Бугун Ла Лига доирасидаги навбатдаги «эл-класико» баҳси ўтказилади.
Мазкур ўйиндан олдин чиққан хабарларни ўқиган бўлсангиз керак. Карим Бензема бугунги баҳсда мадридликларга ёрдам бера олмайди. Ҳужум чизиғида франциялик форварднинг ўрнини ким боса олади? Бугунги баҳсда Каримсиз ўйнайдиган пойтахтликлар Каталония клуби дарвозасини ишғол эта олишадими? Шу ҳақда шахсий фикрлар билан бўлишмоқчиман.
Карим Бензема. Криштиану Роналду билан бир вақтда жамоага келган ва ҳали ҳам «Реал» шарафини ҳимоя қилаётган, афсоналар қаторига қўшилиш учун анчагина меҳнат қилган Бенземанинг жамоадаги ўрни катта. Айниқса, ҳозирги пайтда. Марказий ҳужумда асосий ишни қилиб келаётган Карим жароҳат сабаб бугунги жангни ўтказиб юборади. Унинг «ПСЖ»га қарши беллашувда қандай салоҳиятга эга эканлигига яна бир бор амин бўлдик. Ҳозир эса бу футболчи ўйинни фақат томоша қилиши мумкин.
Анчелотти Бенземанинг ўрнига қайси ўйинчи хизматидан фойдаланиши мумкин?
Умуман олганда, ҳозирги ҳолатда Каримнинг ўрнини боса оладиган «Реал» ҳужумчиси жамоада йўқ. Йович, Мариано Диас энг яхши формада бўлган тақдирда ҳам Бенземанинг ўрнини боса олмайди. Шунинг учун, бу баҳсда италиялик мутахассис тактикани ҳам ўзгартириши ва бошқа кучли томонлардан фойдаланиши мумкин. Масалан, Винисиус Жуниор бу баҳсда кўп ишни ҳал қилиб бера олиши мумкин.
Унинг қандай тезлиги, техник маҳорати ва ўйинга чанқоқ эканлигини аксарият ишқибозлар яхши билишади. Мбаппе ва Холанд каби юлдузларни жамоага жалб этиш ҳаракатида юрган Флорентино Перес олдида ҳам ўзини кўрсатиш учун бугун жуда катта имконият бўлади унда. Индивидуал маҳорат бўйича унга гап сўз бўлиши мумкин эмас. Лекин, бразилиялик вингер бундай катта беллашувда ўзини кўрсата олишига ҳеч ким кафолат бера олмайди. Бугун у жамоани тортиши ва келажакда Роналду ёки Бенземага муносиб ўринбосар эканини исботлаши ҳам, ёки умуман майдонда кўринмай қолиши ҳам мумкин.
Винисиус Жуниордан ташқари Марко Асенсио, Федерико Вальверде ва жамоанинг тажрибали футболчиси Лука Модричнинг ўйини бугунги баҳсда катта роль ўйнашига бир қанча омиллар етарлича топилади. Ушбу футболчилар яқин ўтмишда ҳам ўз имкониятларини кўрсата олишди. Ҳужумкор «Реал» жамоаси учун уларнинг хизматлари бугун жуда ҳам зарур.
«Барселона» Европа Лигасида қатнашаётган бўлса ҳам, қишки трансферлар ойнасидан унумли фойдаланган ҳолда, ҳужум чизиғини етарлича кучайтира олди. Бир муддат Люк Де Йонг, Брейтуэйт ва Депайларнинг ўйинига қараб қолган «Барселона» таркибида «Арсенал»нинг собиқ футболчиси Пьер-Эмерик Обамеянг, шунингдек, Адама Траоре ҳамда Ферран Торрес каби чаққон вингерлар мавжуд.
Бугунги баҳсда Роналду ва Месси давридан кейин ажойиб «эл-классико» гувоҳига айланишимиз мумкин. Кучлар тенг. Хави ва Анчелоттининг илк қарама-қаршилиги қандай якун топади деб ўйлайсиз?
Мураббийлар ҳам ўйин динамикасига таъсир ўтказишлари мумкин. Тошкент вақти билан бугун тунда (01:00) ўтадиган ўйинни кўриш қизиқарли бўлишига менимча ҳеч ким шубҳа қилмаса керак.
Нодир Абдурасулов
Матнда хатолик топсангиз, ўша хатони белгилаб, бизга жўнатинг (Ctrl + Enter).
Сўғдиёна
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
