Айни пайтда тактик услублар футболчиларнинг номидан устунроқ бўлиб қолмоқда. Яъни, бирор футболчини истеъдоди қанчалик етук бўлмасин, мураббийнинг қарашларига тўғри келмаса захира ўриндиғида қолиши мумкин.
Ҳозирги кунда "Реал Мадрид" ҳам айнан шундай йўлдан кетяпти: тактика устунроқ. Яъни, мадридликлар захирасида, бир неча мавсумдан буён тактик схемаларга тушмаётган ёхуд айни дамда "қироллик клуби"га кераксиз бўлиб бораётган суперфутболчилар мавжуд. Келинг, уларни бирма-бир кўриб чиқамиз.
Иско
Испаниялик яримҳимоячи айни пайтда деярли ўйинларда қатнашмаяпти. Анчелотти эса аллақачон Федерико, Камавинга каби футболчиларни яримҳимояга "жойлаб" қўйган. Модрич, Кросс, Каземиро каби алмашмайдиган футболчилар бор экан Иско яна бир неча мавсум кутиши мумкин. Лекин, ишониб топширилса ўз ишини идеал даражада уддалаши мумкинлигини мадридлик мухлислар яхши билишади. 2013/14 йилги мавсумдан келиб чиқиб айтадиган бўлсак, Иско Анчелотти учун жуда зарур футболчи бўлган. Айнан ўша мавсум якунларига кўра "Реал" сафида энг кўп майдонга тушган 3-футболчи бўлган эди. Анчелоттининг жамоага қайтиши Искога умид олиб келди. Лекин италиялик мураббий тактик схемасида Искога жой ажратмади. Катта эҳтимол билан Искони кейинги мавсум бошқа жамоа либосида кўрсак керак.
Гарет Бейл
Кутилганидек, бу рўйхатдан уэльслик футболчи ҳам жой олган. Бир неча мавсумдан буён Бейл асосий таркибдан жой ололмаяпти. Ўйинининг сифати, тезлиги пастлагани ва шунингдек, ёш футболчиларнинг ўйини яхшилангани "голфчи"ни захирада қолдиришга сабаблардан бўлиши мумкин. Аммо Бейлда ҳолат бошқачароқ. Футболчи интервюларидан бирида бошқа жамоага кетиши ҳақидаги саволга: "Мени "Реал" билан 2022 йилгача шартномам бор. Шартномам якунланганидан кейин келажагим ҳақида ўйлашим мумкин" деб жавоб берган эди. Бу ҳолатда, аксинча "Реал" жамоадаги энг юқори маош олувчи Гаретдан қутила олмаётгандек, гўё.
Лука Йович
"Реал Мадрид"дан аввал "Айнтрахт" клубида Бундеслига грандларини голлари билан ўзига қаратган, келажаги етук бўлиши кутилган серб футболчиси айни пайтда "Реал" нинг "омадсизлари" рўйхатида. Бензема билан бўлажак рақобатга голлари билан тайёр бўлиб келган Йович, ҳозирги кунда ҳеч қанақасига супер формадаги франсузнинг жойини эгаллай олмайди. Бошқа тарафдан қаралганда Лука илк мавсумининг ўзида Зидан томонидан захирага михлангани футболчи учун юк бўлиб қолиб кетган бўлиши мумкин. Агар, ўшанда сербияликка кўпроқ имконият берилганида ҳозир бошқача бўлиши мумкин эди. Хуллас, бу футболчи ҳам "Реал" дан кетишни ният қилган. Бу ҳатто январь ойидаёқ амалга ошиши мумкин. Эски ўйинлари ва Бенземанинг ёши Йовични катта эҳтимол билан ижарага берилишига сабаб мумкин.
Мариано Диас
Криштиану Роналдудан кейинги 7-рақам соҳиби жароҳати туфайли анча ўйинларни ўтказиб юборди. Ваҳоланки, жароҳати бўлмаса ҳам Бенземани захирага қолдириб асосийда тушиш имкониятлари жуда паст. Лекин, мадридлик мухлисларга маълумки, Марианога берилган ҳар бир ўйинда ажойиб дақиқалар ўтказа олади. Ўтган транферлар ойнасида Диасга бир неча клубдан таклиф бўлди аммо футболчи Мадридда захирада қолдирилаётганига қарамай келган таклифларга рад жавобини берди.
Марсело
"Реал" афсонаси бўлишга улгурган бразилиялик футболчи ҳам сўнгги мавсумларда ўйинни захирадан томоша қилишга мажбур бўляпти. Ёш ва тезкор Ферлан Менди ва Мигель Гутьеррезнинг таркибга қўшилиши Марселони захирага янада яқинлаштирди. Роналдудан кейин, қайсидир маънода, ўйинларида маъно чиқмаётганидан сўнг кўпчилик унинг "Ювентус"га кетиши ҳақида тахмин қилишди. "Реал"нинг меҳнатлари кераксиз бўлса, афсоналарга-да қандай муносабатда бўлишини футбол ихлосмандлари яхши билади. Айнан шу факторлар билан Марсело кейинги мавсумда янги жамоа номи остида ҳаракат қилиши эҳтимолдан ҳоли эмас.
Ушбу футболчилар "Реал" учун керакли ёки аксинча, жуда муҳим эканлигини фақат клубнинг ўзига маълум. Биз эса фақат ташқаридан кузатганларимизга таяниб тахмин қилдик, холос. Ушбу номи келтирилган ҳеч бир футболчи, аслида, ушбу суперклубга шунчаки келиб қолмаган ва шу ўринда, бекорга захирада қолиб кетмайди.
Шухрат Ҳомидов тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Славия
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
