РЕФЕРИ ВИДЕОАССИСТЕНТИНИНГ «ФИОРЕНТИНА» ФОЙДАСИ ВА СПАЛ ЗАРАРИГА АРАЛАШУВИ. Италия «А» серияси 24-туридан ўрин толган СПАЛ - «Фиорентина» ўйинида VAR тизимига доир яна бир қатор саволлар юзага чиқди.
Диққат қилинг, мезбонлар бу учрашувда бемалол ғалаба қозонишлари мумкин эди, бироқ якунда видеоассистент тизими туфайли 1:4 ҳисобидаги аламли мағлубиятни тан олишга мажбур бўлишди.
Қанақасига? Ахир ҳисоб флоренцияликлар катта ташаббусга эришишганини кўрсатиб турибди-ку. Гап шундаки, финал ҳуштаги янграшига атиги 15 дақиқа қолганида ҳам, ҳисоб 1:1 эди ва айни лаҳзаларда VAR «Фирентина»га пенальти тортиқ этди, боз устига, СПАЛни тоза голдан маҳрум қилган ҳолда... Sports.ru сайтининг қуйидаги мақоласи шу ўйин тафсилоти ҳақида.
Аслида СПАЛ — «Фиорентина» ўйини жамоаларнинг турнир жадвалидаги ҳолати нуқтаи назаридан оддий мақомга эга эди. Лекин воқеалар ривожига кўра, айни шу баҳс 17 февраль оқшомига белгиланган учрашувлар орасида алоҳида эътибор талаб қилди. Чунончи, Италия чемпионати 24-тури доирасидаги ушбу ўйинда VAR тизими бош ролга чиқди, бор «нюанс»лари билан бўй кўрсатди. Тушунарлики, СПАЛ нисбатан кучли «Фио»га муносиб қаршилик қилиш учун анча тер тўкди ва ўйин охирига қадар 1:1 ҳисобини сақлаб қолиш илинжида эди. Аммо 74-дақиқада реалликка асло тўғри келмайдиган воқеалар кузатилди.
1. «Фиорентина»нинг ёш ярим ҳимоячиси Федерико Кьеза жарима майдони ичига ёриб кирди ва рақиб ҳимоячиси билан тўқнашиб кетиб, майдонга қулади. Бош ҳакам Лука Пайретто бу вазиятда пенальти йўқлигини билдириб, ўйинни давом эттиришга ишора қилди.
2. Рефери ишорасидан сўнг СПАЛ футболчилари дарҳол қарши ҳужумга ўтишди ва ҳаттоки, гол уришни ҳам уддалашди. «Фиорентина» дарвозасини нишонга олган Маттиа Валоти гол қувончини майдон четидаги болакай билан баҳам кўришни ўйлади, чоғи, унга қараб югурди. Хуллас, ҳисоб 2:1 - флоренцияликлар мағлубият ёқасида.
3. Бироқ, лекин, аммо... Меҳмонлар бахтига, футболда энди кўп нарсага қодир ва ҳакам қарорини ҳам бемалол «кесадиган» VAR видеотакрорлар тизими бор. Хуллас, СПАЛ голни тузукроқ нишонлашга ҳам улгурмасидан вазиятга техник восита аралашди ва барчаси бир зумда чаппасига айланди. Яъни маълум муддатдан сўнг таблода 2:1 ўрнига 1:2 ҳисоби порлади. Оддий айтганда, бош ҳакам Лука Пайретто VAR тизими таъсирида мезбонларни карахт аҳволга солган қарорга келди:
А). СПАЛ голини бекор қилди.
В). Мезбонлар дарвозаси томон пенальти белгилади.
Видеотакрорларни қайта-қайта кўрган Пайретто якунда мезбонлар Кьезага нисбатан қоидага зид ҳаракатланишганига ишонч ҳосил қилди. Бу ишонч самараси - СПАЛ дарвозасига 11 метрли жарима зарбаси белгилаш ва унинг голини ҳисобга олмаслик. Ахир мезбонлар голни Кьезага нисбатан ишлатилган қўполлик эвазига бошланган қарши ҳужум якунида уришганди. Кейин франциялик Жордан Верету пенальтини голга айлантириб, кимларгадир тушунарли ва кимларгадир тушунарсиз ҳолатга нуқта қўйди. Алоҳида айтиш керак, Кьезага қўполлик қилинган вақтдан 11 метрли жарима зарбаси тепилгунча 4,5 дақиқа вақт ўтди. Голдан маҳрум бўлиш ва пенальти кўринишида жазоланиш ортидан «шок»ка тушган мезбонлар қолган дақиқаларда ўзларига келолмадилар ва «Фиорентина» ўйин якунига қадар ҳисобни 4:1га етказиб қўйди. Аммо VAR бўлмаганида, «бинафшаранглар» эҳтимолки, 1 очко ҳам ололмасмидилар.
- Одатга кўра, ҳакамлик ҳақида сира гапирмайман. Бугун ҳам сукут сақлайман. Чунки гапиришдан маъно йўқ? — бу видеотакрорлар тизимидан азият чеккан жамоа бош мураббийи Леонарду Семпличичининг сўзлари. Унинг раҳбари - СПАЛ президенти Вальтер Маттиоли аксинча, бор аламини тўкиб солишдан тийилмади: «Бу соф ўғрилик! Биздан ғалабани тортиб олишди. 90 дақиқалик ўйин-даги битта вазиятни 100 йилдан ке-йин қайта кўриб чиқиш мумкинми? Боз устига, иккинчи жамоа гол уришга улгурган бўлса... Энг асабни бузадиган томони шуки, Кьезага қарши қўполлик ишлатилгани шубҳали... Ушбу футболчи бундай вазиятларда нималарни ўйлаб топишга қодирлигини ҳамма билади. Хуллас, шармандалик!» Маттиоли сўзларида ҳақиқат улуши ҳам бор, албатта. Йўқ, VARга эътироз йўқ, ҳакамга эса... Энг асосий эътироз - майли, у пенальти бўлганига шубҳаланган бўлса, ўйинни ўша лаҳзада тўхтатиб, видеотакрорни кўрмайдими? Пайретто эса «ухлаб қолди», оқибатда СПАЛнинг ҳаққоний голини бекор қилишига тўғри келди. Шундай экан, ҳакамнинг қарорига нисбатан мезбонларда кучли нафрат уйғотгани моҳиятан ва мантиқан тўғри. Ҳа, ҳаммаси қоидага мос — Кьеза йиқитилгани видеотакрорларда кўринди ва меҳмонлар ҳақли равишда пенальти тепишди. Аммо СПАЛнинг увол кетган голичи? Демак, ҳакамлар VAR билан ҳамкорлик қилишга ҳали кўникишлари керак. Акс ҳолда, бир томоннинг «куйиб» қолиши бошқа кузатилмаслигига ҳеч ким кафолат беролмайди...
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
