Россия терма жамоаси бош мураббийи Фабио Капелло кўпни кўрган мутахассислардан ҳисобланади. Аммо у ҳам шу йил ёзда Бразилияда бўлиб ўтган жаҳон чемпионатидаги тезликни кўриб ҳайрон қолди.
FIFA.com сайти мухбирлари италиялик тажрибали мутахассис билан Санкт-Петербургда бўлиб ўтган мураббийлар йиғилишида кўришиб, суҳбатлашишди.
- Россия термаси билан тузган шартномангиз 2018 йилда ниҳоясига етади. Жамоадаги мақсадларингиз қандай?
- Мақсадим, Россия терма жамоаси билан ўз майдонида бўлиб ўтадиган жаҳон чемпионатида муваффақиятли иштирок этиш. Энг аввало, бунинг учун жамоани турнирга юқори савияда тайёрлашим лозим. Вазифамиз рақобатбардош жамоа тузишдан иборат. Шундай экан, катта ишларга қодир бўлган футболчиларни излаб топишимга тўғри келади.
- Яқинда Александр Кержаков Россия терма жамоаси сафида энг кўп гол урган ўйинчига айланди. Ундан қай тарзда фойдаланишни режалаштиргансиз?
- Шубҳасиз, Кержаков жамоанинг энг яхши тўпурарларидан бири. Айни пайтда у 31 ёшда. Шундай экан, ишлаши қийинлашган. Энг муҳими, Александр ёш футболчиларга ўрнак бўла олади. Умид қиламанки, у ҳали кўп йиллар ўз голлари билан жамоага ёрдам беради.
- Сўнгги пайтларда Дмитрий Полоз, Денис Черишев, Магомед Оздоев ва Артём Дзюба каби ёш футболчиларни катта саҳнага олиб чиқдингиз. Тажриба ва ёшликни жамлаш сиз учун қанчалик муҳим?
- Бу муҳим жараён. Аммо сифат ва атрибутлар жамланмаси муҳимроқлигини унутмаслик лозим. Мен нимани назарда тутяпман - бу ёш футболчилар сифатга эга бўлишди.
- Россия охирги 3та Европа чемпионатида иштирок этди. Нима деб ўйлайсиз, жамоанинг Евро-2016нинг финал босқичига чиқиш имкониятлари қандай?
- Биз жуда қийин гуруҳга тушганмиз. Ибрагимовичдек футболчига эга Швеция, айни пайтда етарлича кучли бўлган Австрия каби рақибларимиз бор. Бундан ташқари, Черногория терма жамоаси ҳам ҳар қандай рақибга қаршилик кўрсата олади. Айнан шу жамоалар хавфли рақиблардир. Саралаш баҳслари узоқ давом этади. Ишончим комил, унинг сўнггида биз керакли ўринда бўламиз.
- Сиз Златан Ибрагимовични ёдга олдингиз. Унинг айтишича, «Ювентус»да ўйнаб юрган кезлари сизнинг ўгитларингиз туфайли шу даражага чиққан экан. Бу борада сизнинг фикрингиз қандай?
- Ибра ўта иқтидорли футболчи. Бундай ўйинчиларни «гол машинаси»га айлантириш эса қийин иш эмас. Унга арзимаган вазифаларни берардим ва шунинг ўзи кифоя эди. Бундан ташқари, Златан ҳар куни алоҳида шуғулланарди. У бош билан қийналиб ўйнарди. Шу боис ҳам бу борада тинимсиз шуғулланарди. Натижада, Ибранинг ўйинида ўзгариш кузатилди. Бир куни унга қўнғироқ қилиб, «Сен Марко ван Бастен каби яхши ўйнайсан. Унинг даражасига етиш учун ҳам имкониятларинг бор. Шу боис ҳам ван Бастеннинг голлари ёзилган видеони кўришни маслаҳат бераман. Агар кўп гол уришни истасанг, рақиб жарима майдонига яқин ўйна» дедим. Бу гапларим унга тезда таъсир қилди.
- Кучли рақибга қарши кечадиган баҳсларга футболчиларни қандай тайёрлайсиз?
- Мураббий бўлсангиз, ҳар бир чизиқни ёпиш қанчалик муҳим эканлигини тушунасиз. Лекин таркибдаги ўйинчилар ўша-ўша. Шундай экан, уларга руҳий жиҳатдан далда бериш керак.
- Юқорида Россия терма жамоасининг Евро-2016 саралаш баҳсида кучли гуруҳга тушганини айтдингиз...
- Умуман олганда, ўзингизга қарши ўйнайдиган ҳар қандай жамоани ҳурмат қилиш керак, деб ҳисоблайман. Шубҳасиз, Швеция деганда Ибрагимовични эсламасликнинг иложи йўқ. Австрияда эса жамоавий ўйин ривожланган. Черногория бўлса, асосан индивидуал маҳоратли футболчилар хизматига таянади. Ушбу жамоа таркибида ҳақиқаттан кучли ижрочилар бор. Биз ҳар бир жамоани у ёки бу хислатлари учун ҳурмат қиламиз.
- Сиздай тажрибали мураббий Петербургдаги анжуманда нимани ўзлаштириши мумкин?
- Бу ерда гапирилган гапларни барчасини ёзиб олдим. Энди эшитган нарсаларимдан хулоса чиқараман. Ҳар қандай инсон умр бўйи ниманидир ўзлаштиришга ҳаракат қилади. Агар янги нарсаларни ўрганмас экансиз, мураббийликни ташлаб, бошқа соҳага ўтишингизга тўғри келади. Бошқалардан ўзингизни баланд тутмасдан, уларнинг фикрларини ҳурмат қилишингиз лозим.
- Бразилияда бўлиб ўтган жаҳон чемпионатида қандай янгиликларга гувоҳ бўлдингиз?
- Агар ЖАРдаги мундиал ва Европадаги саралаш баҳсларига солиштирадиган бўлсак, ўйиннинг тезлиги ошганига гувоҳ бўлдим. Мени ҳаммасидан ҳам ажаблантирган нарса шу. Ҳар бир жамоанинг тезлиги ортган. Шу боис ҳам бу йилги жаҳон чемпионати менга ёқди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
