Эрон ва Ўзбекистон миллий терма жамоалари ўйини тугагач stadion.uz сайти орқали ўйин шарҳи ҳақидаги мақолани ўқир эканман, ўйинга билдирилган фикрлар орасида бир мухлиснинг қуйидаги сўзлари эътиборимни тортди: «йиғладим, йиғлаяпман, йиғлайвераман». Тўғри, мухлислик қилиш учун ҳеч қандай меъёр, ўлчов ва талаблар ҳали ўйлаб топилганча йўқ, аммо ўз ҳиссиётларини кенг оммага борича етказиш учун ҳам мардлик керак. Биз кўзёш билан нишонлашга арзийдиган, тарихий ғалабага эришгандик ўшанда...
Мен Эрон билан ўйиндан кейин турли ҳисоб-китоблару, статистик маълумотлар билан сизни чалғитиб, миллий терма жамоамизнинг ЖЧга «олиб чиқиб» қўймоқчи эмасман. Аксинча, охирги пайтларда футболчиларимизда кузатилаётган ва Эрон билан ўйинда яққол намоён бўлган, сизу бизга бирдек манзур бўлаётган бир хусусияти ҳақида ўз муносабатимни ўртоқлашишни мақсад қилгандим.
Яхши эслайсиз, олдинлари энг катта муаммоларимиздан бири — легионерларимизнинг терма жамоа сафига етиб келиши эди. Сабаби легионерларимиз ҳаракат қилаётган клуб ўйинлари терма жамоанинг муҳим ўйинларига тўғри келиб қолиши, жароҳатлар, жисмоний чарчоқ ва шунга ўхшаш муаммолар бўларди бизда. Шу туфайли ҳатто айрим легионерларимизни «ватанпарварсизликда» айблаган пайтларимиз бўлган. Ким нима деса десин-у, миллий терма жамоа либосида тўп суриш ҳар бир футболчининг Ватани ва мухлислар олдидаги муқаддас бурчи, вазифаси, олий бахтидир. Ҳар ҳолда биз шундай тушунамиз. Шу тушунчаларимизни футболчиларга сингдиришга ҳаракат қиламиз. Аммо ҳар бир ҳаракати ва танлови учун футболчининг виждони жавоб бераверади.
Эрон билан ўйин олдидан барча легионерларимизнинг терма жамоа чақирувига «лаббай» дея жавоб бергани кўнглингизни кутарди, тўғрими? Ҳатто «Анжи» таркибида икки марта жароҳат олиб, етарли ўйин амалиётига эга бўлмасдан, майдонга тушиши сўроқ остида туришига қарамасдан терма жамоа йиғинига етиб келган Одил Аҳмедовнинг фидойилигига, мардлигига тан бермай илож йўқ. Бу йил Қозогистон чемпионати тўпурари бўлган ва ўз жамоаси билан мамлакат кубоги финалига чиққан Улуғбек Бақоев кубок финалини эмас, терма жамоанинг ўйинига етиб келиши мардлик эмасми? Зеро, ушбу ўйинда Қосимов бошқача тактика танлаб, Бақоев гол уруш тугул, ҳатто майдонга тушмаслиги хам мумкин эди. Худди шунингдек, Виталий Денисов ҳам “Днепр” билан тур ўйинини кутиб ўтирмасдан, эртароқ терма жамоага етиб келгани тахсинга сазовор.
Яқинда машҳур бир футболчининг қачонлардир айтган қуйидаги сўзларини ўқиб қолдим: «Қандайдир натижа ҳақида ўйлаш болаликда бўлади, ҳозир эса фақат – НАТИЖА!» Давлатимиз мустақилликка эришганига 21 йилдан ошди. Шукрки, бу вақт оралиғида эришган натижаларимиз билан футбол оламида ўз мавқеимизга, ўз ўрнимизга ва ўз сўзимизга эга бўлдик. Шундай экан, мундиалга чиқиш ва муносиб иштирок этишни асосий мақсад қилиб ишга киришадиган пайтга етиб келдик. Бу мақсад йўлида ҳар бир мутахасису футболчидан тортиб, оддий мухлислардан ҳам ўзига хос мардлик талаб этилади. Сиз бунга тайёр туринг!
Дилшодбек Жуманиёзов
Элликқалъа тиббиёт коллежи ўқитувчиси
(VIQOR никли мухлис)
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бунёдкор
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
