2021 yil ham Devid Bekxem uchun unutilmas voqea taqdim etdi - Angliya futboli afsonasi dekabr oyi o‘rtalarida o‘z otasiga kuyovjo‘ra bo‘ldi. Ha, katta Bekxem yana uylandi. 73 yoshida! Hozirda Devid va Tedning o‘zaro munosabatlari juda yaxshi. Ammo 20 yilcha oldin hammasi boshqacha edi.
2002 yili Devid Bekxemning ota-onasi Sandra va Ted ajrashishdi. Vaholanki, ular 32 yil birga yashashgandi. O‘shanda Devid kutilmagan parokandalikda otasini keskin ayblagandi. Bu masalada opa-singillari ham uni qo‘llab-quvvatlashdi. Beks jumladan, avtobiografik asarida ota-onasining o‘zaro munosabatlariga ham alohida to‘xtalgan: «Otam onamni yaxshi ko‘rardi, lekin unga hech qachon mehr ko‘rsatmagan. O‘zi otam mehrini men ham ko‘rmaganman, opa-singillarim ham. U o‘ta qattiqqo‘l va qo‘pol inson...». Ted Bekxemning o‘zi ham oilaning buzilishi farzandlari uchun kuchli zarba bo‘lganini tan olgandi.
Devid Bekxem shundan keyin ma’lum muddat hattoki, otasi bilan aloqani butunlay uzdi. Jumladan, ikki holat ota va o‘g‘il munosabatlarini izdan chiqardi:
1. Devidning «Real»ga o‘tishi. Ted Bekxemning aytishicha, u o‘g‘lining «Real» safiga qo‘shilayotganini TV yangiliklaridan eshitgan.
2. Devidning avtobiografiyasi. Kichik Bekxem unda otasini oshkora tanqid ostiga olgan.
2007 yilga kelib, Devid va Ted yana yarashishdi. O‘shanda katta Bekxem insultga uchragandi. E’tiborli tomoni, Devid noxushlikni eshitgan zahoti Mayamidan darhol Manchesterga qaytdi. U yana 3 yildan keyin otasini maqtashga o‘tdi: «Otamning xastaligi o‘zaro munosabatlarimizni butunlay o‘zgartirdi. Unga nisbatan sabrli va mehribon bo‘lib qoldim tabiiy ravishda. Endilikda nafaqat otamning nuqtai nazari, balki o‘zini ham boricha qabul qilyapman. Muhimi, 3 yildan buyon tez-tez uchrashib, iliqroq ohangda suhbatlashyapmiz».
Devid va Viktoriya Bekxem 2019 yili Rojdestvoni nishonlash marosimiga Tedni ham taklif etishdi. 2020 yilning mart oyida esa Ted va Xillari Meredit unashtirilganlarini e’lon qilishdi. Meredit kasbi bo‘yicha - huquqshunos. Uning Londonda shaxsiy agentligi ham bor. Britaniya tabloidlari ma’lumotlariga ko‘ra, Meredit xonim millionerlar qatorida. Xullas, Ted Bekxem va Xillari 15 dekabr kuni to‘y maromisini o‘tkazishdi. Tantanali tadbir London markazidagi Midl-Temple hududida tashkillashtirildi. To‘yda Devid Bekxemdan tashqari, Tedning qizlari va 8 nabirasi, shuningdek, Mereditning yaqinlari ishtirok etishdi. Qizig‘i, Devid kuyovjo‘ra rolida ko‘rinish bergan bo‘lsa, Xillari xonimning qizi kelinchak dugonasi bo‘ldi.
Devid Bekxem marosimdan keyin ijtimoiy tarmoqda bu borada alohida post qoldirdi: «Otam va Xillari to‘yini ajoyib kunda birga nishonladik. Butun oila bilan. Bu yoqimli. Otam hamisha yonimda bo‘lgan. Men ham uning yaxshi kunida yonida turganimdan faxrlanaman. Seni yaxshi ko‘raman, otajon».
A.ABDUVALIXO‘JAYEV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
