Қайта сайланганига қарамай, ФИФА президенти Зеп Блаттер истеъфога чиқишга қарор қилди. Буни эса ташкилотда шундоқ ҳам кўп ишлагани, қолаверса, қайта сайланган бўлса-да, ўзига нисбатан кўплаб эътирозлар билдирилаётгани ва кўпчилик ундан норози бўлаётгани билан изоҳлади. «Мен чарчадим. Умид қиламанки, мендан кейин келадиган президент ФИФАда ижобий ўзгаришларни амалга оширади. Сайловгача эса ташкилотни ўзим бошқариб тураман», дея фикр билдирди Йозеф. Аммо унинг бу қарори шубҳа уйғотди. Айрим мутахассислар президент бу билан ФИФАдаги қонунбузарликлардан ўзини олиб қочмоқчи, деган фикрда. Шунинг учунми коррупция борасида текширув олиб бораётган тегишли идоралар Блаттерни ҳам текширишга қарор қилишган.
Айни дамда кўпчиликни бир савол ўйлантиряпти. «Хўш, Блаттернинг ўрнига ким президент бўларкин? «Aif.ru» сайти айнан шу саволга тўхталиб, ФИФАни бошқариши мумкин бўлган 6 нафар номзод рўйхатини эълон қилди.
ШАҲЗОДА АЛИ
Блаттернинг тахтига асосий номзод сайловларда имкониятни бой берган Иордания шаҳзодаси Али бин ал-Ҳусайн бўлиб турибди. У айни дамда ФИФА вице-президенти ва ўарбий Осиё футбол Федерацияси президентидир. Аммо баъзи мутахассислар шаҳзоданинг имкониятини олдингидек эмас, деб баҳолашяпти. Боиси, сайловларда муддатидан олдин таслим бўлгани унга овоз берганларнинг ҳафсаласини пир қилган.
Ал-Ҳусайн дастлаб Уммонда таълим олган. Кейин эса Буюк Британия ва Қўшма Штатларда ўқиган. Спортнинг кураш тури билан ҳам шуғулланиб туради.
МИШЕЛЬ ПЛАТИНИ
Франция терма жамоаси ва Туриннинг «Ювентус» клубининг етакчи ўйинчиси Мишел Платини футбол оламида севимли футболчи сифатида ном қозониб улгурган, ўз вақтининг машҳур ўйинчисига айланганди. У Европа чемпионлиги ва жаҳон чемпионатининг бронза медалини қўлга киритган. Клуб сафида ҳам ақл бовар қилмас натижаларни эгаллаган: икки марта дунёнинг энг кучли футболчиси ва уч марта Европанинг энг яхши тўпурари деб топилган ва «Олтин бутса»га лойиқ кўрилган
Аммо ҳозир Платинини машҳур собиқ футболчи сифатида эмас, Платини-функционер сифатида танишади. Ахир у айни дамда УЕФА президенти, дунё футболидаги иккинчи энг қудратли одам. 2002 йилда ФИФА ва УЕФА ижроия қўмиталари аъзолигига сайланган Платини орадан беш йил ўтиб, УЕФА президенти бўлди.
Платини функционер сифатида футболда анчадан бери амал қилиб келаётган анъаналарни, қолипга айланган одатларни бузиб ташлади. Хусусан, футболда молиявий фэир-плейга амал қилиш керак, деб ҳисоблади. Қолаверса, УЕФА Чемпионлар лигаси ва Европа лигасини бирлаштириб, битта мусобақага айлантириш тарафдори эди. Аммо бу мақсади ҳали амалга ошгани йўқ ва кўплаб қаршиликларга учраши табиий.
ВОЛЬФГАНГ НИРСБАХ
Президентлик курсисига учинчи номзод германиялик мутахассис, ФИФА ва УЕФА ижроия қўмитаси аъзоси Вольфганг Нирсбахдир. У айни дамда Германия футбол иттифоқи президенти ҳам ҳисобланади.
Нирсбах фаолиятини немис журналларидан бирида спорт журналисти сифатида бошлаган. Кейинчалик узоқ муддат Германия футбол иттифоқи матбуот хизматида фаолият юритган. Орадан маълум вақт ўтгач мазкур ташкилотнинг бош котибига айланган ва ниҳоят, 2012 йилга келиб, Германия футболининг асосий шахсига айланган.
Нирсбах асосий эътиборини болалар футболини ривожлантиришга қаратган, айнан унинг даврида мамлакатида бу борада сезиларли ўзгаришлар амалга оширилган.
МИШЕЛЬ Д’ХУГ
Президентликка тўртинчи даъвогар ФИФА ижроия қўмитасининг бельгиялик аъзоси, Бельгия футболи функционери Мишель Д’Хугдир.
Мазкур номзод ҳақидаги маълумотлар унчалик кўп эмас. Фақат бир жиҳатни алоҳида таъкидлаш мумкин, у 2011 йилда Россия футбол федерацияси собиқ президенти Вячеслав Колосков билан яқин алоқа ўрнатган ва 2018 йилги жаҳон чемпионатининг Россияда ўтказилишини қўллаб-қувватлаган. Шундан сўнг турли миш-мишлар тарқалди, улардан бирида Колосковнинг Бельгияга жуда қимматбаҳо расм олиб боргани ва уни Мишелга ҳадя қилгани, бу билан эса уни Россияга овоз беришга кўндиргани таъкидланганди. Бироқ Мишель дарҳол ФИФАга қиммат совғалар ташкилот фаолиятидаги холисликни бузишини билишини етказди ва мазкур миш-мишлар асоссиз эканини айтиб ўтган.
ИССА ХАЯТУ
Мазкур рўйхатдан камерунлик Исса Хаяту ҳам ўрин олган. 68 ёшли функционер ҳозирда Африка Футбол Конфедерацияси президенти вазифасини баражариб келмоқда. У дунё футболининг энг машҳур шахсларидан бири.
Исса 1988 йилда Африка футболининг энг етакчи шахсига айланган ва ўшандан буён ўз вазифасини оғишмай бажариб келяпти. У спорт билан шуғулланиб юрган кезларида 400 ва 800 метр масофага югуриш бўйича мамлакат чемпионлигини қўлга киритган, шунингдек, баскетбол бўйича миллий терма жамоа сафида ҳаракат қилган, қолаверса, футбол билан ҳам шуғулланган.
Африка футболининг гуллаб-яшнаши унинг номи билан боғлиқ. Хусусан, бу даврда кўплаб кучли ўйинчилар етишиб чиқди. Бунга Нигерия, Камерун, Сенегал ва бошқа терма жамоалардаги футболчилар мисол бўла олади. Бундан ташқари, қитъадан жаҳон чемпионатида қатнашадиган термалар сони ҳам кўпайди.
2002 йилда у ФИФА президентлигига номзодини қўйди. Аммо Блаттер ғалаба қозонди. Орадан маълум вақт ўтгач эса Исса Йозефнинг асосий тарафдорларидан бирига айланди. Бунинг исботи ўлароқ, ҳар бир сайловда Африка қитъаси Блаттерни ёқлаб овоз беради.
Ўз навбатида, у ҳам 2018 ва 2022 йили жаҳон чемпионати мезбонларини аниқлаш борасида порахўрликка йўл қўйганликда айбланмоқда. Шуни алоҳида таъкидлаш керакки, Россия бу борада Исса билан ҳеч қандай алоқа қилмаган. Аммо Қатар бундан мустасно экан. Миш-мишларга кўра, Исса Қатар футболи мутасаддиларидан бирини таклиф қилиб, унга мундиаль мезбонлигини Қатарга олиб бериш учун ёрдам беришини таклиф қилган экан.
ЛУИШ ФИГУ
ФИФА президентлигига олтинчи ва сўнгги номзод португалиялик собиқ футбол афсонаси Луиш Фигудир.
Фигу ҳам худди Платини сингари машҳур футболчидан таниқли функционерга айланиб улгурди. У айни дамда Миланнинг «Интер» клубида спорт директори вазифасини бажариб келмоқда. Фигу ҳам президентлик учун Иордания шаҳзодаси билан биргаликда Блаттерга қарши кураш олиб боришни мақсад қилган, аммо кейинчалик ал-Ҳусайннинг фойдасига ўз номзодини қайтиб олганди.
Низомжон ИСЛОМОВ тайёрлади.
МАНБА: “ҲОРДИҚ ПЛЮС”
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
