Украинанинг «Шахтёр» ва «Динамо» клубларининг собиқ мураббийи, ҳозирда Руминия терма жамоасига бошчилик қилаётган Мирча Луческу 2026 йил ёзида ушбу лавозимни тарк этишини маълум қилди.
AS.ro нашрининг хабар беришича, 79 ёшли мутахассис яқинда мамлакат футбол федерацияси раҳбарияти билан суҳбат ўтказиб, жаҳон чемпионати–2026 саралаш натижаларидан қатъи назар, терма жамоани тарк этишга қарор қилганини билдирган.
Агар Руминия жаҳон чемпионатига йўлланма олса, Луческу мусобақа якунигача жамоа бош мураббийи сифатида ишлашда давом этади. Агар терма жамоа саралашни ўта олмаса, у сўнгги саралаш учрашувидан сўнг лавозимини тарк этади.
Бу қарорга асосий сабаб сифатида тажрибали мутахассис ўз ёшини кўрсатмоқда — жорий ойда у 80 ёшга тўлади.
Руминия терма жамоаси бош мураббийлигига Евро–2024 турниридан кейин Луческунинг ўрнига келган Эдвард Йорданеску қайтиши мумкин. 47 ёшли мутахассис Европа чемпионатдан сўнг жамоани тарк этган, ҳозирда эса Польша клуби «Легия»ни бошқармоқда. У асосий номзод сифатида кўрилмоқда.
Эслатиб ўтамиз, Руминия ЖЧ–2026 саралаш босқичида шу пайтгача 4 та ўйин ўтказди: Босния ва Герцеговинага 0:1 ҳисобида ютқазди, Сан-Маринони 5:1 ҳисобида мағлуб этди, Австрияга 1:2 ҳисобида имкониятни бой берди ва Кипр устидан 2:0 ҳисобида зафар қучди. Айни пайтда Луческу шогирдлари гуруҳда 3-ўринни эгаллаб турибди.
Матнда хатолик топсангиз, ўша хатони белгилаб, бизга жўнатинг (Ctrl + Enter).