш, марказий ҳимоячи
«Арсенал» клуби шарафини ҳимоя қилиб, 400тадан ортиқ расмий ўйинда майдонга тушган ва афсонага айланган Мартин Киоун зурриёди секин-аста қуйидан юқорига интилмоқда. Қизиғи шундаки, Мартин фаолиятини айнан «Рединг»да якунлаганди. Найл эса барчасини шу клубда бошлади. Кичик Киоун ва «Рединг» ўртасидаги шартнома 2018 йилнинг ёзигача амалда бўлади. Эҳтимол, Найл орзуларига тўлиқ эришиш учун каттароқ жамоа сафига кўчиб ўтиши керакдир? Айтганча, Мартин вақтида Англия миллий жамоаси шарафини ҳимоя қилганди, ўғли эса Ирландия термасини танлади. Билмадик, келажак воқеалари қандай ривожланади-ю, аммо факт шуки, кичик Киоун «яшил қўшин»нинг ёшлар жамоасида бир марта майдонга тушишга улгурди.
Жастин Клюйверт («Аякс»; Голландия) - 17 ёш, қанот ҳужумчиси
Патрик Клюйвертнинг ўғли 2017 йилнинг 15 январида, яъни куни кеча эредивизион доирасидаги ўйин-да илк марта кўриниш берди. Аниқроғи, у «Аякс»нинг «Зволле»га қарши ўйини 39-дақиқасида жароҳатланган Амин Юнес ўрнини эгаллади. Эътиборлиси, кичик Клюйверт отасидек марказий ҳужумчи ролини бажаришни эмас, балки қанотда тўп суришни маъқул кўрмоқда. Чунки Жастин анча тезкор ва айнан қанотда ўзини эркинроқ сезади. Дарвоқе, у бир жиҳат бўйича ҳозирнинг ўзида отасини ортда қолдиришга эришди: эрта дебют масаласида.
Тимоти Веа («ПСЖ»; АҚШ|Либерия) - 16 ёш, ҳужумчи
Жастин Амстердамда тўп сура бошлаган бир вақтда унинг отаси - Патрик «ПСЖ» спорт директори лавозимини эгаллаганча Тимоти Веа ҳаракатларини кузатмоқда. Ҳа, 1995 йили «Олтин тўп» совринини қўлга киритган машҳур Жорж Веа зурриёди Клюйверт назоратида шуғулланмоқда. Тимотининг ҳали ўсмир эканлиги ва ҳозиргача қайд этган натижаларини эътиборга олиб, бемалол тахмин қилиш мумкин: уни порлоқ келажак кутмоқда. Чунончи, йигитча парижликлар сафида ўсмирлар ўртасидаги Чемпионлар Лигаси доирасида «Лудогорец»га қарши кечган битта ўйинда нақ 5та гол уришни эплади. Агар Тимоти худди шундай ривожланиш ва ўсишда давом этса, яна 1-2 йилдан сўнг «кичик Веа» мақомида бутун дунёга танилса, ажабмас.
Ривалдиньо («Интернасьонал»; Бразилия) - 21 ёш, ҳужумчи
Ривалдо ўз ўғли билан битта жамоа - «Можи Мирим»да тўп суришга улгурди. Аммо кейинчалик йигитча отаси қанотидан ажралиб, шахсий фаолиятини мустақил ривожлантиришга қарор қилди. Шу тариқа Ривалдиньо 2015-2016 йиллар мавсумида Португалиянинг «Боавишта»си сафида ўйнади. Лекин бу жамоада ўзини кўрсатишга улгурмай туриб, «Интернасьонал» қизиқишлари доирасига тушди. Қарангки, Бразилиянинг энг илғор жамоаларидан бири ўз тарихида илк марта элитадан тушиб кетгач, айнан истеъдодли маҳаллий ёшлар ёрдамида яна олий лигага қайтмоқчи бўляпти. Табиийки, бу Ривалдиньо учун ўзига хос имкониятдир. Муҳими, йигитчанинг техникаси ҳавасга арзийдиган даражада. Бироқ очиғини айтиш керак, Ривалдиньода отасига хос меҳнатсеварлик ва сабр хислатлари етишмаяпти, чоғи. Эҳтимол, бу камчиликлар улғайгани сари йўқолиб борар...
Энцо Зидан Фернандес («Реал»; Франция|Испания) - 21 ёш, ҳужумкор ярим ҳимоячи
Барчага маълум - Энцонинг отаси айни вақт «Реал» бош мураббийи вазифасини муносиб бажаряпти. Айнан Зайниддиннинг қарори билан Энцо яқинда «Қироллик клуби»да илк расмий ўйинини ўтказди. Қолаверса, у «Қирол кубоги» доирасида «Леонес»га қарши кечган ушбу учрашувда рақиб дарвозасини нишонга олишни ҳам уддалади. Бироқ тан олиш лозим, Энцо 22 ёшга қадам қўяётган бўлса ҳамки, ҳануз «Кастилья» даражасида юрибди. Афтидан, унинг учун ўз бахтини Мадриддан ташқарида қидириб кўриш яхши, шекилли.
Янис Хаджи («Фиорентина»; Руминия|Туркия) - 18 ёш, ҳужумкор ярим ҳимоячи
Янис катта футболдаги фаолиятини Руминиянинг «Виторул» клубида, «Карпат Марадонаси» лақаби билан танилган отаси - Георге Хаджи қўл остида бошлади. Муҳими, йигитчанинг майдондаги ҳаракатлари шунчалик эътиборни тортдики, Европадаги кўпгина машҳур клублар унга дарҳол алоҳида қизиқиш билан қарашди. Даъвогарлар орасида эса Италиянинг «Фиорентина» клуби қатъиятлироқ ва журъатлироқ чиқиб, Янис учун 2 миллион евро сарфлашдан тийилмади. Шундай қилиб, кичик Хаджи ўтган йилнинг октябрида «А» сериясида дебют қилди, яъни «Кальяри»га қарши ўйинда майдонга тушди.
Жованни Симеоне («Женоа»; Аргентина|Испания) - 21 ёш, ҳужумчи
Янис ҳозирча Италия чемпионатида дебютини нишонлаганидан қувониб юраётган бўлса, «Атлетико» мураббийининг ўғли ҳисобланган Жованни «А» сериясида мунтазам равишда майдонга тушиб, «Женоа» учун кетма-кет голлар урмоқда: 18та ўйинда 7та гол. Эслатиш ўринли, туринликлар Жованнини август ойида 3 миллион евро эвазига харид қилишганди. Ҳозирга келиб эса, ёш футболчининг нархи 8 миллионга кўтарилди.
Хорхе Гонсалес Санс («Фордхэм», Нью-Йорк; Испания) - 16 ёш, ҳужумчи
Айтишларича, Хорхе ўйин ҳаракати бўйича отаси - Рауль Гонсалеснинг ўзгинаси экан. Йигитча амалдаги футболчилардан эса, Альваро Мората услубига кўпроқ мафтун. Шунга қарамай, Хорхенинг келажаги ҳақида ҳозирдан бир нарса дейиш қийин. Зеро, у футболдаги илк сабоқларни Мадрид эмас, Нью-Йоркда ўзлаштирди. Marca нашрининг таъкидлашича, Хорхе АҚШ талабалар лигасидаги энг яхши тўпурарлардан бири бўлиб турибди. Айтганча, Раулнинг яна бир ўғли - 13 ёшли Уго «Нью-Йорк Сити» академиясида таҳсил олмоқда. Ким билади, икки ўғлидан бири балки ўзи каби моҳир голеадор бўлиб етишар ҳали...
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ал-Ғарафа
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
