«А»сериядаги муваффақиятсиз мавсумдан сўнг бор умидини Клублар ўртасидаги жаҳон чемпионатига қаратган «Ювентус» АҚШда ҳам айтарли каромат кўрсата олгани йўқ. Аниқроқ айтсак, турнирнинг 1/8 финалида қудратли «Реал»га дуч келган Турин суперклуби муддатидан анча эрта ортга қайтди. «Кекса синьо­ра» сардори Мануэль Локателли Mediaset телеканали ижодкорлари билан суҳбат чоғи айнан КўЖЧ-2025 якунларига тўхталиш баробарида янги мавсум масаласида фикр билдирди.

- «Ювентус» КўЖЧ-2025да ҳам кўзланган мақсадга етолмади. Айтингчи, «Реал»­га қарши кечган нимчорак финал ўйинида сизларга айнан нима етишмади?

- Биринчидан, бу босқичда турнирнинг энг кучли клубларидан бири билан ўйнадик. Ҳа, якунда мағлубиятни тан олдик, лекин ғалаба учун бор куч-имкониятимизни ишга солдик. Нима етишмади? Ҳаммаси оддий: рақиб гол урди, биз эса йўқ. Мағлубиятнинг асосий негизи шу. Аслида бутун вақт давомида чакки ҳаракатланмадик. Айниқса, «Сити»га қарши кўрсатилган расво ўйин фонида «Реал»га муносиб кураш тақдим этдик. Ҳа, натижа ижобий кўриниш олмади, шунга қарамай, ўша баҳсдаги тириш­қоқлик учун йигитларни бемалол олқишлайман.

- Хўш, АҚШда «Реал»га қарши кечган ўйинда ҳақиқий «Ювентус»ни кўрдикми ёки жамоа бундан кўпроғига қодир?

- Қайтараман, мусобақа биз учун муваффақиятсиз якунланди, лекин муайян ўйинлардаги ҳаракатимиздан тўла қониқдик. Йигитларнинг ҳар бир учрашувга чинакам жонкуярлик билан ёндашишганига шубҳа йўқ. Лекин афсуски, футболда тоза виждон билан ўйнашнинг ўзи ҳеч нарсани анг­латмайди. Яъни ҳаммаси аввало, натижа билан баҳоланади. Айниқса, «Ювентус»дек клуб учун бундай турнирлардан эрта чиқиб кетиш асло ярашмайди. Майдонда боримизни берганимизни ҳамма кўрди, буни ўзимиз ҳам биламиз. Лекин жамоа ўйинига руҳият қўшишимиз ва натижа кўрсатишимиз шарт.

- Энди ортда қолган мавсум хулосаларига тўхталсангиз... 

- Тўғрисини айтаман, узоқ ва шиддатли мавсум барчамизни роса чарчатди. Муҳими, ҳар бир турнирда боримизни бердик, имкон қадар катта марра сари интилдик. Энди йўқотилган энергия ўрнини тезроқ тўлдиришимиз керак. Шундагина янги мавсумга етарли куч ва иштиёқ билан қайтамиз. 

- «Ювентус» янги мавсумда қандай марраларни кўзлаши юзасидан яхлит тасаввур борми? 

- Ҳозирдан катта гапириш ярамайди. Янги мавсум - бу янги саҳифа ва ишонч. Лекин айни пайт энг муҳими - барча кўнгилсизликларни ёддан чиқариш, саломатликни тиклаш ва куч жамлаш. Ахир биз ҳам футболдан маълум муддатга узоқлашиб, мириқиб ҳордиқ чиқаришга ҳаққимиз бор. 

- Охирги савол: бугунги «Ювентус» дейлик, «Реал» ва «Манчестер Сити»дан қай даражада орқада қолмоқда? Катта клублар билан бир қаторда туриш учун нималарга эътибор қаратиш керак? 

- Тан олиб айтиш керак, «Реал» ҳам, «Сити» ҳам ҳозир индивидуал ижрочилари ҳисобига биздан кучлироқ. Мисол учун, «Реал» ярим ҳимоясида Вальверде ва Беллингемдек етук футболчилар бор. Оддий ифода этсак, «Юве»нинг таркиби бироз камтарроқ. Шубҳасиз, замонавий футболда индивидуал савия кўп нарсани англатади. Шунинг баробарида тўғри ёндашув ҳамда жамоавий бирдамлик эвазига ҳам кўп нарсаларга эришиш мумкин. Менимча, биз айни ҳолатда гранд жамоаларга фақат руҳий тайёргарлик ва мукаммал жамоавий ўйин эвазигагина муносиб рақобат кўрсата оламиз. 

Манба: jufc.ru, ХУРШИДБЕК тайёрлади