Олий лиганинг 1-туридан ўрин олган "Сўғдиёна" ва "Бунёдкор" жамоалари ўртасидаги баҳс аслида жиззахликларнинг майдонида бўлиб ўтиши керак эди. Аммо "Сўғдиёна" стадионига мавсум шай бўлмагани учун уларнинг илтимосига кўра Тошкентга — "Жар" стадионига кўчирилди.
Ушбу кўчирилишдан мухлислар хабардор бўлишмаган шекилли, "Жар"га у қадар кўп мухлис ташриф буюрмади. Ушбу баҳс мавсумнинг илк ўйини бўлгани учун давлатимиз мадҳияси садолари остида жамоа сардорлари мамлакатимиз байроғини кўтаришди.
Таркиб жиҳатдан ёш ва унчалик тажрибали бўлмаган "Сўғдиёна"нинг "қалдирғочлар"га қаршилик қила олмаслиги олдиндан маълум эди. Аммо 12-дақиқада жиззахликлар сардори Жамил Кимсановнинг майдондан четлатилиши амалда ўйин тақдирини ҳал қилиб қўйди. Бу вазиятда Жамил дарвоза чизиғи устида дарвозага кириб кетаётган тўпни қўли билан қайтариб қолганди. Александр Пишур эса пенальтини аниқ амалга ошириб, ҳисобни очди. 28-дақиқага келиб жиззахликлар дарвозасига пенальти белгилади. Ҳимоячилардан бири ўз жарима майдончаси ичида Пишурга нисбатан қўполлик ишлатди. Бу галги пенальтини ҳам украиналик ҳужумчининг ўзи амалга оширди ва ҳисобни 2:0га етказди. Орадан 3 дақиқа ўтиб, Лутфулла Тўраев қанотдан ошириб берилган тўпни яқин масофадан дарвозага йўллади ва биринчи бўлимдан сўнг ҳисобнинг 3:0 бўлишини таъминлади.
Иккинчи бўлимда ҳам ўйин суръати ўзгармади — ўйин бир дарвоза атрофида кечди. Александр Пишур яна бир гол киритиб, ўйинда "хет-трик"ка эришган бўлса, захирадан майдонга тушган Камолиддин Мурзоев бош билан дарвозани ишғол қилди. Якуний ҳисоб — 5:0.
ОЛИЙ ЛИГА. 1-ТУР.
БУНЁДКОР - СЎҒДИЁНА - 5:0 (3:0)
Голлар: Александр Пишур (13-пенальти, 28-пенальти, 71), Лутфулла Тўраев (32), Камолиддин Мурзоев (87)
Огоҳлантиришлар: Луфтулла Тўраев (8), Марко Блажич (51) Хайрулла Каримов (90)
Четлатиш: Жамил Кимсанов (12)
"Бунёдкор": Игнатий Нестеров, Хайрулла Каримов, Анвар Ғофуров, Марко Блажич (Алибобо Раҳматуллаев 72), Жавлон Иброҳимов, Александр Пишур, Лутфулла Тўраев (Камолиддин Мурзоев 56), Фозил Мусаев, Саҳоб Жўраев (Жасур Ҳасанов 46), Олег Зотеев
"Сўғдиёна": Александр Меленчук, Жаводулла Ибрагимов (Расул Ҳайитов 65), Илҳом Комилов, Муроджон Тошматов, Ботиржон Каримжонов, Хуршид Йўлдошев, Зафар Нарзиқулов, Жамил Кимсанов, Ренат Байрамов (Сирож Ҳамроев 74), Анвар Раҳимов (САмандар Рашидов 90), Элёр Орипов
Бош ҳакам: Бахтиёр Намозов
Матнда хатолик топсангиз, ўша хатони белгилаб, бизга жўнатинг (Ctrl + Enter).