Арманистон футболининг бугунги бош юлдузи Генрих Мхитарян бутун фаолияти давомида ҳеч қачон бу қадар кучсиз рақибга қарши ўйнамаган бўлса керак.
Бироқ натижа... Ҳа, арманлар Европа Миллатлар лигаси доирасида ўз майдонларида Гибралтар терма жамоасига (суратда) 0:1 ҳисобида ютқазиб, «митти» рақибга октябрь ойининг бош «сенсация»чиси бўлиш имконини беришди.
Гибралтарликлар Еревандаги ғалабадан шу қадар илҳомланишдики, яна 3 кундан кейин ўз тарихларида 2-марта расмий ўйинни ўз фойдаларига ҳал қилишди.
Арманистон термаси қандай ютқазди?
Янги турнир - ЕМЛ «шок» ҳолатида - Арманистон термаси ўз майдонида гибралтарлик футболчилар олдида ожиз. УЕФА таркибидаги энг заиф жамоалардан бири Ереванда ўзи учун оламшумул ғалабага эришди.
Ҳа, футбол олами сир-синоатларга тўла. Ахир арманлар гуруҳ аутсайдерига қарши баҳсда анча жанговар таркибга таянишди. Дейлик, Лондоннинг «Арсенал» клуби ярим ҳимоячиси Генрих Мхитарян ҳам илк дақиқалардан майдонда ҳаракатланди. Шунингдек, «Спартак» (Москва)нинг собиқ ҳужумчиси Юра Мовсисян 3 йиллик танаффусдан кейин миллий жамоа сафида кўриниш берди.
Умуман олганда, Арманистон термаси ўйин вақтининг 72 фоизида тўпни назорат қилди, рақиб дарвозаси томон нақ 34 марта зарба йўллади. Шундан 9таси аниқ чиқди, аммо гол йўқ. Хуллас, мезбонлар тўлиқ устунликка эришган бўлсаларда, меҳмонлар голкипери Кайл Голдвин ўз дарвозасини дахлсиз сақлади.
Гибралтар термасига ғалаба тақдим этган гол эса иккинчи бўлим бошида пенальтидан урилди. Бу вазиятда Грайр Мкоян («Алашкерт») жарима майдони ичида тўпни йўқотди ва рақибни қўполлик эвазига йиқитди.
Белгиланган пенальтини кўпчиликка нотаниш Жозеф Чиполина совуққонлик билан амалга оширди. Энди арманистонлик мухлислар Чиполина, Сержант ва Кумбес каби футболчиларни узоқ вақт эслаб юришса керак. Тўғри, кулгу ёки хушкайфият ҳолда эмас, балки алам билан...
Гибралтар термаси учун тарихий натижа
Камтарин миллий жамоа шу тариқа расмий ўйинлардаги илк ғалабасини тантана қилди. Пиреней ярим оролида жойлашган ва Буюк Британия ҳамда Испания ўртасидаги низолар воситаси саналган миттигина мамлакат термаси бунга қадар атиги 2та учрашувда рақибдан устун келганди.
Лекин ҳар икки ютуқ Гибралтарда ташкиллаштирилган ўртоқлик учрашувида расмийлаштирилган. Аниқроқ айтсак, 2014 йили Мальта термасини 1:0 ҳисобида енгишган гибралтарликлар яқинда, яъни март ойида латвияликларни ҳам ягона гол эвазига мағлубиятга учратишди. 0:9, 1:8 ёки 0:7 каби ҳисоблар эса, Гибралтар термаси учун одатийдек бўлиб қолган.
Ҳарқалай, жамоа 3та расмий ўйинни ўта йирик фарқ билан бой берган. Умуман, Гибралтар термаси ФИФА ва УЕФА таркибига тўлақонли аъзо сифатида қўшилгач, Евро-2016 ҳамда ЖЧ-2018 саралаш босқичларида иштирок этди.
Эътибор қаратинг, Европа биринчилиги квалификацияси доирасидаги 10та ўйин ҳам янги жамоа мағлубияти билан тугади. Умумий ҳисоб - 2:56... Гибралтарликлар жаҳон миқёсидаги турнирда ҳам очко ололмадилар: яна 10та ўйин ва 10та мағлубият. Фақат бу сафар голлар нисбати озгина яхшиланди - 3:47.
Айни пайт Гибралтар термасини уругвайлик Хулио Сесар Рибас бошқармоқда. Жамоа унинг бошқарувида Европа Миллатлар лигаси стартида Македония ва Лихтенштейн термаларига тўқнаш келиб, икки ўйинни ҳам бир хил - 0:2 ҳисобида бой берди. Эътиборлиси, гибралтарликлар Еревандаги ижобий натижадан кейин Лихтенштейн термасига қарши жавоб учрашувида ҳам 3 очко олишди ва «D» лигаси 4-гуруҳида 2-ўринга чиқиб олишди. Энди Рибас - Гибралтар футболи тарихидаги асосий қаҳрамон.
Арманларда нима гап?
Табиийки, кутилмаган мағлубият арманистонлик футболчиларга жуда оғир ботди. Айниқса, жамоанинг янги бош мураббийи Армен Гюльбудагянц роса сиқилгандир. Зеро, у терма жамоа бошқарувини сентябрь ойида қўлга олганди. Бунга қадар ишлаган Вардан Минасян Европа Миллатлар лигасининг дастлабки 2 туридан кейин истеъфога чиқишни лозим топди. Арманлар унинг қўл остида ўз майдонларида Лихтен-штейн термасини 2:1 ҳисобида енгиб, сафарда македонияликларга бас келолмагандилар - 0:2.
Диққатга сазовор томони, Генрих Мхитарян ва унинг дўстлари «Гибралтар тарсакиси» аламини гуруҳ пешқадами - Македония термасидан олишди - 4:0 ҳисобида ғалаба қозониб, 3 кун олдинги шармандаликни бироз «ювишди». Дарвоқе, олдинроқ Арманистон термасини италиялик Жанни де Бьязи бошқариши ҳақида хабарлар тарқалганди (у албанларни Евро-2016 финал раундига олиб чиқиш орқали омма эътиборига тушди).
Лекин гап-сўзлар тасдиқланмади ва бош мураббий лавозимига 51 ёшли Гюльбудагянц тайинланди. «Бу натижа - улкан омадсизлик, - дея изоҳлади мураббий «Гибралтар тарсакиси»ни. - Барча масъулиятни ўз зиммамга оламан.
Биз жуда кўп хавфли вазиятлар яратдик, фақат фойдаланиш масаласида омадимиз чопмади. Ўйлашимча, мухлислар «Шарманда» иборасини футболчиларга йўналтиришмади. Ахир йигитлар гол уриш учун борларини беришди, бироқ ўхшамаса қийин экан...». Newsarmenia маълумотларига кўра, ўйин тугаши билан Еревандаги стадионда оммавий муштлашув юзага келган. Чунончи, айрим мухлислар эҳтиросга берилиб, Гибралтар термасини ғалаба билан баралла табриклашган, бироқ бу бошқа фанатларга ёқмаган.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
