"Манчестер Юнайтед" клуби кеча ҳужумчи Криштиану Роналду билан ўзаро келишган ҳолда шартномани бекор қилганини эълон қилди. Бу воқеа ўз-ўзидан рўй бергани йўқ албатта. Мазкур воқеа атрофидаги ҳодисаларни эслаб ўтамиз.
«МЮ»нинг муносабати
Португалиялик футболчи "The Sun" нашрига берган шов-шувли интервьюсидан сўнг "МЮ" уни йирик миқдорда жаримага тортишга, у билан шартномани бекор қилишга, агар иш судгача етиб борса, Роналду билан судлашишга ҳам тайёр эди.
Томонлар ўзаро келишган ҳолда тинч йўл билан шартномани бекор қилишди. Бу борада «МЮ» шундай баёнот берди: «Роналду ўзаро клеишувга кўра клубни тарк этади. Клуб Роналдуга "Олд Траффорд"ги икки даврдан иборат самарали меҳнати учун миннатдорчилик билдиради. Бу вақтда у "МЮ" сафида 345та ўйинда иштирок этиб, 145та гол урди. Биз унинг келажакдаги ишларига омад тилаймиз. «Манчестер Юнайтед»даги барча инсонларнинг бор эътибори Эрик тен Хаг бошқарувидаги жамоанинг ўсиши учун хизмат қилишга қаратилган».
Криштианунинг муносабати
Роналду ҳам ўзининг клубни тарк этишига изоҳ берди: «Манчестер Юнайтед» билан музокаралардан сўнг биз шартномани муддатидан олдин бекор қилишга келишиб олдик. Мен "Манчестер Юнайтед"ни ва унинг мухлисларни яхши кўраман - бу ҳеч қачон ўзгармайди. Шу билан бирга, мен учун янги синовларни излаш вақти келганини ҳис қиляпман. Жамоага мавсумнинг иккинчи қисмида ҳам, келажакда ҳам муваффақиятлар тилайман».
Роналдунинг "МЮ"даги ютуқлари
Португалиялик футболчи «МЮ» сафида жами 7,5 йил тўп тепди. Бу иккита даврдан иборат бўлди: 2003-2009-йиллар ва 2021-2022 йиллар. Бу йиллар давомида у АПЛда 3 марта, Англия лига кубогида 2 марта ҳамда Англия кубоги, Англия суперкубоги, Европа чемпионлар лигаси ва клублар ўртасидаги жаҳон чемпионатида бир мартадан зафар қучган. Шунингдек, Криштиану ўзининг илк «Олтин тўп»ини айнан «МЮ» сафида олган (2008).
Ўзи нима бўлганди?
13 ноябрь куни британиялик журналист Пирс Морган Криштиану Роналду билан интервью қилганини эълон қилиб, берилган тизерда футболчининг клуб ва бош мураббий Тен Хаг ҳақида фикрларини "қистириб" ўтди. Шундан сўнг шов-шув бошланди.
Маълумотларга қараганда, Эрик тен Хаг ҳали интервью эълон қилинмасидан аввал футболчидан клубдан кетиши борасида қарор қабул қилиб бўлган. Клуб раҳбарияти эса футболчини эмас, мураббийни қўллаб-қувватлади.
Роналду ўз интервьюсида клуб ва Тен Хагга нисбатан қуйидаги эътирозларни билдириб ўтди:
— Эрик тен Хаг мени ҳурмат қилмайди. Шунинг учун ўртамизда муносабат шундай тусга кирди. У матбуот учун муносабатларимиз яхши эканини айтиб келган бўлса-да, аслида ундай эмасди.
— Янги мураббийлар янги услубларни жорий қилишади. Нима учун бу кераклигини тушунмайман. Мен жаҳоннинг энг яхши мураббийлари билан бирга ишлаганман: Зидан, Анчелотти, Моуринью, Фернанду Сантуш, Аллегри... Мен ҳам кўп нарса биламан.
— Нафақат мураббий, балки раҳбариятдаги баъзи шахслар менинг клубдан кетишимни исташди.
— Қизим касал бўлгани учун клубнинг йиғинига бора олмаганига клуб ишонмади.
— Клуб инфратузилмаси эскирган.
— Ёшлар Криштиану Роналдудан ўрнак олмайди.
«МЮ»нинг ғазаби
Клуб ушбу интервьюни кескин қабул қилди. Жамоа Роналду жаҳон чемпионатидан сўнг клубга қайтмасликни талаб қила бошлади. «Юнайтед» шартномани бекор қилиш борасида ҳуқуқшунослар билан маслаҳатлашув ишларини бошлаб юборди.
"МЮ"даги футболчилар ҳам Криштиануни қўллаб-қувватлашмади.
Шартнома бекор қилиниши оқибатида Криштиану 16 млн фунт даромаддан маҳрум бўлди.
Агар португалиялик ўйинчи ортиқча тўловларсиз шартномани бекор қилишга рози бўлмаса, клуб у билан судлашишга ҳам тайёр эди.
Роналду клубни тарк этишни истамаган ҳолатда жамоа Криштиануни ёшлар жамоасида шуғулланишга "бадарға" қиларди.
Криштиану Роналду Қатардаги жаҳон чемпионатида клубсиз футболчи сифатида ўйнайди. Унинг агентлари ёзда муносиб клуб топа олишмаганди. Қишки трансфер пайтида улар бу ишни уддалай олишармикан? Кўрамиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
