Stadion.uz ўз критериялари бўйича гранд клублар тарихидаги энг сермаҳсул футболчиларни аниқлашда давом этади. Бундан аввалги сонларимизда «Барселона» ва «Реал Мадрид» клубида тўп сурган футболчилар ҳақида фикр алмашган эдик. Энди навбат Англиянинг энг кучли клубларидан бири саналган «Ливерпуль» жамоасига!
Аслида, клуб тарихидаги энг кўп гол киритган футболчини аниқлаш қийин эмас. Шу боис, биз ғолибни аниқлашнинг бироз ўзгачароқ услубини танладик. Унга кўра, клуб сафида 25 тадан кам ўйин ўтказмаган футболчиларнинг ўртача бир ўйинда нечта гол киритгани асосий мезон сифатида танлаб олинади. Шу тариқа, қайси футболчи жамоа учун энг фойдали бўлганини аниқлашга уриниб кўрамиз.
Тони Хейтли
Голлари сони:28
Ўтказилган ўйинлар сони:54
Ҳар бир ўйинда ўртача голлар сони:0,52
Англиялик ҳужумчи клуб сафида атиги бир ярим мавсум тўп сурган холос. 1967/68 йилги мавсумда қаҳрамонимиз 54 та ўйинда майдонга тушган ўз ҳисобига 28 та гол ёзиб қўйган. Шунингдек, унинг фаолияти давомида «Челси», «Астон Вилла» сингари бошқа жамоалар ҳам бўлган. Ҳужумчи ўша клубларда ҳам ўзининг сермаҳсуллиги билан ажралиб турган десак, адашмаган бўламиз. Ўзини жуда яхши намойиш этган бўлсада, Бил Шенкли томонидан кераксизга чиқарилади.
Майкл Оуэн
Голлари сони:158
Ўтказилган ўйинлар сони: 297
Ҳар бир ўйинда ўртача голлар сони:0,53
Майлкни мухлисларга ортиқча таништиришнинг ҳожати йўқ. «Ливерпул» сафидаги ўйинлари сабабли «олтин тўп»га лойиқ кўрилган ҳужумчи 1996-2004 йиллар оралиғида «мерсисайдликлар» шарафини ҳимоя қилган. Шу вақт орасида, у 297 та ўйинда иштирок этишга улгурди. Аслида, бу кўрсатгич бундан ҳам кўпроқ бўлиши мумкин эди, аммо жароҳатлар ҳужумчига ўзини тўлиқ кўрсатишига тўсқинлик қилади.
Рожер Хант
Голлари сони:167
Ўтказилган ўйинлар сони: 299
Ҳар бир ўйинда ўртача голлар сони:0,56
Афсонавий инглиз футболчисини бугунги авлод мухлислари яхши танимаслиги аниқ. Хант нақд 11 йил давомида «Ливерпуль» клубида тўп тепган. Шунингдек, Англия терма жамоаси билан биргаликда ЖЧда ғалаба қозонди. Рожер «қизиллар» сафида 2 та чемпионлик, 3 та кубок ва 3 та супер кубокда зафар қучди. 1958-1969 йиллар оралиғида у жамоа сардори даражасига қадар кўтарилди.
Фернандо Торрес
Голлари сони:81
Ўтказилган ўйинлар сони: 142
Ҳар бир ўйинда ўртача голлар сони:0,57
«Ливерпул» клуби «Атлетико Мадрид» ҳужумчиси учун катта пул тўлаганида, кўплаб нашрлар ушбу трансферни омадсизликка учрашини тахмин қилган эди. Торрес эса, барча танқидчиларни уялтириб қўйди. 2007-2011 йиллар орасида қаҳрамонимиз рақиблари дарвозасини 81 бор ишғол қилди ва АПЛнинг энг яхши тўпурарига айланди. Шунингдек, у терма жамоа сафида Европа чемпионлиги ва Жаҳон чемпионлигини нишонлади. Афсуски, «Челси» билан тузилган шартнома сабабли уни «Ливерпул» кечира олмади.
Дан Олдриж
Голлари сони:62
Ўтказилган ўйинлар сони: 101
Ҳар бир ўйинда ўртача голлар сони:0,61
Ян Раш «Ливерпуль»ни тарк этгач, 1987 йилда клуб ирландиялик Олдрижни клубга жалб этди. Ҳужумчи атиги икки мавсум тўп сурган бўлсада, рақиблар дарвозасини 61 бор ишғол қилишга муваффақ бўлди. Эътиборлиси шундаки, у қисқа муддатда мухлисларнинг ёқимтойига айланиб олади. Шу боис, аср сўнггида ўтказилган клуб тарихидаги энг кучли футболчилар ўртасидаги сўровномада унинг номи тилга олинган. Тўғри, якунда у кучли юзталикда қолиб кетди, аммо уни «Ливерпул» мухлислари ҳали-ҳамон хотирлашади.
Луис Суарес
Голлари сони:82
Ўтказилган ўйинлар сони: 133
Ҳар бир ўйинда ўртача голлар сони:0,62
Луис ҳақида ҳам ортиқча таъриф бериш шарт эмас. Уругвайлик футболчи билан биргаликда «Ливерпуль» узоқ кутилган чемпионликни нишонлашга жуда яқин келган эди, бироқ Жеррарднинг сирпаниб кетиши барчасини расво қилган эди. Суарес 2011-2014 йиллар оралиғида клуб учун 82 та гол киритди ва бу борада Фернандо Торресдан битта голга ўзиб кетди. Унинг «Барселона»га жуда катта сумма эвазига сотиб юборилиши эса, клубни келажак учун катта қадам ташлаши учун кўмак берди.
Муҳаммад Салаҳ
Голлари сони:109
Ўтказилган ўйинлар сони: 169
Ҳар бир ўйинда ўртача голлар сони:0,64
Мисрлик футболчи 2017 йилда «Ливерпуль» аъзосига айланди ва рекордлар қўйишни бошлаб юборди. Унинг трансфери Клопп томонидан яратилган кучли механизмнинг ишга тушиши учун кўмак берди десак, адашмаган бўламиз. Салаҳ клуб сафида 100 та гол киритиш учун энг кам ўйин сарфлаган футболчи саналади. Стадион.уз критериялари бўйича айнан у «Ливерпул» клуби тарихидаги энг сермаҳсул футболчи бўлиб чиқди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
