Бугунги футболнинг энг шов-шувли мавзуси, шак-шубҳасиз, Лионель Мессининг “Барселона”дан кетишга қарор қилгани. Тўғри, Лео раҳбариятдан норози бўлган пайтлари аввал ҳам “кетаман”га тушиб қолган, аммо бугунги вазият жуда жиддий.
ПИЧОҚ СУЯККА ҚАДАЛДИ
Месси жуда кўп ҳолатларда раҳбариятдан ҳафсаласи пир бўлган, афтидан, Бартомеунинг қарорлари Мессининг ишончини сўндирган. Эрнесто Вальверде билан ўтган омадсиз мавсумдан сўнг унчалик машҳур бўлмаган ва мақташга арзигулик натижага эришмаган Кике Сетьеннинг олиб келиниши ҳам Мессининг футболчи учун аҳмоқоноа қарор эди, аслида. Аммо Лео кутди. Вазият яхши томонга ўзгарар деб ўйлади. Бироқ раҳбариятнинг Неймар борасидаги ҳафсаласизлиги, футболчилар харид қилишдаги беқарорлик ва буларнинг самараси ўлароқ “Бавария”дан учралган шармандали мағлубият клубдаги муҳит жуда оғир аҳволда эканлигини кўрсатиб қўйди. Аксига олиб, Рональд Куман ҳам Месси билан гаплашганида ҳеч бир футболчи жамоадан устун тура олмаслигини таъкидлади. Месси тушундики, “Барселона” яна ўзи хоҳлаганидек жамоага айланиши даргумон. Энг кутилмагани, Рональд Куманнинг Суарес билан хайрлашишга қарор қилгани бўлди (хориж ОАВга кўра, Куман бу борада уругвайлик ҳужумчи билан бафуржа гаплашиб олади). Тасаввур қилинг, жамоанинг ҳужум чизиғида етарлича муаммо юзага келган бир пайтда мураббий асосий ҳужумчилардан бирини кераксиз, деб турса... Бу қарордан кейин Месси Куманнинг ақли жойида эканлигига ҳам шубҳа қилиб қолган бўлса, не ажаб...
ТЎЛИҚ ЯНГИЛАНИШ
Куман жамоани тўлиқ янгиламоқчи. Пойдеворигача. Табиийки, Месси таркибда бўлган пайтда клубни тўлиқ янгилаш Куманга қийинчилик туғдиради, чунки Лео бош мураббийга ўз норозилигини бемалол айта оладиган даражага чиқиб бўлган. Эҳтимол, Куман тўлиқ мустақилликка эришиш учун Мессидан воз кечишга қарор қилгандир. Эҳтимол, шунинг учун “ичидагиларни мураббийга топ тортмай айтадиган” Суаресни кераксиз деб ҳисоблагандир. Шунинг учун ҳам бош мураббийга эътироз билдира оладиган даражага чиқмаган ва Куман нима деса, жон деб бажарадиган Бретуэйтнинг Каталонияда қолиши кафолатлангандир. Ҳатто Бретуэйт Мессининг рақамига “кўз олайтира” бошлагани ҳақида ҳам хабарларни ўқидик.
Мессисиз “Барселона” тамом бўладими? Йўқ, албатта. Месси ҳам оддий одам, яъни яна кимдир унинг ўрнини босиши мумкин. Ёки “Барселона” бир-икки етакчига эмас, жамоавий ўйинга асосланган клубга айланар. Аммо бунинг учун камида икки-уч йил вақт керак бўлади. Куман жуда оғир, лекин керакли йўлни танлади — жамоада авлодлар алмашинуви юз беради энди. Фақат клубдан кетаётган футболчиларнинг ўрнига муносиб номзодлар топилиши керак. Масалан, “Барселона” Суареснинг ўрнига Иммобилени олиб келмоқчи эканлиги ҳақида хабар тарқалди. Бу тўғри қарор эмас, чунки Чиро ҳам ёши ўтиб бораётган ҳужумчи. Марҳамат, мақсад жамоани ёшартиришми, ёшроқ иқтидорларни излаб топиш керак. Лекин шуниси аниқки, Мессисиз “Барселона”га жуда қийин бўлади.
АЗАЛИЙ САВОЛНИНГ ЖАВОБИ
Мухлислар ўртасида айланаётган “Месси бошқа жамоада ўйнай оладими?” деган савол ечимини топади, шекилли. Фикримча, Лео “Манчестер Сити”да “портлайди”. Сабаби, унга “Барселона”да етишмаётган фигура Манчестерда бор. Бу Пеп Гвардиола. Бир пайтлар Златаннинг ўрнига Мессини танлаган Гвардиола аргентиналик футболчининг карьерасида муҳим ўрин тутади. Мессининг миясида айланаётган ғоялар, тактикаларнинг ярми Гвардиоланинг миясида ин қурган. Агар бу ғоялар бирлашса, у ёғини тасаввур қилаверинг.
Ўз навбатида Гвардиола “Барселона”дан кетганидан кейин “қуролини йўқотган овчи”га ўхшаб қолди. “Бавария”да ҳам, “Манчестер Сити”да ҳам унга фикрларини тўлиқ англаб, амалга оширадиган футболчи етишмади. Шу боис ҳам ЕЧЛ ғолиби бўлиш бўйича устаси фарангга айланган Пеп “Барселона”дан кейин ушбу совринга яқинлаша олмаяпти ҳам. Мессининг келиши эса Гвардиоланинг миясида мудраб қолган ҳужайраларни-да ғимирлатиб юборади. Месси ўзи истаганидек янги жамоасида яна “Олтин тўп” соҳиби бўлиши мумкин. Қолаверса, АПЛ янада қизийди. Эҳтимол, Месси ўтса, “шаҳарликлар” мутлақ гегемонга айланади, деб ўйлаётгандирсиз. Йўқ, асло. Шунчаки рақобат янада кучаяди, аммо АПЛ биргина футболчи, ҳатто у Месси бўлганда ҳам рақобатни ўлдириб юборадиган чемпионат эмас. Агар Месси ПСЖга ўтганида бемалол Франция чемпионатида рақобат бутунлай ўлди, дейиш мумкин бўлар (ёки “Ювентус”га ўтса, А Серияда), бироқ АПЛ умуман бошқа даража.
Месси айни дамда тўғри йўлдан кетмоқда. “Барселона”ни тарк этиш ва “шаҳарликлар” сафига ўтиш — энг мақбул йўлдек кўринмоқда. “Манчестер Сити” Месси учун “порлоқ йўл совхози”га айланадими? Трансфер ҳал бўлсин, ҳаммасини кўрамиз...
Низомжон ИСЛОМОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
