2021 йил ҳам Дэвид Бекхэм учун унутилмас воқеа тақдим этди - Англия футболи афсонаси декабрь ойи ўрталарида ўз отасига куёвжўра бўлди. Ҳа, катта Бекхэм яна уйланди. 73 ёшида! Ҳозирда Дэвид ва Теднинг ўзаро муносабатлари жуда яхши. Аммо 20 йилча олдин ҳаммаси бошқача эди.
2002 йили Дэвид Бекхэмнинг ота-онаси Сандра ва Тед ажрашишди. Ваҳоланки, улар 32 йил бирга яшашганди. Ўшанда Дэвид кутилмаган парокандаликда отасини кескин айблаганди. Бу масалада опа-сингиллари ҳам уни қўллаб-қувватлашди. Бекс жумладан, автобиографик асарида ота-онасининг ўзаро муносабатларига ҳам алоҳида тўхталган: «Отам онамни яхши кўрарди, лекин унга ҳеч қачон меҳр кўрсатмаган. Ўзи отам меҳрини мен ҳам кўрмаганман, опа-сингилларим ҳам. У ўта қаттиққўл ва қўпол инсон...». Тед Бекхэмнинг ўзи ҳам оиланинг бузилиши фарзандлари учун кучли зарба бўлганини тан олганди.
Дэвид Бекхэм шундан кейин маълум муддат ҳаттоки, отаси билан алоқани бутунлай узди. Жумладан, икки ҳолат ота ва ўғил муносабатларини издан чиқарди:
1. Дэвиднинг «Реал»га ўтиши. Тед Бекхэмнинг айтишича, у ўғлининг «Реал» сафига қўшилаётганини ТВ янгиликларидан эшитган.
2. Дэвиднинг автобиографияси. Кичик Бекхэм унда отасини ошкора танқид остига олган.
2007 йилга келиб, Дэвид ва Тед яна ярашишди. Ўшанда катта Бекхэм инсультга учраганди. Эътиборли томони, Дэвид нохушликни эшитган заҳоти Майамидан дарҳол Манчестерга қайтди. У яна 3 йилдан кейин отасини мақташга ўтди: «Отамнинг хасталиги ўзаро муносабатларимизни бутунлай ўзгартирди. Унга нисбатан сабрли ва меҳрибон бўлиб қолдим табиий равишда. Эндиликда нафақат отамнинг нуқтаи назари, балки ўзини ҳам борича қабул қиляпман. Муҳими, 3 йилдан буён тез-тез учрашиб, илиқроқ оҳангда суҳбатлашяпмиз».
Дэвид ва Виктория Бекхэм 2019 йили Рождествони нишонлаш маросимига Тедни ҳам таклиф этишди. 2020 йилнинг март ойида эса Тед ва Хиллари Мередит унаштирилганларини эълон қилишди. Мередит касби бўйича - ҳуқуқшунос. Унинг Лондонда шахсий агентлиги ҳам бор. Британия таблоидлари маълумотларига кўра, Мередит хоним миллионерлар қаторида. Хуллас, Тед Бекхэм ва Хиллари 15 декабрь куни тўй маромисини ўтказишди. Тантанали тадбир Лондон марказидаги Мидл-Темпле ҳудудида ташкиллаштирилди. Тўйда Дэвид Бекхэмдан ташқари, Теднинг қизлари ва 8 набираси, шунингдек, Мередитнинг яқинлари иштирок этишди. Қизиғи, Дэвид куёвжўра ролида кўриниш берган бўлса, Хиллари хонимнинг қизи келинчак дугонаси бўлди.
Дэвид Бекхэм маросимдан кейин ижтимоий тармоқда бу борада алоҳида пост қолдирди: «Отам ва Хиллари тўйини ажойиб кунда бирга нишонладик. Бутун оила билан. Бу ёқимли. Отам ҳамиша ёнимда бўлган. Мен ҳам унинг яхши кунида ёнида турганимдан фахрланаман. Сени яхши кўраман, отажон».
А.АБДУВАЛИХЎЖАЕВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
