Илҳом Шомуродов. Бу собиқ футболчини нафақат қашқадарёлик футбол ишқибозлари, балки мамлакатимиз футбол шинавандалари ҳам жуда яхши билишади. Илҳом Шомуродовнинг вилоятимиз бош жамоаси – “Насаф”нинг ютуқларига қўшган ҳиссаси жуда салмоқли ва эътирофга лойиқ. Айниқса, унинг муҳим учрашувларда “аждарлар”нинг жонига аро кириши кўпчиликнинг ёдида илиқ таасуротлар қолдирган. Футболчи жароҳати боис, бутсаларини михга илишга мажбур бўлди. «Nasafnews» мухбири Ренат Эрназаров футболчи билан суҳбатлашди.
Илҳом Шомуродов ҳақида қисқача
Туғилган санаси ва манзили: 1984 йил 28 март, Сурхондарё вилояти Жарқўрғон тумани
Футбол билан 7 ёшидан шуғуллана бошлаган.
Биринчи мураббийи: Одил Ҳасанов, Термиздаги футбол-мактаб интернатида таҳсил олган
Амплуаси: ҳужумчи
Ўйнаган жамоалари: «Сурхон» (Термиз) – 2001-2004 йиллар; «Тўпаланг» (Сариосиё) – 2005-2007 йиллар; «Машъал» (Муборак) – 2008 йил. 2012 йил ярим мавсум – “Бунёдкор” жамоасида, 2009 – 2016 йиллар давомида «Насаф»да тўп тепган.
“Насаф”даги фаолияти давомида: Ўзбекистон миллий чемпионатида бир марта кумуш медали соҳиби, 6 карра бронза медали соҳиби, бир мартадан Ўзбекистон Кубоги ва Суперкубоги соҳиби. 2011 йили ОФК кубоги соҳиби. 2012, 2013, 2015, 2016 йилларда “Насаф” таркибида ОЧЛ мусобақаси иштирокчиси.
Оилали, 3 қиз фарзанднинг отаси.
Мухлислик қиладиган клуби: «Манчестер Юнайтед»
Ёқтирган футболчилари: Криштиану Роналду, Лионель Месси ва Уэйн Руни.
2015 йилги Олий лиганинг 23-тури доирасидаги «Насаф» – «Навбаҳор» учрашувида мезбонлар йирик – 5:1 ҳисобида ғалаба қозонишган. Мазкур баҳсда Илҳом Шомуродов дубл қайд этган ва “Насаф”нинг 1000-юбилей голини киритган.
Илҳом Шомуродов сўнгги бор, 2016 йилги чемпионатнинг 13-тур доирасидаги сафарда “Нефтчи”га қарши бўлган учрашувнинг 62-дақиқасида майдонга тушган, ушбу ўйин 2:2 ҳисобида якунланган.
Сўнгги голини эса 2016 йилги чемпионатнинг 3-тури доирасида Қаршида бўлган “Обод”га қарши учрашувда киритган, бу учрашувдаги ягона гол “Насаф”га ғалаба келтирган эди.
Хўш, Шомуродов айни пайтда нима фаолият билан банд. Биз шу ҳақда ва бошқа саволлар билан, “Насаф”нинг собиқ ҳужумчисига мурожаат қилдик.
— Ҳозирги кунда ўзимизнинг туманимиз Жарқўрғонда тадбиркорлик билан шуғулланаяпман. Афсуски, футболдан ўзим хоҳлаганимдан кўра эрта хайрлашишимга тўғри келди. Жароҳатим жиддий бўлмаганда, футболчилик фаолиятимни яна давом эттирган бўлардим. Наилож, тақдир шунақа экан.
— Насаф”нинг тақдири ҳозир ҳам сизга қизиқми?
-Албатта, “Насаф” юрагимнинг бир бўлаги бўлиб қолган. Футболчи сифатида нимага эришган бўлсам, шу клубда эришдим. Шахсан мен “Насаф”нинг тақдирига бефарқ бўла олмайман. Мен учун “Насаф” ҳақидаги ҳар қандай хабар қизиқ. Яхши янгилик бўлса, қувонаман. Ёки тескариси. Собиқ жамоамнинг ҳар бир ўйинини кузатиб боришга ҳаракат қиламан.
— Илк жамоангиз “Сурхон”нинг ўйинларини ҳам кузатасизми?
— “Сурхон”нинг ҳамма ўйинларини кузата олмайман, аммо айрим ўйинларини томоша қилиш учун стадионга тушиб тураман.
— Жиянингиз Элдор Шомуродов сиздан кейин Шомуродовлар номини яна тез-тез тилга олинишига сабаб бўлаяпти, энди унинг дадаси – Азамат акангизнинг армонлари ушалдими?
— Албатта, Элдор ўзининг ҳаракатлари билан оиламиз шаънини ва юртимиз шаънини баланд кўтаряпти. Бу ҳолат биз учун жуда ёқимли. У ҳақда илиқ гаплар эшитсак, ҳаммамизнинг қалбимиз ғурурга тўлади. Азамат акамнинг ёшлигида футболчи сифатида жуда катта орзулари бўлган. Афсуски, жароҳати туфайли футболни эрта ташлашга мажбур бўлган. Ҳаттоки, акамнинг жароҳати туфайли мени футболга боришимга онам қаршилик ҳам қилган, “битта оилага, битта футболчи етади", деб. Лекин дадам мени қўллаб-қувватлаганлар. Мана энди Азамат акамнинг кўнгли тўқ, ўзининг орзулари ҳам ўғли Элдор орқали ушалмоқда.
— Бизга маълумки, Элдор Муборакнинг “Машъал” клуби академияси тарбияланувчиси ҳисобланади. Уни шу академияга илк марта етаклаб келган инсоннинг кимлиги, ҳамма учун қизиқарли…
— Элдорни илк марта “Машъал” академиясига олиб келган мутахассис, айни пайтда “Шўртан” футбол клубида раҳбарлик қилаётган Виктор Георгиевич Алешников бўлади. Виктор Георгиевич ўша пайтда селекционер бўлган ва Элдордаги иқтидорни олдиндан пайқай олган.
— Элдорга оила аъзоларингиздан ким кўпроқ насиҳат қилади?
— Ўзингиз ҳам биласиз, бизнинг оиламизда ҳамма футболнинг ишқибози ва футболни яхши тушунишади. Оила аъзоларимиз тўпланганда, суҳбатнинг аксарият қисми фақат футбол ҳақида бўлади. Элдорни ҳаммамиз бунданда катта ютуқларга эришишини жуда истаймиз. Шунинг учундир унга ҳамма ўзининг маслаҳати ва насиҳатини аямайди. Элдор кўпинча мен билан мулоқот қилади ва тез-тез фикр алмашиб турамиз.
— Сизга маълум, Элдорга Европа клубларидан қизиқиш жуда катта, агар сир бўлмаса унинг кейинги жамоаси қайси бўлиши мумкин?
— Элдорга Германиянинг “Штутгарт” клуби асосий давогарлардан бири бўлиб турибди, аммо “Ростов” трансферга рози бўлмади. Улар ёзда яна ҳаракат қилишмоқчи. Бундан ташқари ҳам унга бошқа клублардан қизиқишлар бор.
— Биз биламиз, Отабек акангизнинг ҳам ўғли – Ойбек Шомуродов, “Бунёдкор” академиясининг тарбияланувчиси ҳисобланади, у ҳақда ҳам маълумот берсангиз.
— Ҳа, Отабек акамнинг ўғли Ойбек 2012 йилдан буён “Бунёдкор” футбол академиясида таҳсил олади. Ойбек ҳозир 16 ёшда (2003 йил 20 ноябрда туғилган). У ҳозир “Бунёдкор”нинг ўринбосарлари жамоасидан жой эгаллаш учун ҳаракат қилаяпти. Ҳаракатлари яхши, умид қиламиз ундан ҳам яхши футболчи етишиб чиқади.
— Фарзандларингизнинг бири ўғил бўлганда, футболчи бўлишини ҳоҳлармидингиз?
— Албатта хоҳлардим, аммо мажбур қилмасдим. Бизнинг оилада шундай, ҳеч кимни футболчи бўлишига мажбурлашмайди, балки ўзида қизиқиш ва интилиш бўлса, қўллашади. Аммо мен ҳозир уч нафар қиз фарзандимни тарбия қилаяпман. Аллоҳга шукур, бахтиёрман. Қизларимдан биронтаси ҳали футболчи бўлишини айтмади (кулади).
— Собиқ ҳужумчи сифатида фикрингизни айтсангиз, яхши ҳужумчи бўлиш учун нима керак?
— Биласизми, мен ҳам бу ҳақда умумий қилиб айтишим мумкин. Яхши ҳужумчи бўлиш учун тинимсиз меҳнат қилиши керак, албатта талант ҳам бўлиши керак. Яхши ҳужумчида маънавият ҳам яхши бўлиши керак. Энг муҳими, орзу қилишни ва унга эришиш учун интилишни билиши керак.
— Олимпия терма жамоамиз ўйинларини кузатиб бораяпсизми? ОТЖнинг бу чемпионатдаги имкониятлари ҳақидаги фикрингиз.
— Албатта кузатиб боряпман. Дастлабки ўйинда ҳаяжон бўлди, яъни совуққонлик етишмади. Иккинчи ўйинда улар анча ўзларига келиб олишди ва имкониятлари даражасида тўп тепишди. Ўйлайманки, эндиги ўйинлари ўтганларига кўра ҳам яхши чиқади. Биз жуда-жуда хоҳлаймиз ОТЖнинг олимпиада йўлланмасини қўлга киритишини. Бунга уларнинг имкониятлари ҳам салоҳияти ҳам етарли деб, ҳисоблайман. Уларни барча оила-аъзоларимиз билан телеэкран орқали қўллаб-қувватлаб турамиз. Ишонамизки, укаларимиз буни уддалашади.
— Самимий суҳбат учун катта раҳмат.
Ренат Эрназаров суҳбатлашди.
Жалолиддин Қобилжонов
Фурқат Қурбонов
Ҳасанали ота
Яҳёхўжа Улуғхўжаев
Холис таҳлилчи блоги
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
