Ўзбекистон Республикаси Президентининг 2019 йил 4 декабрдаги ПФ-5887-сонли “Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида”ги фармони ижросини амалда бажарилишини мониторинг қилиш ҳамда Вазирлар Маҳкамасининг 2020 йил 22 майдаги 311-сонли “Ҳудудий футбол ассоциациялари фаолиятини янада қўллаб-қувватлаш чора-тадбирлари тўғрисида”ги қарори ижросини таъминлаш ва мавжуд камчиликларни аниқлаш ҳамда бартараф этиш, спортнинг футбол турини юртимизда юқори босқичга олиб чиқиш мақсадида, бугун Ўзбекистон футбол ассоциациясининг Бахтиёр Ширинов, Маъмур Саидқосимов ва Маъмур Султановлардан иборат ишчи гуруҳи Наманган вилоятига ташриф буюрди.
Ташрифнинг дастлабки қисмида Наманган шаҳридаги “Марказий” ўйингоҳнинг анжуманлар залида вилоятдаги туман ва шаҳарлардаги футбол мактаблари мураббийлари иштирокида йиғилиш ўтказилди.
Унда Наманган вилоят футбол ассоциацияси биринчи вице-президенти Шуҳрат Мирхолдиршаев ҳамда ЎФА вакиллари ҳам иштирок этишди.
Йиғилишда ҳозирги кунда ҳудудларда футболни ривожлантириш борасида амалга оширилаётган ишлар хусусида сўз юритилди.
Мураббийларга айни пайтда яратилган қулай имкониятдан фойдаланган ҳолда, ўз устиларида ишлаш таъкидланиб, Наманган иқтидорли футболчиларга бой вилоят эканлиги, бир пайтлари вилоятимиздан Ўзбекистон миллий терма жамоаси етакчилари бўлган Анвар Солиев, Хайрулла Каримов, шунингдек, ўзбек футболида муносиб из қолдирган маҳоратли ҳужумчи, 2 марта миллий чемпионатимиз тўпурари бўлган, айни пайтда НФА биринчи вице-президенти сифатида фаолият юритаётган Шуҳрат Мирхолдиршоевлар етишиб чиққанлиги, миллий термамизнинг айни пайтдаги сардори Одил Аҳмедов ҳам Наманган фарзанди эканлиги, келажакда шундай футболчилар етишиб чиқиши учун тинимсиз меҳнат қилишлари лозимлиги уқтирилди.
Шунингдек, ЎФА томонидан фаоллик кўрсатган мураббийлар йил якунларига кўра, рағбатлантиришлари эътироф этилди.
Йиғилиш сўнггида жойларда фаолият юритаётган мураббийларни қандай муаммолар қийнаётганлиги ва мавжуд камчиликлар ҳақида маълумотлар ўрганилиб, келгусида бу каби камчиликларни бартараф этиш борасида иш олиб борилиши маълум қилинди.
Наманган вилоятида фаолият юритаётган ҳамда ўтган вақт давомида фаоллик кўрсатган беш нафар мураббийга Ўзбекистон футбол ассоциациясининг ташаккурномаси ва машғулотлар ўтказиш учун керак бўладиган инвентарлар совға қилинди.
Ташрифнинг иккинчи қисмида ишчи гуруҳ аъзолари “Паҳлавон” спорт мажмуасида Наманган вилоят футбол ассоциацияси учун ажратилган бинода амалга оширилаётган таъмирлаш ишлари билан танишишди.
Шундан сўнг, ЎФА делегацияси вакиллари Чортоқ туманидаги “Марказий” футбол мактаби тарбияланувчиларининг машғулотлар жараёнини томоша қилишди.
Машғулотлар якунлангач, ЎФА ходимлари ёш футболчилар билан суҳбатлашиб, уларнинг орзулари билан қизиқишди.
Вилоятимизга амалга оширилган ташриф сўнггида ишчи гуруҳ аъзолари Наманган вилоят маҳорат мактабига қарашли спорт иншоотларини кўздан кечириб, тез орада фойдаланишга топшириладиган маҳорат мактабида амалга оширилган ишларга юқори баҳо беришди.
“Навбаҳор” ПФК матбуот хизмати.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
