Фарғонанинг «Нефтчи» клуби анъанавий «Фарғона вилоят ҳокими кубоги» мусобақасида 2та таркиб билан иштирок этди. Якунда бош соврин жамоанинг асосий таркибига насиб этди. 15 февраль куни эса Мурод Исмоилов шогирдлари Туркиянинг Анталия шаҳрига жўнаб кетишди. Сафар олдидан янги мавсумни «Нефтчи»да бошлайдиган тажрибали ҳужумчи Рўзимбой Аҳмедовни суҳбатга чорладик.
— Рўзимбой, жамоангиз «Фарғона вилоят ҳокими кубоги» мусобақасида ғолибликни қўлга киритди. Аммо сиз учрашувларда майдонга тушмадингиз...
— Бироз шамоллаб қолгандим, шунинг учун мураббийлар мени 2-3та ўйиндан сўнг майдонга туширишни режалаштиришганди. Аммо об-ҳаво бирданига совиб кетгач, клубимиз шифокорлари ва мураббийлар мени асрашди, чоғи. Хуллас, бу вақтда индивидуал тарзда шуғулландим.
— «Нефтчи» фаолиятингиздаги янги клуб. Жамоага ўтишингиз қандай юз берди?
— Клуб мураббийларидан бири Элдор Сакаев қўнғироқ қилиб, таклиф этди. Ўша пайт бош мураббий Амет Мемет эди. Янги йилдан кейин эса Мурод ака Исмоилов бошқарувни ўз қўлига олди. Жамоадаги айрим йигитлар, масалан, Ғайрат Ҳасанов ва Жаҳонгир Меҳмонов билан бирга ўйнаганман, баъзиларига рақиб бўлганман. Умуман олганда, кўпчилик билан танишман. Қисқаси, «Нефтчи»да мени яхши кутиб олишди. Клубимиз таркиби деярли 70 фоиз янгиланди. Янги мавсумда ижобий натижалар қайд этамиз, деган умиддаман. «Нефтчи» билан бир йиллик шартнома туздим.
— Ўтган йили «Навбаҳор»да тўп сурдингиз. Намангандан кетишингиз сабабига ҳам тўхталсангиз...
— Аслида жамоадан яхши таассуротлар қолди. Наманган — футболсеварлар юрти. Айниқса, «Навбаҳор»нинг мухлисларига гап йўқ. Ишқибозлар ҳозиргача қўнғироқ қилиб, ҳол-аҳвол сўрашади, нега жамоадан кетганимни сўрашади. Очиғини айтиш керак, клубдан кетмоқчи эмасдим. Аммо ўтган мавсум якунланиб, таътилга чиққанимиздан ке-йин клубдан ҳеч ким қўнғироқ қилмади, яъни таклиф бўлмади. Шу сабабли «Нефтчи» вариантини танладим.
— «Нефтчи»га ўтишингизда жамоа мавқеи ҳам муҳим роль ўйнагандир...
— Ҳа, «Нефтчи» юртимиздаги обрўли ва совриндор клублардан бири саналади. Бундан ташқари, жамоа бош мураббийи Мурод ака Исмоилов билан яхши танишмиз. Ушбу мутахассис билан 2010 йили «Пахтакор»да йўлларимиз кесишганди. Ўшанда клубни сербиялик Миодраг Радулович бошқарар, Мурод ака эса ёрдамчи эди. У машғулотлар чоғи ёшларга кўпроқ эътибор қаратарди.
Тўғри, сўнгги йилларда «Нефтчи»нинг мавқеи анча пасайиб, совриндорлар сафидан ўрин ололмай келяпти. Аммо янги мавсумда клубнинг олдига улкан мақсадлар қўйиляпти. Мурод ака клуб билан ОЧЛга йўлланма берадиган ўринлардан бирини эгаллаш ниятида.
— Жамоа ҳужум чизиғи хусусида нима дея оласиз?
— Мендан ташқари, Зоҳид Абдуллаев ва Носир Отақўзиев сингари тажрибали ҳужумчилар бор. Бир сўз билан айтганда, рақобат бинойидек. Демак, ўз устимизда жиддий ишлашимиз шарт.
— XXIII миллий чемпионат тақвими «Нефтчи» учун бироз ноқулай келгандек...
— Дастлабки турларда «Бухоро», «Пахтакор», «Навбаҳор», «Қизилқум», «Насаф» каби клубларга қарши майдонга тушамиз. Илк учрашувни сафарда, Бухорода ўтказсак, ўз майдонимиздаги очилиш ўйинида «Пахтакор» билан куч синашамиз. Кейин Наманганга сафар уюштириб, «Водий дербиси»да иштирок этамиз. Албатта, бу ўйинлар осон кечмайди. Аммо дастлабки 3-4та тургача барча жамоалар имконияти тенг бўлишини ҳисобдан чиқармаслик лозим. Зеро, футболчилар ҳали оптимал формага кирмаган бўлишади ва шу сабаб ўз имкониятларини тўлиқ намойиш эта олишмайди. Умуман олганда, янги мавсумда ҳар бир учрашувга фақат ғалаба иштиёқида тушамиз.
— Айрим ҳужумчилар янги мавсум арафасида ўз олдиларига гол уриш бобида муайян марра қўйишади...
— Ҳужумчининг асосий вазифаси гол уриш эканлиги барчага маълум. Янги мавсумда иложи борича кўпроқ тўп киритиб, голеадорлар рўйхатидан жой олишга интиламан. Аммо асосийси, жамоа манфаати. Голларим ва самарали тўп узатишларим орқали жамоа ютуқларига муносиб ҳисса қўшсам, бас.
— Умуман, янги мавсумдан нималар кутяпсиз?
— Миллий жамоамиз ЖЧ йўлланмасини қўлга киритолмаганлиги боис асосий эътибор ички чемпионатимизга қаратилади. Демак, мавсум олдингиларидан анча қизиқарли кечса керак. Мана, барча клублар ўз таркибларини кучайтириб олишди ва ҳар бир жамоада камида бир нафардан тажрибали, ўйинни ўз қўлига оладиган футболчи бор. Чемпионлик учун ҳам кураш қизғин кечиб, 4-5та клуб бунга даъвогарлик қилиши эҳтимолдан холи эмас.
Маълумот учун
Рўзим Аҳмедов
Туғилган санаси ва манзили: 1987 йил 3 май, Урганч шаҳри
Футбол билан 7 ёшидан шуғуллана бошлаган
Биринчи мураббийи: Одамбой Қурбонниёзов
Урганчдаги футбол мактаби ва Хоразм давлат университети «Жисмоний маданият» факультетини тамомлаган
Амплуаси: ҳужумчи
Ўйнаган жамоалари: «Хоразм» (Урганч) — 2007-2009 йилнинг 2-давраси, 2010 йилнинг 1-давраси; «Пахтакор» (Тошкент) — 2009 йилнинг 2-давраси, 2010 йилнинг 2-давраси; «Навбаҳор» (Наманган) — 2011, 2013 йил; «Динамо» (Самарқанд) — 2012 йил. 2014 йилдан «Нефтчи»да
Оилали, 2 фарзанднинг отаси
Мухлислик қиладиган клублари: «Барселона» ва «Зенит»
Ёқтирган футболчилари: Луис Суарес ва Александр Кержаков
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
