"Манчестер Юнайтед" ўз уй ўйингоҳи бўлмиш "Орзулар театри"да лига етакчиси, "Арсенал"га қарши баҳсга тайёргарлик кўрмоқда. Жамоа 5-турда "Лестер Сити"ни мағлубиятга учратган эди. Қуйида "МЮ"да илк бор юз берган айрим воқеаларга тўхталиб ўтамиз.
1. Антони умумий жамоа билан илк бор машғулот ўтказди
Айни дамда трансферлар ойнаси ёпилиб бўлган ва тен Хаг камида январь ойига қадар қайси футболчилар билан бўлишини жуда яхши билади. Августнинг энг катта харидларидан бири Антони бўлди. У "МЮ"га ойлаб музокаралардан кейин, 86 миллион фунт эвазига ўтди. "Арсенал"га қарши баҳсда қатнашиши номаълум бўлган футболчи, аллақачон янги жамоадошлари билан машғулотларда иштирок этишга улгурган. Бразилия терма жамоаси аъзосини кейинги баҳсларда майдонда кўришга умид қиламиз.
2. Бразилияликлар боғлами
Антони "Манчестер Юнайтед"да бир нечта таниш чеҳраларни кўриши мумкин. Чунки ундан аввал "Аякс"даги жамоадоши Мартинес ҳам айнан "МЮ"га келганди. У эндиликда юртдоши бўлган Каземиро билан бирга ўйнаши мумкин бўлади. Ундан ташқари Фред ҳам ярим ҳимояда мавжуд. Бу эса учта Бразилия терма жамоаси аъзоларини "МЮ"да бирлашганини англатади.
3. Роналдунинг юзида кулгу
Антони ва Каземиро "қизил иблислар" сафига келаётган бир пайтда, клуб афсонаси бўлган Криштиану Роналду жамоани тарк этишга ҳаракат қилаётган эди. Португалияликнинг бу истаги замирида ЕЧЛ футболи ётганди. Бир нечта клублар Роналду билан боғланган, унинг агенти эса улар билан музокараларга киришган. Аммо ҳеч нарса ўзгармади. Роналду "МЮ"да қолди. Аммо унинг кайфияти эндиликда олдингидан яхшироққа ўхшайди. Чунки клуб у хоҳлаган харидларни амалга оширди ва футболчи юзида кулгу билан машғулотларда қатнашмоқда.
4. Дубравка жамоага келиб қўшилди
"МЮ" трансферлар ойнасининг сўнгги кунида ҳам нимагадир улгуриб қолишга тиришди. Натижада "Ньюкасл"дан словакиялик дарвозабон Мартин Дубравкани ижара асосида олиб келишга эришди. У эндиликда Давид Де Хеа ўрнини эгаллаши мумкин бўлади. Дубравка ҳам Антони каби жамоанинг "Арсенал"га қарши ўйинига тайёргарлик машғулотларида кўриниш берган. Ҳа, янги посбон келаётган баҳсда қатнашмаслиги мумкиндир. Аммо узоқ кечадиган мавсумда албатта жамоага асқотади.
5. Ёшларга катта имконият
Сўнгги йилларда клуб академиясини кўплаб ёшлар битириб чиқди. Улар ичида салмоқли қисми "МЮ"нинг асосий таркибига киришга эришган. Маркуз Рэшфорд, Антони Эланга, Алехандро Гарначо. Бу рўйхатни узоқ давом эттириш мумкин. Аммо бунда бир нарса эътиборга молик: Эрик тен Хаг уларга имкон бермоқда. Бу эса анча ижобий ўзгариш саналади. Асосий жамоа билан академиянинг қоришуви – ёрқин келажакка замин ҳозирлайди. Улардан исталган пайтда фойдаланиш мумкин бўлади. Боз устига, "Арсенал"га қарши баҳсда ҳам.
Айни дамда "Манчестер Юнайтед" 9 очко тўплаб, 5-ўринни банд этиб турибди. "Арсенал"ни мағлуб этиш орқали эса, тен Хаг кучли тўртликдан жой олиш имконига эга бўлади. "МЮ"нинг 6-тури 4 сентябрь куни, Тошкент вақти билан 20:30да старт олади.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
