«Ньюкасл»нинг янги эгалар қўлига ўтганидан ҳамманинг хабари бор. Бу ҳодиса клуб мухлисларига Майк Эшли давридаги йўқотилган умидларни қайтишини таъминлади. 57 ёшли чакана савдо тадбиркорининг ҳозирда тахминан 2,7 миллиард фунт бойлиги мавжуд. У 2007 йилда «Ньюкасл»ни 135 миллион фунтга харид қилган ва шундан буён мухлислар ўртасида кўплаб танқидларга сабаб бўлиб келарди. Чунки унинг келиши клубни асосий мақсад ва йўналишидан мосуво қилган. Умуман олганда, «Ньюкасл» Англия чемпионати Премьер-лига деб номланган дастлабки даврларда титул учун курашувчи жамоа сифатида қаралар эди. Ўша даврларда жамоа сер Бобби Робсон қўл остида икки марта кучли тўртталикда мавсумни якунлашга муваффақ бўлган. Майк Эшли даври бошлангач эса, бу жамоа икки марта қуйи дивизионга тушиб кетди. Шу ўн тўрт йил ичида эса атиги бир марта мавсумни жадвални юқори ўнлигида тугата олди, холос. Клубнинг айни дамдаги вазияти ҳар доимгидан ҳам ачинарлироқ. «Ньюкасл» янги мавсумнинг 7 та турида 3 очко тўплаган. Ўрин ҳам натижага мос: ўн тўққизинчи. Жамоа мавсум бошидан буён ғалаба қайд этолмаяпти. Голлар нисбати саккизта манфийни ташкил этмоқда.
Ушбу ҳолат юзасидан собиқ футболчи, «Sky Sports» мухбири Гари Невил ўз фикрини билдирар экан, шундай дейди: «Клуб мухлислари ҳозирда ўз севимлиларининг натижасини қабул қилишга мажбурлар. Улар иштиёқли, ўз шаҳрини севади, аммо улар умидсизланиб бораётганди. Футболда умид жуда муҳим. Ньюкаслликларда бу нарса йўқолиб қолганди. Тўғри, Рафаэль Бенитез даврида бу нарсалар бироз чекингандир. Бироқ, ундан кейинги Стив Брюс варианти тўғри танлов эмасди. Унинг натижалари билан қўшилиб, мухлислар ҳам умидсизланиб кетишди. Стив Брюс бу клубга муносиб эмас, Майк Эшли эса ўзи билан қўшиб ўзи каби инсонни иқтидорга қўйди. Мен йиллар давомида бир нарсани қайтаришдан чарчамайман: 1990 йиллар бу клуб учун гўзалроқ бўлган, маънолироқ бўлган, мустаҳкамроқ бўлган. Жамоани ўша пайт чемпионлик учун жанглари шунчаки супер эди. Стадиондаги атмосфера ҳам худди шундай. Ҳозирчи? Ҳозиргача бўлган бир неча йиллик даврни клуб тарихида, футбол тили билан айтганда ҳақиқий депрессион эра дейиш мумкин».
Собиқ футболчи Жейми Каррагер ҳам бу мавзуга тўхталар экан, қуйидагиларни таъкидлайди: «Ҳаммаси клуб хўжайинларига боғлиқ нарсалар, аслида. Бу клуб мухлислари эгалар ва менежерларни ёқтирмай келди. «Ньюкасл» мухлисларига ачинадиган жойим, бу жараён 14 йил давом этди! Бу жуда катта муддат. Бу вақт ичида клуб фанатларининг менталитети шунчалик чўктирилдики, эндиликда улар совринларни орзу қилмайдиган бўлиб қолишди. Ҳозирги аҳвол билан эса, икки баробар умидсизлик кучайиб кетганди».
Каррагер ва Невил бир кун келиб ҳаммаси ўзгаришига умид қилганди. Бу нарса содир бўлди. Янги раҳбариятнинг келиши, жамоа ичидаги келишмовчиликлар, мураббийлар штаби ва мухлислар муносабатини ўзгартириши тахмин қилинган. Каррагер фикрида давом этар экан: «Стив Брюс танқид қилинмоқда. Ҳамма мураббийга айбни ағдаришга ўрганган. Лекин ўша негатив фикрдаги одамлар аввал ўзларига қарасалар яхши бўларди. Бу борада муаммо фақатгина ўйинда эмас, мураббий шахсияти томонида ҳам. Бу адолатдан эмас, фақат мураббийни айблаш нотўғри. Буни футболчи бўлганингизда тушунган бўлардингиз. Ички муҳитдаги бузилиш футбол одамига қанчалар қаттиқ таъсир ўтказишини англаган бўлардингиз. Тез орада биз «Ньюкасл»даги «муаммолар ғилдираги» тўхтатишини кўришимиз мумкин бўлади», – дейди.
Дарҳақиқат, тўғри бошқарув ва изчил ўйланган режалар ҳаммасини яхшилашга имкон беради. Бунда фақатгина катта пул ҳал қилувчи роль ўйнамайди. Раҳбариятнинг сиёсати ва позицияси ҳам кўп нарсани ҳал қилади. «Ньюкасл» клуби келажак учун рақобатдош жамоа бўлишидан умидимиз катта.
инглиз тилидан Жалолиддин ИСМАТОВ таржимаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
