"Manchester Yunayted" klubi kecha hujumchi Krishtianu Ronaldu bilan o‘zaro kelishgan holda shartnomani bekor qilganini e’lon qildi. Bu voqea o‘z-o‘zidan ro‘y bergani yo‘q albatta. Mazkur voqea atrofidagi hodisalarni eslab o‘tamiz.
«MYU»ning munosabati
Portugaliyalik futbolchi "The Sun" nashriga bergan shov-shuvli intervyusidan so‘ng "MYU" uni yirik miqdorda jarimaga tortishga, u bilan shartnomani bekor qilishga, agar ish sudgacha yetib borsa, Ronaldu bilan sudlashishga ham tayyor edi.
Tomonlar o‘zaro kelishgan holda tinch yo‘l bilan shartnomani bekor qilishdi. Bu borada «MYU» shunday bayonot berdi: «Ronaldu o‘zaro kleishuvga ko‘ra klubni tark etadi. Klub Ronalduga "Old Trafford"gi ikki davrdan iborat samarali mehnati uchun minnatdorchilik bildiradi. Bu vaqtda u "MYU" safida 345ta o‘yinda ishtirok etib, 145ta gol urdi. Biz uning kelajakdagi ishlariga omad tilaymiz. «Manchester Yunayted»dagi barcha insonlarning bor e’tibori Erik ten Xag boshqaruvidagi jamoaning o‘sishi uchun xizmat qilishga qaratilgan».
Krishtianuning munosabati
Ronaldu ham o‘zining klubni tark etishiga izoh berdi: «Manchester Yunayted» bilan muzokaralardan so‘ng biz shartnomani muddatidan oldin bekor qilishga kelishib oldik. Men "Manchester Yunayted"ni va uning muxlislarni yaxshi ko‘raman - bu hech qachon o‘zgarmaydi. Shu bilan birga, men uchun yangi sinovlarni izlash vaqti kelganini his qilyapman. Jamoaga mavsumning ikkinchi qismida ham, kelajakda ham muvaffaqiyatlar tilayman».
Ronalduning "MYU"dagi yutuqlari
Portugaliyalik futbolchi «MYU» safida jami 7,5 yil to‘p tepdi. Bu ikkita davrdan iborat bo‘ldi: 2003-2009-yillar va 2021-2022 yillar. Bu yillar davomida u APLda 3 marta, Angliya liga kubogida 2 marta hamda Angliya kubogi, Angliya superkubogi, Yevropa chempionlar ligasi va klublar o‘rtasidagi jahon chempionatida bir martadan zafar quchgan. Shuningdek, Krishtianu o‘zining ilk «Oltin to‘p»ini aynan «MYU» safida olgan (2008).
O‘zi nima bo‘lgandi?
13 noyabr kuni britaniyalik jurnalist Pirs Morgan Krishtianu Ronaldu bilan intervyu qilganini e’lon qilib, berilgan tizerda futbolchining klub va bosh murabbiy Ten Xag haqida fikrlarini "qistirib" o‘tdi. Shundan so‘ng shov-shuv boshlandi.
Ma’lumotlarga qaraganda, Erik ten Xag hali intervyu e’lon qilinmasidan avval futbolchidan klubdan ketishi borasida qaror qabul qilib bo‘lgan. Klub rahbariyati esa futbolchini emas, murabbiyni qo‘llab-quvvatladi.
Ronaldu o‘z intervyusida klub va Ten Xagga nisbatan quyidagi e’tirozlarni bildirib o‘tdi:
— Erik ten Xag meni hurmat qilmaydi. Shuning uchun o‘rtamizda munosabat shunday tusga kirdi. U matbuot uchun munosabatlarimiz yaxshi ekanini aytib kelgan bo‘lsa-da, aslida unday emasdi.
— Yangi murabbiylar yangi uslublarni joriy qilishadi. Nima uchun bu kerakligini tushunmayman. Men jahonning eng yaxshi murabbiylari bilan birga ishlaganman: Zidan, Anchelotti, Mourinyu, Fernandu Santush, Allegri... Men ham ko‘p narsa bilaman.
— Nafaqat murabbiy, balki rahbariyatdagi ba’zi shaxslar mening klubdan ketishimni istashdi.
— Qizim kasal bo‘lgani uchun klubning yig‘iniga bora olmaganiga klub ishonmadi.
— Klub infratuzilmasi eskirgan.
— Yoshlar Krishtianu Ronaldudan o‘rnak olmaydi.
«MYU»ning g‘azabi
Klub ushbu intervyuni keskin qabul qildi. Jamoa Ronaldu jahon chempionatidan so‘ng klubga qaytmaslikni talab qila boshladi. «Yunayted» shartnomani bekor qilish borasida huquqshunoslar bilan maslahatlashuv ishlarini boshlab yubordi.
"MYU"dagi futbolchilar ham Krishtianuni qo‘llab-quvvatlashmadi.
Shartnoma bekor qilinishi oqibatida Krishtianu 16 mln funt daromaddan mahrum bo‘ldi.
Agar portugaliyalik o‘yinchi ortiqcha to‘lovlarsiz shartnomani bekor qilishga rozi bo‘lmasa, klub u bilan sudlashishga ham tayyor edi.
Ronaldu klubni tark etishni istamagan holatda jamoa Krishtianuni yoshlar jamoasida shug‘ullanishga "badarg‘a" qilardi.
Krishtianu Ronaldu Qatardagi jahon chempionatida klubsiz futbolchi sifatida o‘ynaydi. Uning agentlari yozda munosib klub topa olishmagandi. Qishki transfer paytida ular bu ishni uddalay olisharmikan? Ko‘ramiz.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
