«Эвертон» ҳужумчиси Уэйн Руни Англия чемпионати 4-турида лигадаги фаолияти давомида бош ҳакам томонидан 100-марта огоҳлантирилди.
Энг қизиғи, жонажон клубига қайтган «шрек» шу билан АПЛ тарихида 100 марта ёки кўпроқ «сариқ»қа мубтало бўлган иккинчи футболчига айланди.
Ҳа, ҳужумчининг бундай салбий юбилейни иккинчи рақам остида «нишонлагани» ғалати. Ҳарқалай, замонавий футболда ҳимоячилар кўпроқ қўполлик ишлатишга мажбур бўлишади.
Бироқ АПЛнинг сариқ карточка рейтингида олдинги 5та ўринни эгаллаб турган «безори»лар орасида орқа чизиқ вакиллари йўқ! Қойилмисиз?
Хўш, унда жаҳоннинг энг кучли биринчилигида «сариқ» ишлаш бобида кимлар етакчилик қилишмоқда? Марҳамат, «ССФ» нашрининг қуйидаги мақоласи орқали шу ҳақда маълумот олишингиз мумкин.
1-ўрин. Гарет Бэрри («Вест Бромвич») - 119та сариқ ва 6та қизил карточка. Абадий «ёш» Гарет - ҳар қандай ҳакамни чўнтагидан сариқ тусли қоғоз чиқаришга мажбур эта оладиган футболчи. Инглиз йигити майдонда неча дақиқа тўп суришидан қатъий назар, карточкага муносиблигини намойиш қилишни сира пайсалга солмайди. Бэрри позиция бўйича - таянч ярим ҳимоячиси. Демакки, ўйиннинг бориши уни тез-тез қоидага хилоф равишда иш тутишга мажбур этади. Гарет ўзини оқлаш учун битта фактни айтиши мумкин: «Вест Бромвич» вакили фаолиятини чап қанот ҳимоячиси сифатида бошлаган ва майдон марказига кўчиб ўтгач, ҳаммасига бирданига кўникиши қийин кечган. Баррининг жорий мавсум «Альбион» сафидаги дастлабки 3та ўйинда «сариқ»дан тийилгани ҳам диққатга сазовор ҳолат ҳисобланади.
2-ўрин. Уэйн Руни («Эвертон») - 100та сариқ ва 3та қизил карточка. Майдонда чинакам жангчиларга хос характери билан ажралиб турувчи Уэйн Руни ўйин давомида тез-тез ноқулай вазиятларга аралашиб қолади. Қолаверса, курашга чанқоқ ҳужумчи кўпинча рақибларни майдон марказига қадар таъқиб қилиб келади ва ҳаракатлари самара бермагач, шунчаки, қоидани бузади-қўяди.
Болаликдаги севимли жамоаси - «Эвертон»га қайтган Руни илк ўйинларданоқ ўз нонини ҳалоллаб олишга қодирлигини кўрсатди. Англия термасининг собиқ сардори ҳаттоки, «Тоттенхэм»га қарши кечган ва катта омадсизлик билан тугаган уй учрашувида ҳам жамоадошлари орасида яққол кўзга ташланди.
У шунинг баробарида дастлабки 3та ўйинда ҳам сариқ карточка ишлади. Айтиш ўринли, АПЛ регламентига кўра, футболчи ҳар 5та огоҳлантиришдан сўнг 1та ўйинни ўтказиб юборади.
3-ўрин. Ли Бойер (фаолиятини якунлаган) - 99та сариқ ва 4та қизил карточка. «АПЛнинг бош безориси» мақомига асосий даъвогарлардан бири саналган ярим ҳимоячи Ли Бойер бу рейтингда атиги 3-қаторни эгаллаб турибди. Англиялик футболчининг сариқ карточкалар сони бўйича 100талик маррага етишига биттагина огоҳлантириш ҳуштаги етмаган. Бойер нафақат майдондаги «ифлос» ҳаракатлари, балки унинг ташқарисида кўрсатган хурмача қилиқлари билан ҳам танилган.
Ғу-рури баланд футболчи ҳар доим ва ҳар жойда муштлашишдан ўзини тиймаган, ҳаттоки, ўз жамоадошларига ҳам қўл кўтарган. Дейлик, бир сафар Кирон Дайер билан орани муштлар воситасида очиқ қилишга уринган ва у каби дисквалификацияга учраганди. Ли шунингдек, рақибларни аёвсиз қарши олишни хуш кўрарди.
Хусусан, шундай ёндашуви оқибатида Бакари Санья жароҳатга йўлиққанди. Умуман, инглиз ярим ҳимоячиси футбол оламидаги энг асосий «безори»лар рўйхатига бежиз кирмаганини унинг карточкалар борасидаги статистикаси ҳам тасдиқлаб турибди.
4-ўрин. Кевин Дэвис (фаолиятини якунлаган) - 99та сариқ ва 2та қизил карточка. Ҳужумчи Кевин Дэвис ҳисобидаги «сариқ»лар Ли Бойерники билан тенг, аммо унда «қизил»лар 2та оз. «Болтон» афсонаси ҳужум вақти жисмоний кучга таяниб тўп сурарди. Уэйн Руни ижросидаги ўйин услубига хос қайсидир жиҳатлар айнан Дэвис ҳаракатларини эслатиб юборади. Қарангки, айни пайт иккисининг «сариқ гулдаста»си ҳам деярли бир хил. Статистика бўйича айтсак, Кевин Дэвис Англия премьер-лигаси тарихида энг кўп қоида бузган (қўполлик қилган) футболчи ҳисобланади. Адолат юзасидан фақат шуни қўшимча қилиш керак, «Болтон» юлдузининг ўзи ҳам рақиблар қўполлигидан етарлича жабрланган.
5-ўрин. Пол Скоулз (фаолиятини якунлаган) - 97та сариқ ва 4та қизил карточка. Агар «илоҳий қўл» лақаби Диего Марадонага тегишли бўлса, Пол Скоулз «ярим илоҳий қўл» таърифига тўла ҳақлидир. «Манчестер Юнайтед» фахрийси тўпга қўл билан тегинишни хуш кўрарди, шекилли. У бунинг учун 2 марта адолатли равишда жиддий жазоланган ҳам. Мухлислар «Юнайтед»нинг УЕФА суперкубоги доирасида «Зенит»га қарши ўтказган ўйинини яхши эслашса керак.
Ўшанда Скоулз қоидада кўзда тутилмаган усулни қўллагани учун иккинчи сариқ карточкани олиб, майдонни эрта тарк этганди. «Маллавой» ке-йинроқ манкунианликларнинг «Фулхэм» билан ўйинлари чоғи ўз жамоаси жарима майдони ичида дарвозабон вазифасини бажарди. Яъни тўпни қўли билан қайтариб юборди.
Скоулз АПЛдаги 4та қизил карточкасидан бирини шу тариқа олганди. Яна бир факт шуки, «Манчестер Юнайтед» собиқ ярим ҳимоячиси янгиланган «Уэмбли» стадионида майдондан четлаштирилган биринчи футболчидир. Ҳа, кўплаб ижобий кўрсаткичлари орасида шундай ўзига хоси ҳам йўқ эмас.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
