Кеча “манкунианликлар” “Лестер”га қарши премьер-лига доирасидаги навбатдаги тур учрашувини ўтказди ва мағлубиятга учради. Тўғри “қизил иблислар”нинг рақиби кучли жамоа эди. Лекин, Сульшер бошчилигидаги жамоада муаммолар борлиги кўриниб турибди. Хўш “Манчестер Юнайтед” охирги ўйинларда яхши натижа кўрсата олмаётганининг сабаб нимада?
Мураббийдаги муаммо
“Манчестер Юнайтед” Сер Алекс Фергюсондан кейин ўзларига мос мураббий топа олмади. Фергюсоннинг мероси сифатида қаралган Мойес жамоани чўктириб юборишига сал қолди. Моуриньони айтмаганда, бошқа ҳеч ким клуб билан йирик соврин юта олмади. Оле анча яқин келди, аммо финалда “Вильяреал”ни енга олмади. Норвегиялик яхши мураббий, лекин унда бироз таваккалчилик етишмайди. Балки унинг тактикаси шундайдир. Унинг қўл остида “қизил иблислар” кўпроқ натижа учун ўйнамоқда, аммо буни ҳам эплай олмаяпти. Кўп бор шу туфайли “манкунианликлар” очко йўқотишмоқда. “Янг бойз” ёки “Эвертон”га қарши ўйинларни бунга мисол қила оламиз. Ўтган йили “Манчестер Юнайтед” иродали ғалабалари билан шонли даврига қайтадигандек кўринган эди. Бу мавсум ундай бўлмаяпти.
Сульшердаги яна бир камчилик бу ёш иқтидорларга кам ўйин амалиёти беришида. Тўғри у Гринвудга кўп имкон бермоқда. Аммо сўнгги йилларда жамоа таркибида камида яна 2-3 та Мейсон каби футболчи бор эди. Даниель Жеймс ва Эйнжел Гомесни мисол сифатида келтиришимиз мумкин. Жеймсда ўйин амалиёти камлиги туфайли пасайиш бўлганини ҳеч ким рад эта олмайди. Гомесни эса ҳали таниб улгурмасимиздан йўқотдик. Унинг келажаги порлоқ бўлиши ёшлигидан таҳмин қилинган эди. Балки Сульшерга истефо бериш вақти келгандир? Биз учун афсонавий клубнинг яна аввалга даражасига қайтиши муҳим. Чунки барча футбол ишқибозлари буни исташса керак. Балки Зидан Олени ўрнини эгалласа ҳаммаси бутунлай бошқача бўлар?
Роналдунинг таъсири
Бу ҳақида гапириш ғалати туйилиши мумкин. Балки Роналдунинг қайтиши жамоага ёмон таъсир ўтказгандир? Тўғри Криштиану жамоа учун кўп ишлар қила олади. Унинг голеадорлик қобилияти туфайли клуб керакли очколарни қўлга киритиши мумкин. Аммо, баъзан бундай футболчиларнинг жамоада пайдо бўлиши бошқа футболчиларга таъсир ўтказиши мумкин. Яққол мисол сифатида Бруну Фернандешни айтсак бўлади. Португалия термаси ўйинидаги Бруну билан “Манчестер”га Роналду келишидан олдинги Брунунинг ўйинини солиштириб кўринг. Деярли, Португалиянинг ўйинида кўзга ташланмаган ярим ҳимоячи клубида умуман бошқача ўйин кўрсатар эди. Бунинг сабаблари орасида Роналду фактори мавжуд. “Манчестер Юнайтед” биринчи турда Лидсга қарши ўйинини кўрган бўлсангиз керак. Ўша баҳсда Бруну дахшатли ўйин кўрсатган эди. У пайтлар “қизил иблислар” Криштиануни олиб келиш ҳақида ўйламаётган ҳам эди. Ҳозирги Брунунинг ўйини билан оша пайтдагисини фарқи бор эди. Шунчаки, Роналдунинг таркибда пайдо бўлишининг ўзи баъзи футболчиларга таъсир қилмоқда. Бу ҳақида кўплаб мутахассислар ҳам фикр билдиришган.
Буни инқироз деб бўладими?
Умуман олганда Оле шогирдлари премьер-лига доирасидаги сафар ўйинларида 29 баҳсдан бери енгилишмаётган эди. Улар қачондир мағлубиятга учраши аниқ эди ва ўша мағлубият инқирознинг бошланиши дейиш нотўғри боларди. Лекин биз инқироз дейишимизга бир нечта сабаб бор. Охирги 8 учрашувнинг 3 тасида ғалаба, 4 тасида мағлубият ва 1тасида дурранг ўйнаш яхши натижа эмас. Унинг устига жамоа ўша 8 учрашувда 12та гол ўтказиб юборишган. Бу албатта гранд жамоа учун ёмон кўрсаткич. Чемпионлар лигасидаги ва кубокдаги мағлубият ўзидан даражаси паст жамоалардан учралди. “Астон Вилла” дарвозасига эса йўл топа олмаган Оле шогирдлари ўша ўйинда ҳам мағлуб бўлишган. Бу кетишда жамоанинг яқин келажагида мураббий алмашиш эҳтимоли юқори. Негаки тобора натижалар ёмонлашиб боравериши давом этмоқда. Клубнинг таркиби кучли аммо кўрсаткичлар ёмон. Балки бу инқирознинг бошланишидир?
“Манчестер Юнайтед”ни олдинда нималар кутиб турипти?
Сульшер шогирдларини олдинда жиддий баҳслар кутиб турипти. 20 октябр куни “қизил иблислар” Чемпионлар лигаси доирасидаги навбатдаги учрашувни ўтказади. “Аталанта”ни ўз уйида қабул қиладиган баҳсдан сўнг, “Ливерпуль” “Олд Траффорд”да меҳмон бўлади. Ундан кейин “манкунианликлар” икки бор меҳмонда ўйин ўтказади. Аввалига премьер-лигадаги учрашув “Тоттенҳем”га қарши бўлса, кейин жамоа Италияда “Аталанта” меҳмони бўлади. Навбатдаги ўйин эса Манчестер дербиси. Демак Олега қийин бўлади. Клубни олдинда жиддий синовлар кутмоқда.
Миржалол Пардабоев тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
