“Манчестер Юнайтед” Оле-Гуннар Сульшерни истефога чиқарди ва янги бош мураббий қидирмоқда. Клуб матбуот хизмати хабарига кўра, янги келган мутахассис мавсум охиригача клубни бошқаради. “Stadion.uz” нашри янги мураббий жамоага келгандан сўнг нималарни ўзгартиришии кераклиги ҳақида бироз фикр юритади.
“Манчестер Юнайтед” яна бир бор инқирозга учради, Оле-Гуннар Сульшер жамоани ундан чиқара олмади. Клуб янги бош мураббий излай бошлади ва матбуот хабарларига кўра, жамоа бошқарувига келиши мумкин бўлган асосий номзод Зинедин Зидан МЮни бошқаришни рад этди. Манкунианликлар энди мавсум охиригача вақтинчалик мураббий ким бўлишини аниқлаши керак. Афтидан, “Манчестер Юнайтед” шошқалоқлик қилишнинг ҳожати йўқлигини тушуниб етган ва янги мураббий ишни хотиржам режимда бошқаришини таъминламоқчи, чунки у кўп муаммоларни ҳал қилиши керак.
Кўпчилик Криштиану Роналдуни “Манчестер Юнайтед”нинг асосий муаммоси деб атайди. Тўғри, португалиялик гол уради ва ажойиб шахсий статистика кўрсатади, лекин унинг жамоада эканлиги клуб муҳитига салбий тасир кўрсатиши айтилмоқда. Таъкидланишича, Роналду прессингда фаол тарзда ўйнай олмаяпти.
Назарий жиҳатдан, бу муаммони майдоннинг ўртасини ўйнайдиган кучли яримҳимоячилар зонаси билан ҳал қилиш мумкин. Олдин Каземиро, Модрич ва Кроос биргаликда Роналдунинг бу камчилигини ёпишган. Бироқ “Манчестер Юнайтед”да бундай кучли яримҳимоячилар деярли йўқ.
Умуман олганда, марказий чизиқ “Манчестер Юнайтед”нинг янги бош мураббийининг иккинчи глобал муаммосидир. Жамоада кучли таянч яримҳимоячи йўқлигидан ташқари, клубни тарк этмоқчи бўлган Поль Погба МЮ ўйинига салбий таъсир ўтказмоқда. Сабаби, Погбанинг кетиш истагидан ташқари жамоа ўйинига киришиб кета олмаслиги, шунингдек, баъзи пайтларда жуда ажойиб ўйин намойиш этса, баъзан унинг майдонда борлиги ҳам сезилмайди.
Қизиғи шундаки, янги мураббий Роналду ва Погба муаммоларини ҳал қилиш вазифасидан эрта халос бўлиши мумкин. Франциялик футболчининг шартномаси ёзда тугайди ва у клубни текинга тарк этиш эҳтимоли катта. Қолаверса, португалиялик “Манчестер Юнайтед” Чемпионлар лигасига чиқа олмаса, жамоадан кетишини айтган. Эҳтимол, иккита юқори даражадаги ўйинчининг жамоадан кетиши янги мураббийниннг ютуғи бўлиши мумкин. Чунки, агар улар жамоада қолса, жамоада якка лидер бўлади ва бу ҳолат мураббийнинг услубига салбий таъсир ўтказиши мумкин.
Бироқ, Погба ва Роналду кетгани билан жамоадаги муаммолар тугамайди. Биз олдинроқ майдон маркази ҳақида гапирган эдик, аммо ҳужумда ҳам ниманидир ҳал қилиш керак бўлади. Тўғри, таркибда Рэшфорд, Санчо, Гринвуд каби футболчилар бор, лекин улар қанот футболчиси ҳисобланади. Янги мураббийга марказий ҳужумчи ва таянч яримҳимоячи керак бўлади. Бусиз “Манчестер Юнайтед” анча мувозанатсиз жамоа бўлиб қолади.
Шу билан бирга, мураббий Санчо, Рэшфорд ва Гринвуд бир-бирини қандай тушуниб ўйнаши ҳақида ўйлаши керак. Қолаверча, Антони Марсьял, жамоанинг энг яхши футболчиси деб эътироф этиладиган Бруну Фернандеш, Амад Диалло, шунингдек, бир ярим йилдан бери захирада ўтирган иқтидорли Донни ван де Бек муаммоси ҳам бор.
Хулоса қилиб айтадиган бўлсак, “Манчестер Юнайтед” учун янги мураббий ҳал қилиши керак бўлган асосий муаммо – жамоадаги мувозанатни топиш. Клуб таркибида жуда иқтидорли ўйинчилар бор, лекин уларнинг барчаси ўйинларда якка ҳолда натижа кўрсата олади ва жамоавий ўйинларда бироз оқсайди. Бу эса янги келган мутахассис принципларига тўғри келмаслиги мумкин.
Жамшиджон Маҳмудов тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
