Қаҳрамонимиз ўзининг ажойиб ўйини билан футбол ишқибозларининг қалбидан чуқур жой эгаллаган. Гарчи ҳозирда ўйини унчалик қовушмаётган бўлса-да, унинг футбол борасидаги тажрибаси ва эришган ютуқлари ҳавас қилса арзигулик даражада. Бугунги саҳифамизда фаолияти давомида қатор жамоаларда тўп сурган, ҳозирда қироллик клуби сафида ўйнаётган футболчи — бразилиялик Рикардо Изексон дос Сантос Лиете, яъни Каканинг ишқибозларга маълум ва номаълум жиҳатларига тўхталиб ўтамиз.
ФУТБОЛ ЖАМОАСИДА СТОЛ ТЕННИСИ
Кака 1982 йилнинг 22 апрелида Бразилияда муҳандис Боско Лиете ва бошланғич мактаб ўқитувчиси Симоне дос Сантос оиласида туғилди.
Унинг оиласи Сан-Паулу шаҳрига кўчиб ўтгач, болакайнинг ҳаёти ўзгариб кетади. Кака маҳаллий «Алфавилле» ёшлар футбол клубига чақирилади. Кака ўз клуби билан маҳаллий турнирнинг финал босқичигача етиб бориб, унинг шу мусобақада кўрсатган ажойиб ўйини футбол мутасаддиларининг эътиборини тортади. Оқибатда ёш ўйинчи «Сан-Паулу» таркибига жалб қилинади.
Эътиборли жиҳати, Кака бу клубга келганида дастлаб футбол эмас, балки стол тенниси ўйнайди. Янги жамоадошлари билан ўйналган стол тенниси футболчининг хотирасида бир умрга муҳрланиб қолади. Унинг ўзи эса ҳазил аралаш: «Бу менинг янги клубимдаги энг яхши ўйиним», дея таъкидлайди. Кака кейинчалик «Милан» таркибида ҳам тўп суради.
ФАЛАЖ БЎЛИБ ҚОЛИШИ МУМКИН ЭДИ...
Кака футболдан бўш вақтларида сузиш билан шуғулланишни ёқтирарди. Шу боисдан машғулотлардан сўнг сузиш ҳавзасига шошиларди. Бироқ айни шу қизиқиши унга қимматга тушди. Чўмилиш ҳавзасига борган футболчи кутилмаганда мувозанатини йўқотиб, қаттиқ йиқилиши натижасида орқа мияси шикастланади. Шифокорлар бир қатор текширувлардан сўнг унинг қайтиб футбол ўйнай олмаслиги ва ҳатто фалаж бўлиб қолишини айтишади. Аммо тақдирни қарангки, Кака соғайиб, оёққа туриб кетади. Рикардо ўшанда бир ўлимдан қолганлиги ва бу ҳаётидаги мўъжиза эканлигини таъкидлайди.
АКАСИ ЖУДА ҚИЙНАЛГАН
Футболчининг исми жуда узун ва мураккаб. Бу эса унинг акаси Диего дос Сантосга муаммо туғдирган. У ҳатто укасини Рикардо деб айтишга қийналган. Шунинг учун Рикардони кейинчалик машҳур қилган лақаби — Кака дея чақира бошлайди. Бугунги кунда кўпчилик футболчини айнан ана шу исм билан танийди.
АЭРОПОРТДА АЙТИЛГАН ДИЛ ИЗҲОРИ
2002 йилда футболчи ота-онаси билан махсус кечага ташриф буюради. Кечага уларнинг оилавий дўсти Келиколар оиласи ҳам келганди. Шу кечада Симоне дос Сантос ўғлини дўстининг қизи Каролина Келико билан таништиради. Ўшанда қизалоқ ўн беш ёшга тўлган, Кака эса «Сан-Паулу» таркибида тўп сурарди. Кака кейинчалик бу янги дўсти билан телефон ҳамда интернет орқали суҳбатлашиб туради. Уларнинг дўстлиги бора-бора муҳаббатга айланади. Каролина эса бу хотираларини қуйидагича ёдга олади: «Какани аэропортда учратиб қолганимда жуда ҳаяжонланиб кетдим. Менга қараганида эса унга нисбатан кўнглимда аллақандай туйғулар борлигини ҳис қилдим. Нима дейишни билмай, дугонам билан менга дастхат ёзиб беришини сўрадим. У дугонамга «Меҳр билан Кака» дея дастхат берди. Мен тутқазган ёндафтарчага эса «Бўсалар ҳамда чексиз муҳаббат билан Кака» деб ёзди ва илк бор аэропортда менга севги изҳор қилди. Кейинчалик сюрпризи борлигини айтиб, шаҳарнинг энг баланд биноларидан бирига олиб чиқиб, унга турмушга чиқишимни сўради. Кака — мен учун Яратганнинг инъоми. Тақдиримдан асло нолимайман.
Биз ҳеч қачон ортиқча ҳиссиётга берилмаганмиз. Романтика ҳам биз учун у қадар аҳамиятли эмас. Турмушимизда ҳамма нарса меъёрида ва жиддий тартибларга асосланиб яшаймиз...»
2005 йилнинг 23 декабрида Кака ва Каролинанинг никоҳ тўйи бўлиб ўтди. Футболчини табриклаш учун дунёнинг энг машҳур футболчилари ва шахслари — жами 600 нафар киши йиғилганди. Бу тўйда Кака ва Каролина биргаликда қўшиқ ижро этади. Уни футболчи рафиқасига атаб ёзганди. Бу тарона кейинчалик Каролинанинг биринчи альбомидан жой олади.
Ҳозирда Кака икки фарзанд: бир ўғил (Лука Келико Лиете) ва қиз (Изабелла)нинг отаси.
НУФУЗЛИ ШАХСЛАР РЎЙХАТИДА
Даврий нашрлар футболчини дунёнинг энг нуфузли 100 кишиси рўйхатига киритган. Бунга эса унинг «Дунё озиқ-овқат дастури» хайрия лойиҳасида кўнгилли бўлиб иштирок этаётганлиги сабаб бўлган. Таъкидлаш жоизки, Кака ушбу лойиҳанинг махсус вакили ҳамдир.
«САН-ПАУЛУ»дa:
Йилнинг энг яхши ўйинчиси (2001 йил)
«MИЛАН»да:
Италия суперкубоги соҳиби (2004 йил)
UEFA Чемпионлар лигаси соҳиби (2006-2007 йиллар)
UEFA суперкубоги соҳиби (2007 йил)
«РЕАЛ»да:
Миллий чемпионат ғолиби (2011-2012 йиллар)
Испания кубоги соҳиби (2010-2011 йиллар)
Испания суперкубоги соҳиби (2012 йил)
МИЛЛИЙ ТЕРМА ЖАМОАда:
Жаҳон чемпиони (2002 йил)
Конфедерациялар кубоги соҳиби (2005, 2009 йиллар)
«CONCACAF» кубоги соҳиби (2003)
A сериянинг энг яхши легионери (2004, 2006, 2007 йиллар)
А сериянинг энг яхши ўйинчиси (2004, 2007 йиллар)
UEFA Чемпионлар лигасининг энг яхши марказий ҳимоячиси (2005 йил)
UEFA Чемпионлар лигасининг энг яхши ўйинчиси (2006-2007 йиллар)
Дунёнинг энг яхши ўйинчиси (2007 йил)
«Олтин тўп» соҳиби (2007 йил)
«Toyota» мукофоти соҳиби (2007 йил)
Йилнинг энг яхши ўйинчиси (2007 йил)
IFFHS таснифига кўра, энг яхши плеймейкер (2007 йил)
IAAF таснифига кўра, Лотин Америкасининг энг яхши спортчиси (2007 йил)
Конфедерациялар кубогининг олтин тўп соҳиби (2009 йил)
Конфедерациялар кубогининг энг яхши ўйинчиси (2009 йил)
Низомжон ИСЛОМОВ
«ҲОРДИҚ ПЛЮС»дан олинди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Шўртан
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
