Ўзбекистон Футбол федерацияси Ижроия қўмитаси Ўзбекистон терма жамоаларининг 2013 йилги иш ва тадбирлар режаларини тасдиқлади. Қарор ЎФФ Президенти Мираброр Усмонов томонидан имзоланди.
Ўзбекистон терма жамоаларининг 2013 йилдаги масъулиятли мусобақаларга муносиб тайёргарлик кўришига кўмак берувчи Қарорга кўра, Терма жамоалар маркази ва тегишли мутахассислар билан ҳамкорликда миллий, ёшлар (U-22 ва U-19), ўсмирлар (U-17, U-16 ва U-14), футзал, аёллар (U-16) ва ампутантлар терма жамоаларининг халқаро мусобақаларга тайёргарлик кўриш ва ана шу тайёргарлик жараёнларида иштирок этадиган мураббийлар штаби вакиллари билан тегишли меҳнат шартномаларини имзолаш белгилаб қўйилган. Ижроқўм қарори асосан келаси йили халқаро мусобақаларда иштирок этадиган терма жамоаларнинг фаолиятини қамраб олган.
Ўзбекистон миллий терма жамоаси янги мавсумга тайёргарликни 19 январь куни Тошкентда бошлаб, 21 январь – 2 февраль кунлари БААда ўқув-машғулот йиғинларини ўтказади. Йил давомида ЖЧ-2014 саралаш ва Осиё Кубоги-2015 саралаш босқичи доирасидаги расмий ўйинлардан ташқари, Қосимов шогирдларининг саралаш ўйинларидаги иштирокидан келиб чиқиб, март-ноябрь ойларида олтита ўртоқлик учрашувида майдонга тушиши режалаштирилган.
Ўзбекистон U-20 ёшлар терма жамоаси 2013 йилнинг 21 июнь – 13 июль кунлари Туркияда бўлиб ўтган ёшлар ўртасидаги жаҳон чемпионатида иштирок этади. Аҳмаджон Мусаев шогирдлари мусобақагача бўлган ярим йиллик давр ичида Ўзбекистон ва хорижда жами 6та ўқув машғулоти йиғини ўтказишлари, 26та ўртоқлик-назорат учрашувларида майдонга тушишлари кўзда тутилган. Ушбу ўйинлардан 13таси халқаро ўртоқлик учрашувлари мақомида ўтказилиши режалаштирилган. Маълумот ўрнида, терма жамоа январь ойида Ҳамдўстлик Кубоги баҳсларида иштирок этади.
Ўзбекистон U-17 ўсмирлар терма жамоаси 17 октябрь – 8 ноябрь кунлари БААда ташкил этиладиган ўсмирлар ўртасидаги жаҳон чемпионати баҳсларида иштирок этади. Дилшод Нуралиев шогирдлари бўлажак муҳим баҳсларга муносиб тайёргарлик кўришлари учун йил давомида Ўзбекистонда ва хориж мамлакатларида жами 9та ўқув-машғулот йиғинларини ўтказиб, уларда 30дан ортиқ ўртоқлик-назорат ўйинларида иштирок этишлари кўзда тутилган. Режа бўйича, Ўзбекистон ўсмирлар терма жамоаси иккита халқаро мусобақада ҳам иштирок этади.
Бош мураббий Темур Алимхўжаев қўл остидаги Ўзбекистон U-16 ўсмирлар терма жамоаси 2013 йилда 2014 йилги ўсмирлар ўртасидаги Осиё чемпионати саралашида, Ўзбекистон U-14 ўсмирлар терма жамоаси 2014 йилги U-14 Осиё чемпионати саралаш баҳсларида иштирок этади. Ушбу баҳсларга тайёргарлик кўриш мақсадида 1998 йилда туғилган ўсмирлардан иборат Ўзбекистон терма жамоаси хориж мамлакатларида ташкил этиладиган халқаро мусобақаларда иштирок этиши, шунингдек, Тошкентда терма жамоалар иштирокида ўртоқлик-назорат ўйинлари ташкил этилиши режалаштирилган. Умумҳисобда, Ўзбекистон U-16 терма жамоаси йил давомида 30га яқин, 2000 йилда туғилган ўсмирлар терма жамоаси эса 20дан ортиқ ўртоқлик-назорат учрашувлари ўтказиши кўзда тутилган.
Ўзбекистон U-16 қизлар терма жамоаси 2013 йил Хитойда бўлиб ўтадиган Осиё чемпионати йўлланмасини қўлга киритган бўлиб, сентябрь ойида бўлиб ўтадиган расмий мусобақага тайёргарлик доирасида 10та ўқув-машғулот йиғинларини ўтказади, улардан иккитаси эса хорижда ўтказилиши режалаштирилган.
Амалдаги жаҳон чемпиони ҳисобланган Ўзбекистон ампутантлар терма жамоаси 2013 йилда камида бешта ўқув-машғулот йиғинларини ташкил этади, шунингдек, Россия ва Эронда бўлиб ўтадиган халқаро мусобақаларда иштирок этади.
Ўзбекистон Футбол федерацияси Президенти Мираброр Усмонов терма жамоаларнинг 2013 йилги иш режаларига бағишланган Мураббийлар Кенгаши мажлисида 2012 йилги муваффақиятлани таҳлил қиларкан, жумладан, шундай деди: «Бир неча йил аввал фалон жойда янги стадион бунёд этиш, бирор бир футбол мактабини қуриш ҳақида бош қотирган бўлсам, бугун фақат бир нарса ҳақида – терма жамоаларимиз қўлга киритаётган натижалардан юлдузлик касалига чалинмасликлари, бу ютуқларга алданиб қолмасликлари ҳақида ўйлаяпман».
2013 йил Ўзбекистон терма жамоалари учун мусобақаларга бой, энг муҳим даврлардан бири бўлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
