Антонио Конте бугун АПЛнинг 2 туридан ўрин олган баҳс доирасида яна "Стемфорд Бриж" остонасига қадам қўяди. Аммо энди у "Тоттенхэм" устози ва жонажон "Челси"сига қарши чиқади. Унинг жамоаси илк турда "Саутгемптон"ни 4-1 ҳисобида таслим этганди. Кўплаб мухлислар "шпорлар" янги мавсумда "Манчестер Сити" ҳамда "Ливерпуль" учун энг катта бош оғриғи бўлишини тахмин қилишган. Бунга эса "Тоттенхэм" амалга оширган трансферлар сабаб бўлмоқда. Фрейзер Форстер, Иван Перишич, Ив Биссума, Ришарлисон, Лангле ҳамда Спенс жамоанинг янги аъзосига айланди. Улар эндиликда имкон берилишини кутмоқда.
Пойтахт шаҳарнинг бошқа бир нуқтасида "Челси" клуби ҳам яхшиланишга ҳаракат қилди. Клуб раҳбариятидаги ўзгаришлар фонида, жамоани Рюдигер, Кристенсен ҳамда Лукаку тарк этди. Шунингдек, бошқарув тизимидаги шахслар бўлмиш, Грановская ҳамда Чех ҳам ишдан бўшатилганди. Тухель эса ҳозирга қадар учта трансферни амалга оширишга улгурди. Рахим Стерлинг ҳужум учун харид қилинган бўлса, Калиду Кулибали ҳамда Марк Кукурельялар ҳимоя қўрғонини мустаҳкамлаш учун олиб келинган. Айни дамда "Челси" Френки де Йонг ҳамда Бенжамин Павар хариди устида бош қотирмоқда.
"Челси" мавсумни "Эвертон"га қарши қийин ғалаба билан бошлаган эди. Иккинчи тур эса ундан ҳам оғирроқ бўлиши кутилмоқда. Рақиб – "қутурган" "Тоттенхэм"...
"Челси" ўтган мавсум давомида "Тоттенхэм" билан тўрт марта тўқнашган ва ҳаммасида ғалабага эришган. Улардан иккитаси АПЛда, иккитаси эса лига кубоги ярим финалларида эди. "Шпорлар" ана шу баҳсларнинг ҳеч бирида "Челси" дарвозасини ишғол қила олмаган. Шу туфайли, бу рақиблар тўқнашуви анча принципиаллашиб қолган. Антонио Конте ўтган мавсум учун қасос олишни режа қилган бўлса, ажаб эмас. Чунки "Челси" яқин тарихда "шпорлар"ни 18 кун ичида 3 марта мағлуб этганди.
"Челси" учун ҳам ҳамшаҳарларига қарши ўйин яхшигина синов бўлади. Негаки, бугунги баҳс Тухелни мавсум давомида "Ливерпуль" ҳамда "Манчестер Сити"га қанчалик яхши таъқибчи бўлишини исботлашга ёрдам беради.
Бугунги "Тоттенхэм" эса ҳеч қайси рақибдан қўрқмаслигини исботлашга уринмоқда. Чунки энди Конте қўлида ўта муҳим бўлган Кейн-Сон-Кулусевски триоси бор. Бу учлик бугун "Челси"га қарши олти ўйиндан бери давом этиб келаётган голсиз серияга якун ясашга ҳаракат қилади. Шунингдек, шимолий лондонликлар АПЛда сўнгги еттита баҳсда "Челси"ни енга олмаган. Уларнинг "аристократлар"га қарши охирги ғалабаси 2018 йилда, Почеттино даврида қўлга киритилган. Ўшанда 3-1 ҳисоби қайд этилади.
Қисқаси, ҳар икки томон ҳам ўзига ишонч билан майдонга чиқиб келиши кутилмоқда. Чунки бунга етарли сабаблар бор. Кўрамиз, Лондон дербисида кимнинг қўли баланд келаркин...
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ўзбекистон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
