Ўзбекистон Суперлигасининг 27-туридан ўрин олган «Навбаҳор» – «Насаф» (0:0) учрашувидан кейинги матбуот анжуманининг иккинчи қисмида қаршиликлар бош мураббийи Рўзиқул Бердиев қатнашиб, журналистларнинг саволларига жавоб берди. «Аждарлар» устози одатдагидек, ўз сўзини ўйин ҳақидаги фикрлари билан бошлади.
— «Навбаҳор» бугун 5-4-1 схемасида ўйнаб, яхши ҳимояланди. Рақибнинг режаси яхши ҳимояланиш бўлгани кўриниб турди. Позицион ҳужумларда вазият ярата олдик. Биринчи бўлимда гол уриб олганимизда ёки иккинчи 45 дақиқаликда Чераннинг тепган тўпи дарвоза тўсинига тегмасдан, гол бўлганида ишимиз анча енгиллашарди. Тўғри, Наманганга уч очкони кўзлаб келгандик, лекин яхши ўйин ва бир очко учун ҳам шогирдларимга раҳмат айтаман. Дуранг қониқарли натижа эмас, аммо кураш давом этапти. Бу охири эмас.
— Бугунги баҳсда чемпионликка бўлган ҳаракат ва шахт майдондаги ўйинчиларда эмас, кўпроқ сизда кўринди. Бу ҳақда нима дея оласиз? Иккинчи саволим: ўтган турда ОКМК билан бўлган баҳсдан кейинги матбуот анжуманида баъзи гапларни гапирдингиз. Масалан, «Нефтчи» чемпионликни қўлга киритадиган бўлса, буни жамоа ортида турганлар амалга оширишини айтиб ўтдингиз. Бу гапни ҳаммаям айта олмайди. Сиз эса мард бўлиб гапирдингиз. Келинг, ҳаммасига шаффоф қараб, шуни изоҳлаб берсангиз...
— Бу қийин нарса эмас. Биласиз, мен кўп ҳам сайтларни кузатмайман ва унчалик эътибор бермайман. Ўйлашимча, гапимни нотўғри тушуниб, анча гапларни ёзишибди.
Биринчи саволга келсак, бугунги ўйинда иштиёқ менда ҳам, футболчиларда ҳам бор эди. Ўзингиз кўрапсиз, ҳар тўрт кунда майдонга тушапмиз. Бу жуда оғир. Бундай пайтда жамоани тайёрлаш қанчалик оғир эканини олдин ҳам айтиб ўтгандим.
Ҳозир Қаршига қайтиб, дам олмасдан, кейинги учрашув ҳақида ўйлашимизга тўғри келади. Қайси таркибни майдонга тушираман, бу ҳам масала. Чарчоқ ўз сўзини айтапти. Агар тўлиқ тетик ҳолатда бўлганимизда, янада зўр ўйин кўрсатган бўлардик. Лекин жамоамиздаги ҳаммада шахт бор, чемпионликни сақлаб қолишга ҳаракат бор.
Иккинчи саволга келадиган бўлсак, бу ерда яширадиган нарса йўқ. Мен ҳар бир клубнинг меҳнатини қадрлайман. Шу жумладан, «Нефтчи»нинг ҳам. Нима демоқчи бўлганимни тушунтираман: «Нефтчи»ни ОКМКГА қарши кечган баҳсда 20 минг мухлис қўллаб турди. Кейин «Нефтчи» Ғузорга бориб, «Шўртан» билан ўйнади ва у ерда ҳам мухлислари қўллаб турди. Сўнгра, ишқибозлар Тошкентга келиб, у ердан Олмалиққа бориб, бизга қарши мухлислик қилишди. Мана бугун ҳам 5 минг атрофида «Нефтчи» ишқибози ўйинга келди. Бу қаҳрамонлик эмасми?
Лекин одамлар айтган гапларимни фақат негатив томонга буришди. Мен мухлисларни қаҳрамон сифатида кўрсатмоқчи эдим. Мана бугун ҳам беш минг ишқибоз бизга қарши мухлислик қилди. Бу қаҳрамонлик эмасми? Бу ўз жамоасига ёрдам эмасми? Раҳбариятнинг шунча шароит яратиб бераётгани қаҳрамонлик эмасми? Нима учундир ҳамма негатив томонини қидириб кетди.
Эртага ким чемпион бўлса ҳам меҳнатини қадрлаймиз. Чунки чемпионлик ўз-ўзидан рўй бериб қолмайди. Афсуски, ҳеч ким масалага бу томондан ёндашмаяпти. Мухлисларни назарда тутгандир, деб ҳеч ким яхши томонига қарамади. Тасаввур қилинг, ОКМК билан ўйинда икки мингга яқин «Нефтчи» мухлиси жамоамизга қарши мухлислик қилди. Биз эса уларни муҳокама қилиб ўтирдик. Кечирасизу, менинг гапларимда ортиқча ҳеч нарса йўқ эди, фақат нотўғри тушуниб пашшадан фил ясашди.
— «Насаф» бу йил ҳам чемпионликка курашяпти. Ўтган йили жамоа ўз тарихида биринчи бор чемпион бўлганди. Ўтган йилги чемпионлик йўлидаги ҳаракат билан бу йилги чемпионликни сақлаб қолиш ўртасида қандай фарқ бор? Бу босим юкламаяптими?
— Ўтган мавсумда бошқалардан ҳар жабҳадада устун эдик, деб ўйлайман. Шунинг учун уч-тўрт тур қолганида чемпионликни нишонлагандик. Бу йил эса чемпионлик учун курашадиган жамоалар кўпайди. Қолаверса, ўртамиёна клубларнинг ҳам ўйини кучайди. Улар ҳам очко ола бошлади. Масалан. бугун «Навбаҳор» анча жиддий курашди.
— Рақамларга эътибор берсак, «Насаф»да ҳар йил охирига келиб, натижа пасайиб қоляпти. Бу анъанага айланиб қолмаяптими?
— Охирги икки йилни оладиган бўлсак, чиндан ҳам охирги турларни барқарор ўтказа олмадик. Ўтган йили ҳам чемпион бўлганимиздан сўнг, қолган баҳсларда ўйинимиз чиқмади. Айтганингиздек, йиллар такрорланаётганига ўхшайди. Таркиб кенг бўлмаса, шунақа қийинчиликлар бўлаверар экан. Ҳам ўзимизда чемпионликни ўйлаяпман, ҳам Осиёда яхши қатнашишни. Бу жуда қийин иш. Бугун ўйнаган жамоамиз толиқиб бўлди. Икки кундан кейин эса навбатдаги баҳс кутмоқда ва энг яхши таркибни аниқлаб олишимизга тўғри келади.
— Нима деб ўйлайсиз, чемпионлик пойгаси тугадими?
— Тугагани йўқ, нега энди тугаши керак? Ҳозирги пайтда биринчи ўриндамиз. Нима учун бизни ҳисобдан чиқаришапти? Ҳали кураш тугагани йўқ. Ҳаммада имконият бор.
— Бугун Ойбек Бозоров майдонда кўринмади...
— Ҳа, у қаттиқ бетоб бўлиб қолди. Шу боис қайдномага киритмадик.
— Бугун «Навбаҳор» сафида энг яхши ўйин кўрсатган футболчи ким бўлди?
— Рақиб таркибида ҳамма ўзининг яхши ўйинини кўрсатишга ҳаракат қилди. Шу боис жамоадаги барча таҳсинга лойиқ.
«Навбаҳор» ПФК матбуот хизмати.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
