Жаҳон чемпионатида финал йўлланмасини қўлга киритган илк жамоа номи аниқ бўлди.
Франция ва Бельгия терма жамоалари ўртасидаги учрашувнинг дастлабки 45 дақиқалиги жуда қизиқарли кечди, хавфли вазиятларга бой бўлди. Ўйин бошидан бельгияликлар тўп назоратини ўз томонига олишди. "Қизил иблислар" бир неча марта қизиқарли комбинациялар ташкил қилишди. Баҳснинг 16-дақиқасида де Брюйненинг узатмасидан кейин Азар жарима майдончасининг чап томонида тўпни эгаллади ва зарба берди. Тўп олис устун ёнидан ўтиб кетди. Орадан 3 дақиқа ўтиб Эден яна бир зарба йўллади, аммо бу сафар вазият бор-йўғи бурчак тўпи билан якунланди. Орадан 2 дақиқа ўтиб бельгияликлар ҳисобни очишга яқин келишди. Бурчак тўпи ўйинга киритилган вазиятда тўп Алдервейрельдга келиб тушди. Унинг зарбаси нақ "тўққизлик"га кираётганди, аммо Льорис маҳорат кўрсатиб, зарбани қайтарди.
Бўлимнинг иккинчи ярмида энди французлар хавфли вазиятлар ярата бошлашди. Олис масофадан етказилган узатма натижасида Килиан ўнг қанотдан жарима майдончасига кирди ва нариги томондан ёрдамга келаётган Жируга пас берди. Оливье зарба беришни қойиллатмади.
Баҳснинг 39-дақиқасида Мбаппе жарима майдончасига яширин узатма берди ва Павар дарвозабон билан яккама-якка вазиятга чиқиб кетди. Француз ҳимоячисининг зарбасини Куртуа оёғи билан қайтариб қолди. Агар Павар бироз, кўп эмас, бир қарич баландроқ зарба берганида, тўп аниқ тўрга бориб тушган бўларди.
Иккинчи бўлим бошидаги "стандарт" Дешам шогирдлари учун омадли келди. Бурчакдан етказиб берилган узатмани Умтити бош билан дарвоза томон бурди. Тўп Феллайнига тегиб, рекошет ҳолатни юзага келтиргани учун бўлса керак, Куртуа яқин бурчакдан тўпни ўтказиб юборди.
Мазкур гол иккинчи бўлимнинг бир хил кўринишга олиб келди: Франция бутун жамоа бўлиб ҳимояланди, Бельгия рақиб мудофаасини ёриб ўтишга ҳаракат қилди. Тайм давомида Мартинес алмашириш орқали ҳужум чизиғини кучайтириб борган бўлса, Дешам ҳимояни мустаҳкамлаш пайида бўлди. Баҳс сўнггига қадар бельгияликлар рақиб дарвозаси томон 2та хавфли зарба йўллай олишди. Мертенс ўнг қанотдан берган узатмага Феллайни 11 метрли нуқта устида зарба берди. Тўп шундоққина тўсин олдидан ўтиб кетди. Витсель жарима майдончаси ташқарисидан йўллаган кучли зарбани Льорис муштлари билан уриб юборди.
Қўшиб берилган дақиқаларда эса Франция иккинчи голни уришга яқин келди. Дастлаб Гризманн ва Толиссо томонидан йўлланган зарбаларни Тибо Куртуа қийинчилик билан бўлса-да бартараф этишга муваффақ бўлди.
Шу тариқа, Франция терма жамоаси Жаҳон чемпионатининг дастлабки финалчисига айланди. Бельгия термаси бронза медали учун баҳсда майдонга тушади.
ЖЧ-2018, ярим финал
Франция – Бельгия 1:0 (0:0, 1:0)
Гол: 1:0 – 51 Умтити.
Франция – Льорис, Павар, Варан, Умтити, Люка Эрнандес, Канте, Погба, Мбаппе, Гризманн, Матюиди (Толиссо, 86), Жиру (Нзонзи, 85).
Бельгия – Куртуа, Шадли (Батшуайи, 90), Алдервейрелд, Компани, Вертонген, Витцель, Дембеле (Мертенс, 60), де Брюйне, Феллайни (Феррейра Карраско, 80), Азар, Лукаку.
Огоҳлантиришлар: Азар (63), Алдервейрелд (71), Канте (87), Мбаппе (90), Вертонген (90).
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
