Ўзбекистон Суперлигасининг 6-туридан ўрин олган баҳсда "Навбаҳор" Термизда “Сурхон” меҳмони бўлди.
Мазкур учрашувнинг қизиқарли тарзда кечиши олдиндан маълум эди. Боиси, гарчи мезбонлар жорий мавсум беллашувларини омадсиз ўтказаётган бўлишсада, етакчи жамоаларга муносиб қаршилик кўрсата олишарди. Наманганликлар ҳам сафар учрашувларини яхши ўтказишаётганди. Шу боис, ушбу ўйинга қизиқиш юқори эди.
Учрашув кутилганидек, илк дақиқаларданоқ кескин курашлар остида бошланди. Ўйинни фаол тарзда бошлаган мезбонлар рақиб дарвозаси олдида бир қатор хавфли вазиятларни юзага келтиришди. Жумладан, “учар тулпорлар”нинг илк ҳужумида Муҳаммадали Абдураҳмоновнинг зарбаси ҳимоячиларга тегиб, майдонни тарк этди. Яна бир вазиятда эса "Навбаҳор" ҳимоячилари тўпни дарвоза чизиғи устидан қайтаришди.
Февзи Давлетов шогирдларининг яна бир ҳужумида эса ярим ҳимоячи Достонбек Турсуновнинг зарбасидан сўнг, тўп дарвоза тўсини тепасидан ўтиб кетди.
Шундан сўнг, Сергей Лушан шогирдлари секин-аста ўйинни ўз қўлларига олишга интилиб, ҳужумни кучайтиришди. “Лочинлар”нинг ҳужумлари давомида Русланбек Жияновнинг узоқ масофадан йўллаган зарбасидан сўнг, “Сурхон” дарвозабони Артём Потапов тўпни қийинчилик билан қайтарди.
Майдон эгаларининг навбатдаги ҳужумларидан бирида эса тўп дарвоза тўсинига тегиб, майдон ташқарисига чиқиб кетди.
"Навбаҳор"нинг навбатдаги ҳужумларидан бирида эса Пўлатхўжа Холдорхоновнинг боши билан дарвозага йўллаган зарбаси ноаниқ кўриниш олди. Учрашувнинг 1-бўлимига тўхталишлар учун ҳакам томонидан қўшиб берилган дақиқаларда ҳам “Сурхон”нинг ҳужуми ва бурчак зарбаси хавфли кўриниш олди. Аммо якуний зарбаларга аниқлик етишмади. Натижада жамоалар танаффусга нурсиз дуранг – 0:0 ҳисобида чиқиб кетди.
Учрашувнинг 2-бўлимида одатдагидек, ҳар икки жамоа таркибида бир қатор ўзгаришлар юз берди ҳамда бу иккинчи 45 дақиқаликнинг боришига ўз таъсирини ўтказди ва гоҳ у, гоҳ бу жамоа дарвозаси олдида хавфли вазиятлар юзага кела бошлади.
Таъкидлаш жоизки, иккинчи бўлимни Сергей Лушан шогирдлари фаол тарзда бошлаб, термизликлар дарвозаси олдида бир қатор вазиятларни юзага келтира бошлашди. Аммо Забиҳилло Ўринбоев ва Сергей Карпович имкониятни қўлдан бой беришган бўлса, Шоҳмалик Комиловнинг узоқ масофадан йўллаган зарбаси ноаниқ чиқди.
Мезбонларнинг ҳужумларидан бирида эса Муҳаммадали Абдураҳмоновнинг зарбасига аниқлик етишмади.
“Лочинлар”нинг ҳужумларидан бирида Алишер Одиловнинг боши билан йўллаган зарбасидан сўнг, тўп дарвоза устуни ёнидан ўтиб кетди.
“Сурхон”нинг ҳужумларидан бирида захирадан майдонга тушган Кирилл Колесниченко зарбаси бироз ноаниқ чиқди.
Учрашувнинг 85-дақиқасида термизликларнинг бурчак зарбасидан сўнг, “Сурхон” ҳужумчиси Абдуғафур Ҳайдаровга нисбатан меҳмнолар жарима майдончаси ичида ўйин қоидаси бузилди деб топилди ва учрашув бош ҳаками Наим Қосимов "Навбаҳор" дарвозасига 11 метрли жарима зараси белгилади. Пенальтини “Сурхон”нинг россиялик ярим ҳимоячиси Кирилл Колесниенко амалга оширди ҳамда унинг зарбасидан сўнг, наманганиклар посбони Шукрон Йўлдошев тўпни ушлаб олди. Аммо, орадан 2 дақиқа ўтар-ўтмас, Колесниченко жарима майдончаси ташқарисидан кучли ва аниқ зарба йўллаб, ҳисобни очди – 1:0.
Учрашувнинг сўнгги дақиқалари ҳамда ўйиндаги тўхталишлар учун ҳакам томонидан қўшиб берилган дақиқаларда “лочинлар” мувозанатни тиклаш мақсадида, ҳужумни кучайтиришди. Лекин якуний зарбаларга аниқлик етишмади. Натижада "Сурхон" 1:0 ҳисобида ғалаба қозонди ҳамда ўз очколарини 8 тага етказиб олди. "Навбаҳор"нинг очколари эса 8 талигича қолди.
Суперлига. 6-тур
“Сурхон” – “Навбаҳор” - 1:0 (0:0)
21 апрель. Термиз. “Сурхон – арена” стадиони. 8457 томошабин.
Гол: Кирилл Колесниченко (87).
Ноаниқ амалга оширилган пенальти: Кирилл Колесниченко (85, дарвозабон).
“Сурхон”: 1.Артём Потапов, 3.Суннатуллох Хамиджонов, 4.Нодирхон Неъматов (5.Жамалиддин Хожаниязов, 46), 6.Беҳзод Шамсиев, 7.Достонбек Турсунов, 10.Дмитри Плетнев (15.Диёр Рамазонов, 79), 19.Муҳаммадали Абдураҳмонов (11.Абдуғафур Ҳайдаров,59), 24.Шерзоджон Комилов (88.Дмитри Кратков, 63), 27.Асилбек Жумаев, 66.Беҳруз Шайдулов, 99.Суннатилло Поёнов (9.Кирилл Колесниченко,59).
“Навбаҳор”: 16. Шукрон Йўлдошев, 7.Азимжон Аҳмедов (8.Шоҳмалик Комилов,46), 10.Шаҳзодбек Убайдуллаев (37.Алишер Одилов,46), 11.Пўлатхўжа Холдорхонов (9.Забиҳилло Ўринбоев,46), 12.Саидазамат Мирсаидов, 13.Бенжамин Тейди, 17.Русланбек Жиянов, 33.Сергей Карпович, 36. Гильерме Гедеш, 70.Аббосжон Ғуломов (29.Педро Аугусто Габрал Карвальо,74), 99.Игорь Габриэл.
Огоҳлантиришлар: Йўқ - Г.Гедеш (70), Игорь Габриэл (90+2).
Ҳакамлар: Наим Қосимов, Фарҳод Усмонов, Элнур Дониёров, Шоҳинур Бойматов.
VAR ҳаками: Фирдавс Норсафаров.
АVAR: Зилола Раҳматова.
Назоратчи: Зокир Қодиров.
Комиссар: Ойбек Икромов.
“Навбаҳор” ПФК матбуот хизмати.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
