«Бунёдкор» «Экспо’70» стадиони майдонини синаб кўрди
Бугун Япония вақти билан кеч соат 17:00дан 18:00гача “Бунёдкор” жамоаси футболчилари эртага мезбонлар - “Гамба Осака” клубига қарши учрашув ўтказиладиган “Экспо’70” стадионида ўзларининг расмий машғулотини ўтказдилар.
Машғулотда “Кун чиқар юртга” ташриф буюрган барча 18 нафар футболчи умумий гуруҳда бирдек шуғулланди.
Чигалёзди машқларидан сўнг ярим ҳимоячилар ва ҳужумчилар бош мураббий Миржалол Қосимов қўл остида қанотдан тўпни ҳаволатиб рақиб жарима майдончасига ошириш ҳамда дарвозага зарбалар бериш устида ишлашди. Ҳимоячилар эса Мурод Отажонов ва Ҳикмат Эргашев назорати остида ҳимояланиш ҳаракатлари бўйича машқлар олиб боришди. Дарвозабонлар билан, ҳар доимгидек, Абдусаттор Раҳимов ишлашди.
Ўнг қанотдан Виктор Карпенко ва Яннис Мандзукас, чап тарафдан Дэвид Карни ва Шавкат Саломовлар олти футболчи - Мурзоев, Солиев, Пардаев, Козак, Л.Тўраев ва Мельзиддиновларни кўзлаб паслар оширишди. Улар эса тўпни Нестеров ва иккинчи посбонимиз Нодир Иброҳимовлар қўриқлаган дарвозага киритиш пайида бўлишди.
С.Жўраев, Каримов, Жоржевич, Филипосян, Ғофуров ва Кенжисариевлар тўғри ва бехато ҳимояланиш устида “бош қотиришди”.
Умид қиламизки, бу тараддудлар эртанги ўйин олдидан жамоамизга айни муддао бўлади ва футболчиларимизга албатта асқотади.
***
“Экспо’70” стадиони маъмуриятининг бизга хабар беришича, эртага ўйинга тахминан 10 мингга яқин мухлис келиши кутилмоқда.
Манба: www.fcbunyodkor.com
Киритилди: 22:38, 02.04.2012. Ўқилди: 6868 марта. Фикрлар: 3 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар