Футзал бўйича мамлакат XXII миллий чемпионати эшик қоқмоқда. Март ойининг сўнгги икки куни янги мавсумнинг биринчи тур ўйинларига ажратилган. Бекободнинг “Металлург” жамоаси футзалчилари ҳам янги мавсумга катта умид ҳамда мақсадлар билан етиб келишяпти.
Чемпионат олдидан metallurtg-pfc.uz мухлисларни қизиқтирган бир қатор саволлар билан жамоа бош мураббийлар штаби ҳамда етакчи ўйинчиларнинг фикрлари билан қизиқди.
Янги мавсумдан умидимиз катта. Хабарингиз бор бу йилдан футзал бўйича Ўзбекистон чемпионати ҳамда мамлакат Кубоги мусобақалари форматлари ўзгарди. Одатда биз қиш ойларида танланган манзилларда йиғилардик ва тур ўйинларини ўтказиб, баҳорнинг дастлабки ойларида мавсумни якунлардик, - деб сўз бошлади “Металлург” МФК жамоаси бош мураббийи Николай Одушев. - Ўзбекистон футбол ассоциацияси ҳамда Профессионал футбол лигасининг янгиланган раҳбариятига мавжуд тизим маъқул келмади. Улар ишга профессионал ёндошиб, чемпионатларимизни ривожланган мамлакатларникига хос тарзда ўтказишни режалаштиришди. Бунинг учун эса аввало ишни клублар инфратузулмасини ривожлантиришдан бошлаш керак эди. Яъни чемпионатда қатнашишни истаган ҳар битта жамоанинг уй ўйинларини қабул қиладиган базаси – спорт иншооти бўлиши лозим. Ҳеч бўлмаганда ижара асосида бўлсин, ўйинларни қабул қиладиган манзили бўлиши керак. Шунга қараб Суперлига жамоалари ҳам сараланганидан хабарингиз бор.
Бекободда Суперлига талабларига жавоб берадиган профессионал клуб аллақачон шаклланганди. Кучлилар сафида шаҳримиз шарафини ҳимоя этадиган бош жамоамиздан ташқари қизларимиз аллақачон Ўзбекистон чемпионати ва кубоги мусобақаларида ўз сўзларини айтиб бўлишган. Икки мавсумдирки, футзал бўйича тузилган “Металлург” жамоаси ҳам Ўзбекистон чемпионати ҳамда Кубоги ўйинларида металлурглар шаҳри шарафини муносиб ҳимоя этиб келаяпти. Бир сўз билан айтганда худди узоқни кўра олгандек Бекобод Суперлига мусобақалари талабларига олдиндан тайёр бўлгандек. Бекободдаги “Ёшлик” спорт мажмуасида футзал мусобақаларини ўтказиш мумкину, аммо уни Регламент талабларига жавоб берадиган ҳолатга келтириш лозим эди. Клубимиз раҳбарияти зудлик билан ички йиғилиш ўтказиб, зални зарур анжомлар билан таъминлаш, жорий таъмирдан чиқаришга киришди. Майдоннинг паркети, футболчиларнинг кийиниш, ювиниш хоналари косметик таъмирдан чиқарилди. Деворлар, потолоклар оқланди. Қисқа фурсат ичида “Ёшлик” спорт зали ўзгача чирой очди. Эндиликда биз қўрқмасдан Ўзбекистон чемпионати ва Кубоги ўйинларини ўтказадиган, талабларга жавоб берадиган иншоотга эгамиз деб айта оламиз.
Мавсум тадоригини январь ойидан бошлаганмиз. Таркибимиз деярли янгиланган. Ўтган йилги таркибдан беш нафар ўйинчимиз қолди. Булар дарвозабон Нодиржон Нишонов, майдон ўйинчилари Жўра Эргашев, Алиакбар Байбурин, Сардорбек Иномжонов ҳамда Тимур Сайдуллаев. Жамоани кучайтириш учун кўз остимизга олиб юрган бир қатор тажрибали, иқтидорли футзалчиларни таклиф этдик. Бир неча йиллар Ўзбекистон чемпионатларида совриндор бўлган, маҳоратли ўйинчиларга мурожаат этдик. Улар бизнинг таклифимизга йўқ дейишмади. Ҳозирги кунда жамоа асосини Аъзам Саидахмедов, Абубакр Усмон, Рамил Алмамедов, Бахтиёр Баратов, Шаҳбоз Аҳмедов, Шерзод Мустафоев, Ихтиёр Ропиевлар ташкил этишади. Шунингдек, Бобир Домлажонов, Одилжон Асанов, Акмал Маруфалиев сингари ёшлар олдимизга қўйилган мақсад юкини тортишга бел боғлашган. Мақсадимиз эса бу йил кучли учликка кириш ва совриндорлар сафидан жой эгаллаш, дейди Николай Матвеевич.
Йигитларимиз жамоа олдига қўйилган вазифани уддалашга қодир, - дейди суҳбатга қўшилган жамоа етакчиларидан бири Аъзам Саидаҳмедов. – Бизда иккита тенг кучли тшртлик шаклланди. Ўз навбатида таркибларга янги ҳаво олиб кира оладиган ёшларимиз бор. Назорат учрашувларида ёшларимизни синаб кўрдик ва улардаги иштиёқ бизни хурсанд этди. Январь-февраль ойларида асосан футболчиларнинг жисмоний тайёргарлигини тиклашга кўпроқ эътибор қаратилган бўлса, март ойидан бошлаб ўйин амалиётини шакллантиришга урғу берилди. Назорат учрашувларида майдонга тушдик. Мамлакатимизнинг амалдаги чемпиони – Олмалиқ шаҳрининг АГМК жамоаси билан иккита кўрик ўйини ўтказиб, иккаласида ҳам кичик ҳисобда, иккидан тўп фарқи билан имкониятни бой бердик – 3:5, 2:4. Биринчи ўйинни эса Тошкентнинг “Пахтакор” жамоасига қарши ўтказдик. Хабарингиз бор, “Пахтакор” ҳам бу йил таркибини жуда тажрибали ўйинчилар эвазига бойитиб олган. Пойтахтликларга қарши ўйинда ҳам тенгма тенг рақобат кўрсатган бўлсакда, ижрода ишларимиз юришмади. Натижа ҳам шунга яраша, мағлубият – 1:5. Ўйиндан ўйинга тўртликларимиз шаклланди. Футболчилар эндиликда бир бирларини майдонда яхши тушуниб ўйнашаяпти. Натижалар ҳам ижобий томонга ўзгармоқда. Тошкентнинг “Локомотив” жамоасини 3:2 ҳисобида мағлубиятга учратдик. Куни кеча эса пахтакорчилардан реванш олдик – 7:1. Кўриб турганингиздек катта мақсадлар йўлида оғишмай меҳнат қилаяпмиз. Мухлисларимизни уялтириб қўймаймиз. Албатта мухлисларимизни Бекободдаги “Ёшлик” спорт мажмуасига таклиф этиб қоламиз. Келинглар, бизни қўллаб қувватланглар, чиройли ўйинларимиздан баҳраманд бўлинг, ўз навбатида сизларнинг қўллаб қувватлашларингиз бизга қўшимча куч бағишлайди.
Эслатиб ўтамиз, мамлакат XXII миллий чемпионати баҳслари уй ва сафар тизимида ўтказилади. Битта турда жамоалар иккитадан ўйин ўтказишади. Жумладан, “Металлург” биринчи турни ўз уйида Фарғонанинг “Нефтчи” жамоасига қарши ўтказади. Ўйинлар 30-31 март санасига режалаштирилган.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
