Айни пайтда олий лигада давралар оралиғидаги танаффус эълон қилинган. Элитамиз клублари ҳал қилувчи баҳсларга пухта тайёргарлик кўришмоқда. Айрим жамоаларимиз хориж, қолганлари юртимизда ўқув-машғулот йиғинларини ўтказишмоқда. Машғулотларда эса бир қатор янги футболчилар кўрикдан ўтишмоқда. Табиийки, ҳар бир клуб юзага келган танаффусдан фойдаланиб, ўз таркибини юқори савияли ўйинчилар билан тўлдиришга ҳаракат қилади. Қуйида биринчи даврани жамоасиз ўтказган, мавсумнинг иккинчи қисмига келиб бирорта клуб таркибидан жой олишга умид қилаётган футболчилар хусусида сўз юритамиз.
Шавкат РаимҚулов
Тажрибали ҳимоячи Шавкат жорий мавсумнинг биринчи даврасида ҳеч қайси жамоа рўйхатидан ўрин олмади. Бунга футболчининг жароҳати сабаб бўлди. Ҳимоячи қишда «Андижон» машғулотларида бир муддат қатнашган бўлсада клуб унинг хизматидан воз кечди. Шундан сўнг Раимқулов фаолиятини тугатганлиги тўғрисида хабарлар пайдо бўлганди. Лекин футболчи иккинчи даврада олий лигамизнинг бирорта жамоаси таркибида ўйнашни мақсад қилган. Сўнгги йилларда Шавкатнинг фаолиятида кескин пасайиш юз берди. Натижада футболчи бир клубда узоқ вақт ўйнай олмаяпти. Қолаверса, жароҳатлар, Раимқуловга ўз имконияти даражасида ўйнашга тўсқинлик қиляпти.
Дилшод Жўраев
«Бунёдкор»нинг энг истеъдодли ярим ҳимоячиларидан бири сифатида тан олинган Дилшод Жўраев биринчи даврада «қалдирғочлар» таркибида кўринмади. Сергей Лушан уни асосий жамоа сафига қўшишни истамади. Натижада Дилшод бир муддат «Бунёдкор-2» клуби сафида биринчи лига баҳсларида тўп сурди. Эндиликда эса Жўраев иккинчи даврада ўзига янги жамоа топиш илинжида. Маълумотларга кўра, ярим ҳимоячи ҳал қилувчи босқичда олий лиганинг бирорта клуби шарафини ҳимоя қилмоқчи. Мавсум бошида қаҳрамонимизга «Андижон»дан таклиф тушган ва ўшанда унинг «бургутлар» сафига ўтиши амалга ошмаганди. Балки у энди «Андижон» таркибига қўшилар?
Шуҳрат Йўлдошев
«Металлург» сафида 8 мавсум давомида тўп сурган ярим ҳимоячи ҳам иккинчи даврада фаолиятини элита клуби сафида давом эттиришни мақсад қилган. «Маъданчилар»нинг етакчисига айланган Йўлдошев жорий мавсум арафасида негадир бекободликлар сафини тарк этди. Шундан кейин у бирорта жамоада ўйнагани йўқ.
Рустам Мирсодиқов Йўлдошевнинг имкониятларини бошқаларга нисбатан анча яхши билади. Бу эса унинг яна собиқ клуби таркибига қайтишига туртки бўлиши ҳеч гапмас.
Зайниддин Тожиев
Жорий мавсум арафасида «Бухоро» таркибига қўшилган Зайниддин Тожиев биринчи давра баҳслари якунланмасидан амалдаги шартномасини бекор қилди. Бунга нима сабаб бўлганлиги эса бизга номаълум. Шунга қарамай, Тожиевларнинг каттасига элитамиз клубларидан таклиф бўлиши аниқ. Ахир у улкан тажрибага эга ҳамда иккинчи даврада ҳар қандай жамоани кучайтира олади. Тўғри, тўпурар Зайниддин Тожиевнинг вақти ўтди. Аммо йиллар давомида тўпланган тажриба муҳим учрашувларда асқотиши эҳтимолдан холи эмас.
Алибобо Раҳматуллаев
Алибобо Раҳматуллаевнинг истеъдодли ва келажаги порлоқ ярим ҳимоячи бўлиши кутилганди. Лекин унинг ишлари унчалик юришмаяпти. «Бунёдкор»дан кетганидан сўнг ёш хавбек «Пахтакор» билан шартнома тузди. Жорий мавсум старти арафасида «Бухоро»га ўтди. Мазкур жамоада Алибобонинг етакчига айланиши, Александр Мочиновнинг унга имконият тақдим этиши кутилганди. Аммо Раҳматуллаев бухороликлар таркибида ўзини кўрсата олмади. Вақтини асосан захира ўриндиғида ўтказиб, ёшлар лигасида тўп сурди. Бунинг натижасида футболчи биринчи давра учрашувлари якунланмасдан, «Бухоро»ни тарк этишга қарор қилди. Энди Раҳматуллаев эркин агент сифатида иккинчи даврада истаган клуби сафидан жой олиши мумкин.
Янги жамоасига унинг иқтидори ва тўплаган тажрибаси ёрдам бериши муқаррар. Қолаверса, Алибобонинг фаолиятини хорижда давом эттирмоқчи эканлиги тўғрисида ҳам хабарлар бор.
Темур Кагиров
Бир пайтлар «Пахтакор»да тўп сурган, «Андижон»нинг сардори ва етакчи футболчиларидан бири бўлган Темур Кагиров ўтган йили «Олмалиқ»да иши юришмагач, жорий мавсум арафасида яхши ниятлар билан «Навбаҳор» таркибига қўшилганди. Аммо Кагиров Наманганда ҳам захира ўриндиғидан жой олди ва асосан ёшлар лигасида тўп сурди. Бунга наманганликларнинг ҳимоя чизиғида рақобат кучлилиги сабаб бўлдими ёки тажрибали ҳимоячининг ўйинида пасайиш юзага келганми, буниси бизга қоронғу. Лекин кимнинг қандай формада эканлигини мураббий яхши билишини унутмаслик даркор.
«Навбаҳор»да ҳам ўйин амалиётига эга бўлолмаган Кагиров давралар оралиғида жамоани тарк этишга қарор қилди.
Ғайрат Ҳасанов
«Нефтчи»даги ёрқин ўйинлари орқали бир пайтлари миллий терма жамоамиздан ҳам чақирув олган тажрибали посбон негадир биринчи даврада бирортаям клуб таркибида кўриниш бермади. Хабарларга қараганда, Ғайрат айни пайтда Фарғона Давлат университетида таҳсил оляпти. Шунингдек, кипер кейинчалик фаолиятини мураббийлик соҳасида давом эттириш ниятида шекилли, «С» мураббийлик лицензиясини қўлга киритди. Кези келганида Ҳасановнинг эндигина 32 ёшга тўлганлигини ҳам эътироф этиш жоиз. Дарвозабонларнинг 30 ёшдан кейин «очилиш»ларини инобатга олсак, Ғайратнинг ҳали элитамиз клубларига фойдаси тегишига ишончимиз комил.
Александр Клецков
Бир пайтлари «Пахтакор» клуби ва миллий терма жамоамизда ажойиб ўйинлар намойиш этган тажрибали ҳимоячи Александр Клецков ўтган йили Фарғонанинг «Нефтчи» клубида тўп сурганди. Аммо жорий мавсумнинг биринчи даврасида Саша у бирорта жамоада кўриниш бермади. Бунинг сабаби аниқ эмас. Лекин Клецковнинг эндигина 30 ёшга тўлганлигини эътиборга олсак, Александрнинг ёрқин ўйинлари ҳали олдинда.
Азиз Алижонов
Бир пайтлари «Нефтчи»нинг кашфиётларидан бирига айланган ушбу ярим ҳимоячи ўтган мавсумни ҳам фарғоналиклар таркибида якунлаганди. Лекин жорий йилнинг ўтган даври давомида бирорта клуб рўйхатидан ўрин олмади.
Яқинда 30 ёшга тўлган Алижоновни иккинчи даврада олий лиганинг бирорта жамоаси таркибида кўрамиз, деган умиддамиз.
Игорь Михайлов
Бир пайтлари миллий терма жамоамиз ва Россия клубларида ёрқин ўйин намойиш этган тажрибали дарвозабон Игорь Михайлов сўнгги мавсумларда Самарқанднинг «Динамо» клуби шарафини ҳимоя қилганди. Аммо ўтган йили бор-йўғи 4та учрашувда майдонга тушган тажрибали кипер «кўҳна шаҳарликлар» сафини тарк этишга қарор қилди. Игорь жорий мавсумнинг биринчи даврасида бирорта жамоада кўриниш бермади.
Шу йилнинг 24 февралида 35 ёшга тўлган Михайловни балки иккинчи даврада бирорта клуб ўз сафига қўшиб олар.
Акмал Бозоров
«Динамо»нинг етакчи ҳимоячиларидан бири Акмал Бозоров жорий мавсум арафасида самарқандликлар таркибини тарк этганди. Лекин у 24-миллий чемпионатимизнинг биринчи даврасида бирорта жамоа рўйхатидан ўрин олмади.
Акмал яна қадрдон клубида тўп суришни хоҳлайди, шекилли, айни пайтда «кўҳна шаҳарликлар»нинг Дукентдаги ўқув-машғулот йиғинларида қатнашмоқда. Бозоровнинг ҳаракатлари «Динамо» мураббийларида яхши таассурот қолдирса, у иккинчи даврани яна самарқандликлар таркибида бошлайди.
Темур Султонов
«Навбаҳор» ва «Бухоро» клубларининг собиқ ҳимоячиси жорий йилнинг биринчи ярмини легионер сифатида Қирғизистон олий лигаси иштирокчиси «Олой» (Ўш) клуби таркибида ўтказди. Темур айни пайтда Қирғизистон чемпионатида танаффус юзага келганидан фойдаланиб, юртимизга қайтди.
Балки олий лига клубларидан таклиф тушса у Ўзбекистонда қолар...
Аюбхон Гаппаров
Ўсмирлар терма жамоасидаги ёрқин ўйинлари туфайли инглиз журналистлари томонидан «ўзбек Руниси» деб номланган Аюбхон Гаппаров жорий мавсумнинг биринчи ярмида Темур Султоновга жамоадош бўлди. У ҳам айни пайтда юртимизга қайтган. Маълумотларга қараганда, Гаппаровга айни пайтда Таиланд ва Малайзия клубларидан таклифлар бор.
Лекин элитамиз жамоалари ташаббус кўрсатишса, Аюбхон фаолиятини миллий чемпионатимизда давом эттиришга қарши эмас. Зеро, у мутахассисларга «Навбаҳор» ва «Андижон» клубларидаги ўйинлари орқали яхши таниш.
* * *
Шунингдек, бир пайтлари олий лигаси «ҳавоси»дан баҳраманд бўлган Ярослав Крушельницкий, Темур Яфаров, Темур Ҳакимов, Илдар Магдеев, Собир Усмонхўжаев, Анвар Раҳимов (барчаси «Оқ-тепа»), Илҳом Суюнов, Воҳид Холбоев, Исроил Эргашев, Фаррух Нурлибоев (барчаси «Локомотив-БФК»), Леонид Кошелев, Музаффар Умрзоқов, Олим Новкаров (барчаси «NBU-Осиё»), Алишер Тўхтасинов («УзДонгЖу»), Дониёр Усмонов, Баҳром Йўлдошев, Абдураззоқ Жўраев, Абдулазиз Султонов, Соҳиб Абдуллаев (барчаси «Хотира-79»), Исроил Турсунов («Косонсой»), Азиз Ибрагимов («Цементчи»), Алишер Азизов («Обод»), Константин Боев («Машъал-2»), Нодир Тешабоев («Зомин»), Ғайрат Ўдаев, Маркс Қуронбоев, Илёс Хайров, Ринат Байрамов (барчаси «Хоразм») сингари футболчилар ҳам биринчи лига жамоаларида тўп суришмоқда.
Улуғбек УМАРОВ, "ИнтерФУТБОЛ" газетаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
