Бразилия терма жамоаси афсоналари Роналдо ва Роналдиньо Esporte Espetacular кўрсатувида иштирок этиб, бошловчининг саволларига биргаликда жавоб беришди.
- Роналдиньо терма жамоага янги келганида қандай маслаҳатлар бергансиз?
Роналдо: - Худди мен сингари у ҳам босим остида қолиб кетганди. Шу боис Роналдиньога: «Хотиржам бўл, сен бизнинг усулимиз, футболимизни шу тариқа кўрсатасан», деганман.
- Роналдиньо, нима учун одамлар сизни яхши кўрадилар?
Роналдиньо: - Бразилияликлар футболни жуда севишади. Омадим келгани - улар ёқтирадиган спорт тури билан шуғулланаман. Бунинг устига, жуда яхши ўйнаганман ва ҳаммага ёқадиган ҳаракатларни амалга оширганман. Бразилияликлар голлар ва дриблингни яхши кўришади. Роналдо иккимиз керакли ўйин характеристикасига эга бўлганмиз.
Роналдо: - Бизнинг «ёқилғимиз» мухлислар бўлган. Албатта, машғулотларнинг ҳам муҳимлигини унутмаслик лозим. Лекин бизни руҳлантирган асосий нарса чиройли ўйинни кутган инсонлар бўлган. Кўпчилик биздек бўлишни истайди. Чунки биз қашшоқ оиладан чиқиб, катта муваффақиятларга эришганмиз. Бу эса инсонларни руҳлантиради. Биз ҳаммасини уддаладикми, демак улар ҳам уддалашлари мумкин.
- Эндиликда халқни Неймар руҳлантирадими?
Роналдиньо: - Неймар иштаҳа ва иштиёқ билан ўйнайди, унинг ҳаракатлари мухлисларга ёқади. Юқорида айтганимдек унда энергия, дриблинг ва голлар бор. Терма жамоамизга айнан шундай йигит етишмаётганди. Эндиликда Неймар бизнинг юзимиз.
- Тите-чи?
Роналдо: - қийинчиликлар юзага келганда, футболчиларда «бор кучимизни ишга солиб, мураббий учун ўйнашимиз керак», деган фикр юзага келади. Агар мутахассис яхши бўлса, ҳар бир футболчининг керакли жиҳатларини олади. Тите эса бунинг уддасидан чиқмоқда.
- Неймар сиздан ўзиб кетиши мумкинми?
Роналдо: - Бу жуда қийин савол. қайси жиҳатларни солиштириш керак? Айнан нималигини билмайман. Лекин шуни аниқ айтишим мумкинки, бу йигит ажойиб ўйин намойиш қилмоқда.
- Тите жамоага яхши иқлим олиб келдими ёки барча гап машғулотлардами?
Роналдо: - Тите ҳеч нима олиб келмади. Чунки терма жамоадаги муҳит ҳамиша яхши бўлган. Дунга бу босимни ушлаб тура олмади. Футболчилар қайсидир вақтда уни тушунмай қолишди. Ахир футбол аниқ фан эмас-ку, у оддий...
Яқинда Титенинг гапларини эшитдим. «Йигитлар қанчалик узоққа боришларини билмадиму, аммо уларга ёрдам бераман», деди. Тите ҳеч қандай тақиқлар қўймайди. У билан кўп бора тортишганман ва гаплашишни билади. Бир сўз билан айтганда, бир гуруҳ одамларни бошқаришга қодир эксперт.
- Роналдиньо, ҳақиқатан ҳам фаолиятингизни якунладингизми?
Роналдиньо: - Айни пайт ҳаётимдан мамнунман. Кўп саёҳат қиляпман ва мусиқа билан боғлиқ бўлган лойиҳаларимни амалга оширяпман. Бундай ритм билан футболга қайтиш қийин. Машғулот қилишга тоқатим йўқ. Машғулот қилмадимми, демак юқори савияда ўйнай олмайман. Лекин фаолиятимни аниқ якунладим, дея олмайман. Бирдан ажойиб таклиф тушиб қолиши мумкин.
- Ҳозирги терма жамоага қай бирингиз яхши киришиб кета оласиз?
Роналдо: - Жезус жароҳат олган. Унинг ўрнини тўлдиришим мумкин эди.
Роналдиньо: - қаранг, у голларни қанчалик соғинган. Роналдони танлайман.
- Қай бирингиз «Барса»да яхши ўйнагансиз?
Роналдо: - Роналдиньо. Чунки у «Барса»да кўп вақт ўйнаган. Мен эса бир йил тўп сурганман, холос.
Роналдиньо: - Дўстим, бу борада сени танлай олмайман. Ҳатто орзу ҳам қилма. Аммо сен икки тарафда ҳам ўйнагансан (Роналдиньо Роналдонинг «Реал»даги фаолиятини назарда тутмоқда).
- қай бирингиз кийиниш хонасида етакчи бўлгансиз?
Роналдо: - Иккимиз ҳам катта таъсирга эга эдик.
Роналдиньо: - Бу одатий иерархия — ўзингдан катталарни ҳурмат қил.
- Кечаларни ким яхши уюштирарди?
Роналдо: - Кечаларда ҳамиша энг яхшиси бўлганман.
Роналдиньо: - Ҳақиқатан ҳам шундай, тортишмайман. Роналдога бу борада тенглашиб бўлмасди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
