«Барселона» президенти Жоан Лапорта «Реал»ни танқид қилди, шунингдек, суднинг "Қироллик клуби"га "кўк-анорранглилар" молиявий ҳужжатларига кириш ҳуқуқини бермагани ҳақидаги қарорини изоҳлади. Ушбу сўров «Барселона»га Испания Қироллик футбол федерацияси (RFEF) тизимида ишлаган ҳакамлар техник қўмитасининг (CTA) собиқ вице-президенти Хосе Мария Энрикес Негрейрага қилинган тўловлар бўйича пора бериш айбловлари билан боғлиқ эди.
«Бу — нормал ҳолат эмас, рақиб клуб ҳақида маълумот олиш учун суд жараёнидан фойдаланиш клуб учун мутлақо ярашмайдиган хулқ-атвор. Бу ўринсиз эди ва судья ҳам буни худди шундай қабул қилди. Биз аллақачон биламиз, барчамиз биламиз — буларнинг барчаси “Барса”ни издан чиқариш ва обрў-эътиборимизга путур етказиш учун уюштирилган. Ҳукм чиқарилишидан олдиноқ бизни айбдор деб аташяпти, аммо улар биз ҳеч қандай қонунбузарликка йўл қўймаганимизни кўришади. Ишонаманки, бу иш яқин вақт ичида ёпилади.
«Реал» “Барса”га оид махфий маълумотларни қўлга киритишга уриниб, ўринсиз ҳаракатлар қилмоқда, шу сабабли уларнинг сўрови асоссиз эди. Бундан ҳам кўпроғини айтаман: бу ҳолатда улар ўзлари ҳам ёлғон эканини биладиган даъволарни қўллаб-қувватлашга, шунингдек, ўз телевидениесида айтиб келаётган гапларини мустаҳкамлашга уринмоқда. Улар айтмоқчи бўлаётган нарсаларни тасдиқлайдиган ҳеч қандай далил бўлмайди. «Барса» ҳеч қачон ҳакамлардан манфаатли муносабатга эришиш орқали мусобақани манипуляция қилишга уринмаганини аллақачон намойиш этган. Судья “Реал”нинг юзига эшикни ёпиб қўйганидан хурсандман.
Улар ишни чўзишга уринаётганини кўряпмиз, гарчи ҳеч нарса бўлмаганини яхши билишса-да. Биздан яхшироқ бўлиш учун эса меҳнат қилиш, курашиш ва ҳаммасини тўғри бажариш керак, бу эса доим ҳам уларда уддаланавермайди», — дея Лапортанинг сўзларини келтиради Mundo Deportivo.
Матнда хатолик топсангиз, ўша хатони белгилаб, бизга жўнатинг (Ctrl + Enter).